Read Runyoro - rutooro Kurug 33 Bible Online

Kurug 33 - Runyoro - rutooro bible

Kurug 33

¹MUKAMA akagambira Musa ati: “Ruga hanu, ogende n'abantu waihire Misiri, mugende, omunsi ei narahiire kuha Abburahamu, Isaaka na Yakobbo ningamba ngu: ‘Ndigiha abaijukuru baabo.’

²Ndituma malaika ababanzeyo abingemu Abakanaani, Abahiiti, Abapereezi n'Abayebusi.

³Mugende omunsi enyakwijwire oburungi nk'amata n'obwoki; baitu nyowe tindukwija kugenda na inywe, tinyikara kubahwerekerereza omu muhanda, habwokuba muli bantu ntahurra.”

⁴Abantu obu baahuliire amakuru amabi ago, baasaalirwa muno: hatabeho n'omu ayajwaire eby'okwejaahiika.

⁵Habwokuba, MUKAMA akaba aragiire Musa agambire abantu ba Isirairi ngu: “Bali bantu ntahurra; kakuba agenda na bo, akasumi kake kati, asobora kubahwerekereza. Kandi ngu bajuule ebintu byabo eby'okwejaahiika, nukwo amanye eki arakora.”

⁶Nubwo, abaana ha Isirairi, baajuura ebintu byabo eby'okwejaahiika, bali ha rusozi Holebbu, okuruga obu, batongere kubijwara.

⁷Omu kasumi ako, Musa yaikaraga naateera Eheema ei yayetaga Eheema ey'okutangatanganiramu aheeru y'orukande; eyesunguswire hara y'orukande. Buli muntu ayaserraga MUKAMA yagendaga omu Heema egi.

⁸Buli kasumi, Musa obu yarugaga omurukande kugenda omu Heema, abantu boona baimukaga, buli omu ayemerra ha mulyango ogw'Eheema ye, bamutaho amaiso okuhikya obu araakataaha omu Heema.

⁹Musa obu yamaraga kutaaha omu Heema, hasirimuka enyomyo ey'ekicu, eyemerra ha mulyango gw'Eheema, MUKAMA atandika kubaza na Musa.

¹⁰Abantu boona, obu baaroraga enyomyo y'ekicu eyemeriire ha mulyango gw'Eheema, boona baimuka, baramya, buli omu aramiza ha mulyango gw'eheema ye.

¹¹MUKAMA nukwo yabazaaga na Musa ati, nibarorangana amaiso n'amaiso, nkooku omuntu abaza n'enganjani ye. Musa obu yagarukaga omu rukande, Yoswa omuheereza we mutabani wa Nuuni, yasigaraga omu Heema ey'okutangatanganiramu.

¹²Musa akagambira MUKAMA ati: “Dora niiwe wandagiire kuleeta abantu banu; baitu otangambire omuntu ou olituma kugenda na nyowe. Kandi okagamba ngu: ‘Omumanyire muno kandi okansiima.’

¹³Hati nu, nkwesengeriize, obu oraaba nooganja na nyowe, nyoleka emikoorre yawe, nukwo nkumanye kandi nsiimwe kandi oijuke ihanga linu nkooku liri lyawe.”

¹⁴MUKAMA Ruhanga yagarukamu ati: “Ndaagendaga na iwe kandi ndaakuhuumuzaga.”

¹⁵Musa yagarukamu MUKAMA ati: “Obu oraaba otarukugenda na nyowe, otatwikiriza kuruga hanu.

¹⁶Abantu baraamanya bata, nkooku orukutugonza? Tibarukumanyira hali iwe kugenda na itwe, nyowe n'abantu bawe nkooku turukwahukana ha bantu abandi abanyakuli omunsi?”

¹⁷MUKAMA yagarukamu Musa ati: “Ndaakora ekintu eki kyonyini eki ogambire, habwokuba nkakusiima kandi nkumanyiire kimu.”

¹⁸Musa yagamba ati: “Nkwesengeriize, nyoleka ekitiinisa kyawe.”

¹⁹MUKAMA yamugarukamu ati: “Oburungi bwange bwona, ninyija kubukwoleka oburole, nkumanyise amakuru ag'ibara lyange MUKAMA. Ndigirra embabazi aba ndigonza kugirra embabazi, ndiganyira abandigonza kuganyira.”

²⁰Baitu yagaruka yagamba ati: “Tosobora kundora amaiso; habwokuba, omuntu tasobora kundora akagaruka akoomeera.”

²¹MUKAMA Ruhanga yagamba ati: “Haihi nanyowe, haroho omwandara, nugwo ogende oyemerreho;

²²obu ndaaba nindabaho ninyangasana ndaakuta omu nyatika y'omwandara ogu, nkusweke n'omukono gwange, kuhikya obu ndarabaho; nukwo ondole amabega;

²³habwokuba amaiso gange tosobora kugarora, okoomeera.”