Read Runyoro - rutooro Kurug 31 Bible Online

Kurug 31 - Runyoro - rutooro bible

Kurug 31

¹MUKAMA akagambira Musa ati:

²“Nkomere Bezaleeri, mutabani wa Hula, omwana wa Hura ow'oruganda rwa Yuda.

³Mwijwize Mwoyo wa Ruhanga, muhaire okwetegereza, amagezi n'amagezi goona ag'emirimo ey'engaro,

⁴kucwa amagezi ag'okukora ekintu kyona eky'engaro, akole ebintu ebya zaabbu, eby'efeeza n'eby'omulinga,

⁵okutema obubaale obw'okuhunda, kubaija ebintu omu miti, n'amagezi ga buli mulimo gw'engaro.

⁶Kandi mukomere na Oholyabu, mutabani wa Ahisamaki ow'oruganda rwa Daani. Abantu b'emirimo y'engaro mbahaire amagezi, nukwo basobole kukora byona ebi nkuragiire, nibyo binu:

⁷Eheema ey'okutangatanganiramu, esanduuko ey'endagaano, ekitebe eky'okuganyirirraho ekiraagikarahoga, ebintu byona eby'omu Heema,

⁸emeeza n'ebikwato byayo, ekikondo ekirungi eky'etaara na byona ebinyakukikoraho, itambiro ery'okucumiikirirraho obubbani,

⁹itambiro ery'okuhongeraho ebihongwa ebyokeze, ebbeseni n'ekikondo eky'okugyemerezaamu,

¹⁰eby'okujwara ebinyakukozirwe kurungi, ebijwaro ebirukwera ebya Arooni nyakatagara n'eby'abatabani, ebi baraajwaraga nibakora omulimo ogw'obwanyakatagara,

¹¹amagita ag'okuseesaho ab'okwezibwa n'obubbani oburukuboya kurungi obu acumiikirra omu Kiikaro Ekirukwera. Ebi byona obikole nkooku nkuragiire.”

¹²MUKAMA akagambira Musa ati:

¹³“Gaambira abaana ba Isirairi oti: ‘Ekiro kyange ekya Sabbato, mukitemuga ekitiinisa, habwokuba ekiro eki nuko karorwaho kange na inywe ebiro byanyu byoona, nukwo mumanye nkooku nyowe MUKAMA, ninyowe mbeeza.

¹⁴Ekiro kya Sabbato mukitemuga ekitiinisa, habwokuba hali inywe, kiro ekirukwera, weena ataakitemuga ekitiinisa, w'okwitwa, weena ow'alikikorraho omulimo, omuntu ogu asendwe aihwe omu bantu b'owabo.

¹⁵Abantu bakolege emirimo omu biro mukaaga, baitu ekiro kya musanju, kiro ekirukwera, ky'okuhuumura, kiro kya MUKAMA weena alikora omulimo ha Sabbato, araitwaga.

¹⁶Habweki, abaana ba Isirairi, batemuga Sabbato ekitiinisa ebiro byabo byoona, niko karorwaho k'endagaano etahwaho.

¹⁷Sabbato niyo eraabaga karorwaho kange h'abaana ba Isirairi ebiro byoona, habwokuba ebiro mukaaga, nibyo MUKAMA yakoliiremu iguru n'ensi, ha Sabbato yahuumura.’ ”

¹⁸MUKAMA obu yamazire kugambira Musa ebi byona ha rusozi Sinai, yamuha ebibbali bibiri eby'amabaale, bihandiikirweho n'orukumo rwa Ruhanga.