Read Runyoro - rutooro Kurug 35 Bible Online

Kurug 35 - Runyoro - rutooro bible

Kurug 35

¹Musa yasorooza ekitebe kyona eky'abantu ba Isirairi yabagambira ati: “Binu nibyo bintu MUKAMA abaragiire kukora.

²Mukolege emirimo omu biro mukaaga, baitu ekiro ekya musanju hali inywe, eraabaga Sabbato erukwera ehairweyo hali MUKAMA, weena ow'aligikorraho omulimo, ogu w'okwitwa.

³Ha kiro eki, mutalihemba omurro omu maka ganyu.”

⁴Musa yagambira ekitebe kyona eky'abantu ba Isirairi ati: “Binu nibyo MUKAMA aragiire.

⁵Ha bintu byanyu ebi mutungire, mwiheho ekintu eky'okuhongera MUKAMA. Anyakwina omutima ogw'obwenda, aleete ekintu eky'okuhongera MUKAMA; ekya zaabbu, efeeza, n'omulinga.

⁶Eky'engoye ez'erangi ya kaneke, kahuukya, n'erukugaajuka, na kitaani erukirwe kurungi,

⁷engoye ezinyakurukirwe kurungi mu bwoya bw'embuzi, omu mpu z'entaama empaya n'ez'embuzi ezihindwirwe erangi erukunanata, n'embaaho z'omusisa.

⁸Amagita ag'etaara, ebiboya eby'okutabura amagita aganyakuseeswaho abantu n'ebintu eby'okwezibwa, n'eby'okwongera kuboyesa eseeta;

⁹amabaale ag'erangi ezitali zimu ag'okuhunda ekanzu n'ekya ha kifuba ekinyakujwarwa nyakatagara obu aba naagenda kwekaguza hali MUKAMA.”

¹⁰Weena omuli inywe anyakumanyire kukora kurungi omulimo aije tukole byona MUKAMA ebi aragiire: Enju ya MUKAMA,

¹¹Eheema yayo n'eby'okugisweka, ebikwaso n'embaaho zaayo, emango zaayo, enyomyo zaayo, obucuba bwayo;

¹²esanduuko y'endagaano n'emango zaayo, ekitebe eky'okuganyirirraho, n'enyigamo ey'okukinga;

¹³emeeza n'emango zaayo na byona ebinyakukwatirwaho; omugaati ogw'okwoleka;

¹⁴ekikondo eky'etaara na byona ebinyakukoraho, etaara zaakyo n'amagita ag'etaara;

¹⁵itambiro ery'okucumiikirirraho obubbani n'emango zaalyo; amagita aganyakuseeswaho abantu n'ebintu eby'okwezibwa; eseeta ey'erukuboya kurungi; orukingyo orunyakukinga omulyango ogurukutaaha omunju ya MUKAMA;

¹⁶itambiro ery'okwokezaaho ebihongwa n'ekyoma kyalyo eky'omunda ekinyakusungusura amakara, emango zalyo na byona ebinyakulikoraho, ebbeseni n'ekikondo kyayo ekyetebwamu n'orukingyo orw'irembo ery'ezigati;

¹⁷engoye ez'okutimba omu zigati, enyomyo zaayo n'obucuba bwayo;

¹⁸enkondo ez'Enju ya MUKAMA n'ezigati, obuguha bwazo;

¹⁹ebijwaro ebinyakubaziirwe kurungi eby'okuheererezamu omu kiikaro ekirukwera, ebijwaro ebirukwera, Arooni nyakatagara n'abatabani ebi baraakorramuga omulimo gwaabo ogw'obunyakatagara.

²⁰Kandi, abantu boona baaruga omumaiso ga Musa baagenda.

²¹Buli muntu omutima gwe ou gwagambiire kandi ou gwahambiriize, akaleetera MUKAMA Ruhanga ekihongwa eky'okukora omulimo ogw'Eheema ey'okutangatanganiramu habw'omulimo gwona ogunyakukolerwamu, na habw'ebijwaro byona ebirukwera.

²²Abasaija n'abakazi, boona baija: boona abakaba baina omutima ogurukugonza, bakaleeta ebikwaso, empeta ezinyakujwarwa ha matu na ha nkumo, ebikomo n'ebintu byona ebya zaabbu eby'okwekunisa. Buli muntu akaleeta ekintu kyona eki yarozire kisemeriire MUKAMA.

²³Buli muntu ow'akaba aina orugoye orw'erangi eya kaneke, kahukya n'erukugaajuka, rundi kitaani enungi, obwoya bw'embuzi, empu ezinyakuhazirwe ez'entaama empaya rundi ez'embuzi, akazireeta.

²⁴Omuntu ayasoboire kuleeta ekintu eky'efeeza rundi eky'omulinga, akakireeta yakihongera MUKAMA; kandi omuntu weena ow'akaba aina omuti omurungi ogw'omusisa, ogunyakusemeriire kukora omulimo, na uwe yaguleeta.

²⁵Abakazi boona abakaba bamanyire kukora kurungi emirimo y'engaro, baaruka ebintu byona ebi baasoboire, baabireeta, eby'erangi eya kaneke, kahukya n'erukugaajuka na kitaani enyakurukirwe kurungi.

²⁶Abakazi abakaba bamanyire muno kukora emirimo y'engaro abayegondiize, bakaranga obwoya bw'embuzi.

²⁷Abeebembezi b'abantu, baaleeta obubaale obw'erangi zimu obw'okuhundisa ekanzu, n'ekya ha kifuba;

²⁸ebiboya n'amagita ag'etaara n'aganyakuseeswaho abantu n'ebintu eby'okwezibwa, n'ag'okwongera kuboyesa kurungi eseeta.

²⁹Abasaija n'abakazi boona Abaisirairi, abakaba baina omutima ogurukugonza kuhonga ekintu kyona eky'okukora omulimo ogu MUKAMA yaragiire Musa, agambire abantu bagukole, bakakireeta habw'okwegondeza baakihongera MUKAMA.

³⁰Musa yagambira abantu ba Isirairi ati: “Hati, mumanye MUKAMA akomere Bezaleeri mutabani wa Hura, omwana wa Huuli ow'oruganda rwa Yuda,

³¹Ruhanga amwijwize mwoyo we, amuheeriire kimu okwetegereza n'okumanya kukora emirimo eya buli mulingo ey'engaro,

³²kubaija ebintu omu zaabbu omu feeza n'omu mulinga;

³³okubaija obubaale obw'okuhundisa, kubaija ebintu omu miti, n'okukora emirimo yoona ey'amagezi.

³⁴Uwe na Oholiabu mutabani wa Ahisamaki ow'oruganda rwa Daani, abahaire amagezi ag'okutendeka abandi.

³⁵Abaheeriire kimu amagezi ag'okukora omulimo ogwa buli mulingo ogunyakukorwa omuntu anyakumanyire muno eby'okusarura amabaale, eby'okuhunda, eby'okuruka engoye ez'ehuuzo y'erangi ya kaneke, kahukya n'ezirukugaajuka hamu n'eza kitaani enyakurukirwe n'ehuuzo enungi n'emirimo ey'omutenzi ow'ebintu ebisobora kukorwa omuntu anyakumanyire muno.