Read Runyoro - rutooro Kurug 34 Bible Online

Kurug 34 - Runyoro - rutooro bible

Kurug 34

¹MUKAMA yagambira Musa ati: “Baija ebibbali by'amabaale bibiri, ebirukusisana eby'okubanza, nukwo mbihandiikeho ebigambo ebikaba biri ha bibbali eby'okubanza ebi wayasire.

²Oyeteekanize, nyenkya kara otembe ha rusozi Sinai, ondindirre ha mutwe gw'orusozi.

³Otaija n'omuntu ondi weena, kandi hatabaho muntu n'omu, ow'araazooka ha rusozi; otaikiriza amagana ag'entaama, ag'embuzi n'ag'ente kuhika ha rusozi.”

⁴Nubwo Musa yabaija ebibbali by'amabaale bibiri ebirukusisana n'eby'okubanza, yaimuka nyenkya kara, yatemba ha rusozi Sinai, nkooku MUKAMA yamuragiire, yagenda akwasire ebibbali by'amabaale bibiri.

⁵MUKAMA yasirimukira omu kicu yayemerra haihi na uwe, kandi yayeranga oku ali MUKAMA.

⁶MUKAMA yaraba omumaiso ga Musa naarangiirra ati: “Ninyowe MUKAMA, MUKAMA, Ruhanga owokuganyira kandi ow'embabazi, atabiihirwa bwango, ow'engonzi enyingi ezitahwaho kandi omwesigwa.

⁷Ndagirra engonzi zange hali abantu enkumi n'enkumi, nganyira abantu obubi, n'ebibi byabo, kunu tinculerra kibi, kandi nfubira abaana habw'emisango eya baisenkurubo, okuhikya ha bwijukuru obw'enyakasatu n'obw'enyakana.”

⁸Nubwo, Musa yainama yaramya.

⁹Yagamba ati: “Ai MUKAMA, obu oraaba noongirra embabazi, nkwesengeriize, ogendege na itwe. Abantu abo, noobu baraaba bali ntahurra, otuganyire ensobi n'ebibi byaitu, kandi otwikirize tube bagwetwa bawe.”

¹⁰MUKAMA yagamba ati: Hati bunu, ninkora endagaano. Ninyija kukora ebirukuhuniriza ebitakabonwahoga omunsi yoona rundi omwihanga lindi lyona, abantu bawe boona nibarora. Kandi abantu baawe boona aba oikara nabo, nibaija kurora MUKAMA ebi akora, habwokuba, eki ndaakora omuli inywe, nikiija kuba kintu ekirukuhuniriza.

¹¹Eki ndukukuragira kiro kinu, okiteho omutima, mmaliriire kubinga Abamooli, Abakanaani, Abahiiti, Abaperezi, Abahiivi n'Abayebusi omunsi yaabo, inywe mutakahikireyo.

¹²Mwerinde, mutalikora endagaano n'enzaarwa z'ensi egi ei murukugendamu, etaliikara kubafookera buhya obw'okugwamu.

¹³Museese amatambiro gaabu, muhwerekereze amaramizo gaabo, mutemateme embandwa zaabo.

¹⁴Mutaliramya embandwa, habwokuba nyowe MUKAMA ndi Ruhanga ow'ihali.

¹⁵Mwerinde, mutalikora endagaano n'enzaarwa z'ensi, obu baliba nibasiihana kusemeza embandwa zaabo, rundi nibabasarra ebyonzira, asobora kubaho arukubaraliza, na inywe mukaikiriza kulya ha byonzira by'ebwandwa zaabo.

¹⁶Rundi musobora kuswererra batabani baanyu bahara baabo hanyuma bahara baabo batwalirize batabani baanyu nabo kukora nka bo.

¹⁷Mutalyekorra baaruhanga kuruga omu bintu ebirukwagibwa.

¹⁸Obugenyi obw'emigaati etatumbisiibwe, mubutemuga ekitiinisa. Mumalege ebiro musanju nimulya emigaati etatumbisiibwe nkooku nabaragiire omu kasumi akatairweho omu kwezi kw'Abbibbu.

¹⁹Aka mwarugiiremu omunsi Misiri. Ekizigaijo ekisaija kyoona kyange eky'amatungo ganyu nk'ente n'entaama.

²⁰Omuzigaijo ogw'endogoyi, mugucunguzeege omwana gw'entaama, kakuba mutagucungura, mugumyole ebikya mugwiite. Aboojo emizigaijo eya batabani baanyu mubacungule. Hatalibaho omuntu n'omu ow'alizooka omumaiso gange ali ngaro nsa.

²¹Mukolege emirimo omu biro mukaaga, baitu ha kiro ekya musanju, muhuumulege; n'omu kasumi ak'okulima n'ak'igesa, nabwo muhumule.

²²Mutemuga ekitiinisa obugenyi obwa wiiki, nubwo obugenyi obw'omuganuro, n'obugenyi obw'igesa erya ha mpero y'omwaka.

²³Abasaija baanyu boona, bazookege emirundi esatu buli mwaaka omumaiso ga MUKAMA Ruhanga, Ruhanga wa Isirairi.

²⁴Habwokuba, ndibinga amahanga mutakagahikiremu, nyirizeeyo emitaano yawe, busaho n'omu ow'alyegomba kwegarurra emitaano yawe, obu muraabaga mugenzire kukurata omumaiso ga MUKAMA Ruhanga wanyu emirundi egi esatu.

²⁵Otalimpongera esagama ey'ekyonzira kyange hamu n'ekyokulya ekitumbisiibwe, noobukwakuba kwahura ekyonzira eky'okwijuka obugenyi obw'okuhingurwaho okuhikya nyenkya.

²⁶Omuganuro ogw'ebijuma eby'itaka lyanyu, muguleetege omunju ya MUKAMA Ruhanga wanyu. Ekyana ky'embuzi, mutalikicumbisa amata ga nyinakyo.

²⁷MUKAMA yagambira Musa ati: “Ebigambo binu obihandiike, habwokuba niyo ndagaano ei ndagaine na iwe, n'abaana ba Isirairi.”

²⁸Omu kiikaro eki, Musa akamara na MUKAMA emisana makumi ana n'ebiro makumi ana, atarukulya kandi atarukunywa kantu. Akahandiika ebigambo eby'endagaano, nibyo Ebiragiro ikumi.

²⁹Musa kuruga ha rusozi akwasire ebibbali by'amabaale bibiri ebinyakuhandiikirweho endagaano, habw'akasumi aka yamazire na Ruhanga, akaba naayangasana ha maiso, baitu uwe ateemanye.

³⁰Arooni n'abantu ba Isirairi boona, obu baarozire nkooku arukwangasana ha maiso, baatiina n'okumwirra haihi.

³¹Baitu uwe yabeeta, Arooni n'abeebembezi b'ekitebe baagenda nambere ali, yabaza nabo.

³²Hanyuma abantu ba Isirairi boona bairra haihi, Musa yabamanyisa ebiragiro byona MUKAMA ebiyamuragiire ali ha rusozi Sinai.

³³Musa obu yamazire kubabaliza yayeswekerra omwenagiro ha maiso.

³⁴Buli murundi Musa ogu yagendaga kubaza na MUKAMA omwenagiro yagwihaga ha maiso, kuhikya obu yagarukayoga, nukwo agambire abantu ebi MUKAMA amuragiire.

³⁵Abaisirairi obu baaroraga amaiso ga Musa nigangasana; batiina kumurora, uwe ayeswekerra, okuhikya obu yabaga nagarukayo kubaza na MUKAMA.