Read Runyoro - rutooro Kurug 32 Bible Online

Kurug 32 - Runyoro - rutooro bible

Kurug 32

¹Abantu obu baarozire Musa alemere kugaruka kuruga ha rusozi, baayesorooza baagenda hali Arooni, baamugambira bati: “Yanguha otukorre embandwa eziratwebembera, habwokuba Musa ayatwihire omunsi Misiri, titumanyire ekimubaireho.”

²Arooni yabagambira ati: “Mwihe empeta eza zaabbu ezinyakuli ha matu ga bakazi baanyu, batabani baanyu na bahara baanyu, muzindeetere.”

³Abantu boona nukwo kwiha empeta eza zaabbu ezikaba ziri ha matu gaabo, baazireetera Arooni.

⁴Yakwata empeta yazaagya, yazikoramu enyana, abantu baagamba bati: “Otyo, Isirairi, banu nubo ba ruhanga bawe abakwihire omunsi Misiri!”

⁵Arooni obu yaboine eki, yayombeka itaambiro omumaiso gaayo, yaragira abantu naagamba ati: “Kiro kya nyenkya, kiraaba kiro ky'obugenyi bwa MUKAMA.” Obwire obu bwakiire,

⁶abantu baimuka nyenkya kara, baahonga ebihongwa ebyokeze, baaleeta ebihongwa habw'obusinge, baikarra, baalya, baanywa, baatandika kuzina n'okuzaana.

⁷MUKAMA yagambira Musa ati: “Sirimuka, habwokuba abantu bawe aba waihire Misiri basiisikaire bandugaho.

⁸Omuhanda nabaragiriire kurabamu bagurugiremu bwango, beekoliire enyana omu mpeta ezi baagize, baagiramya, baagihongera kandi baagamba bati: ‘Otyo, Isirairi, banu nubo baaruhanga baawe abakwihire omunsi Misiri!’ ”

⁹Kandi MUKAMA Ruhanga yagambira Musa ati: “Abantu abo mbeetegeriize, ndozire nkooku bali bantu ntahurra.

¹⁰Nahabweki, otantanga, ndeka, ka mbeemarreho ekiniga, mbahwerekereze, baitu iwe ndikwihamu ihanga erikooto.”

¹¹Baitu Musa yayesengereza MUKAMA Ruhanga we naagamba ati: “Ai MUKAMA habwaki obiihiriirwe muno oti abantu bawe aba waihire Misiri habw'obusobozi bwawe n'amaani?

¹²Abaamisiri tibaagambe ngu nikyo waihiire abantu baawe Misiri, obaitire omu nsozi obamale omunsi? Leka kubiihirwa muno oti, huumura, oyebwe ekibi eki abantu bawe bakozire.

¹³Oijuke abairu bawe, Abburahamu, Isaaka na Isirairi, iwe wenka aba warahiriire wabagambira oti: ‘Ndikanyisa abaijukuru baanyu, baingane enyunyuuzi eza haiguru, kandi ensi enu yoona ei naraganiize, ndigibaha, eriba yanyu ebiro byona.’ ”

¹⁴MUKAMA yahurra, yaganyira abantu be, tiyabakoraho akabi nkooku akaba ateekeriize.

¹⁵Kandi Musa yahinduka, yasirimuka orusozi akwasire ebibbali by'amabaale bibiri ebihandiikirweho endagaano. Ebibbali ebi, bikaba bihandiikirwe ha mbaju zombi.

¹⁶Ebibbali by'amabaale ebi, bikakorwa Ruhanga, kandi nuwe yabihandiikireho ebiragiro.

¹⁷Yoswa obu yahuliire abantu nkooku barukutoka, yagambira Musa ati: “Etoko enyakuli omu rukande y'obulemu.”

¹⁸Baitu Musa yagamba ati: “Egi teri toko ey'erukumanyisa ngu abantu basingire rundi basingwirwe kwihaho y'okuzina.”

¹⁹Musa obu akaba yakahika haihi n'orukande, yarora enyana n'abantu nibacekeca, ekiniga kyayenda kumwita, nukwo kuteera hansi ebibbali by'amabaale hansi y'orusozi byayatika.

²⁰Yakwata enyana ei bakaba bakozire, yaginaga omu murro yahya, yagiihamu yagisa, ensaano yayo yagimamirra ha maizi, yaragira Abaisirairi baganywe.

²¹Musa yakaguza Arooni ati: “Abantu banu bakukozire ki kubaleetaho ekibi ekikooto ekirukwingana aho?”

²²Arooni yagarukamu ati: “Mukama wange, leka kumbiihirirwa muno oti, na iwe noomanya abantu nkooku banguha kugwa omu bubi.

²³Habwokuba bakandagira ngu: ‘Tukorre ruhanga araatwebembera, Musa ogu ayatwihire omunsi Misiri, titumanyire ekimubaireho.’

²⁴Nyowe nabagarukamu nti: ‘Weena anyakujwaire ekintu ekya zaabbu, akyeejuule!’; Nabo baabimpa, nabinaga omu murro, byarugwamu enyana enu.”

²⁵Musa obu yayetegeriize nkooku abantu basasamaire kandi Arooni ali nuwe abaleetiire kusasamara, kinu kibakwasize n'ensoni omumaiso g'abanyanzigwa baabo,

²⁶Musa yayemerra omu irembo ly'orukande yakaguza ati: “Nibaha abanyakuli ha rubaju rwa MUKAMA? Mwije nambere ndi.” Abaana ba Leevi boona baayesorooza, baagenda nambere Musa akaba ali.

²⁷Yabagambira ati: “MUKAMA Ruhanga owa Isirairi agambire ati buli muntu ajwale empirima ye, murabanganemu omu rukande, okuruga ha irembo limu okuhika ha lindi. Buli muntu aite owanyina, munywani we n'omutaahi.”

²⁸Abaana ba Leevi baakora nkooku Musa yabagambiire. Ha kiro eki, abantu abaafiire bakahika enkumi isatu.

²⁹Musa yagamba ati: “Kiro kinu, mwejwekere inywenka obukuru obw'okukora omulimo gwa MUKAMA buli omu naahayo omwana we, rundi owanyina, nikyo MUKAMA asigikiireho kubaha omugisa.”

³⁰Obwire obu bwakiire, Musa yagambira abantu ati: “Mukozire ekibi ekikooto. Hati, ka ntembe ha rusozi nambere hali MUKAMA rundi nsobora kubasabira kuganyirwa habw'ekibi kyanyu.”

³¹Nubwo Musa yagaruka hali MUKAMA yagamba ati: “Mahano! Abantu banu bakozire ekibi kikooto, beekoliire baaruhanga aba zaabbu.

³²Hati nkwesengeriize, obaganyire ekibi kyabo, obu oraaba otarukubaganyira, nkwesengeriize, oragaze ibara lyange omu kitabu kyawe eki wampandiikiremu.”

³³MUKAMA yagarukamu Musa ati: “Weena anyakunsobiize, nuwe ndaiha omu kitabu kyange.

³⁴Baitu iwe hati, genda oyebembere abantu, obatwale omu kiikaro eki nakugambiire, malaika wange araakwebembera. Akasumi kange ak'okubafubira obu kalihika, ndibafubira habw'ekibi kyabo.”

³⁵Nubwo MUKAMA yabanagira kagingo, habw'okuramya enyana ei Arooni yabakoliire.