Read Runyoro - rutooro Kurug 36 Bible Online

Kurug 36 - Runyoro - rutooro bible

Kurug 36

¹“Bezaleeri na Oholiabu na buli muntu ou MUKAMA yahaire amagezi n'obwetegereza obw'okumanya nkooku bakora omulimo ogw'okwombeka ekiikaro ekirukwera, baraakora nibahondera byona MUKAMA ebi aragiire.”

²Musa yayeta Bezaleeri, Oholiabu na buli muntu weena MUKAMA ou yahaire omwoyo ogw'amagezi, weena ayahurraga omutima gwe nigumuragira kwija kukora omulimo.

³Musa yabaha ebintu byona abaana ba Isirairi ebi baagabire habw'okwegondeza bikole omulimo omu kiikaro ekirukwera. Buli kiro abantu baikara nibamuleetera ebisembo eby'okwegondeza,

⁴habweki ab'amagezi, abaakoraga omulimo omu kiikaro ekirukwera, baija, baaruga ha mulimo ogu baakoraga,

⁵baagambira Musa bati: “Abantu baleesire ebintu bingi muno, okukira ebirukwetagwa kukora omulimo MUKAMA ogu yaragiire.”

⁶Nubwo Musa yataho ekiragiro, ab'omu rukande boona bamanyisibwe ekigambo ekirukugamba ngu: Hatagaruka kubaho omusaija rundi omukazi ow'arukwongera kugaba ebisembo eby'okukora omulimo ogw'ekiikaro ekirukwera. Abantu baatangwa kwongera kugaba;

⁷habwokuba, ebintu ebi bakaba bahaireyo, bikaba nibimara kukora omulimo n'okusaaga.

⁸Abantu abarukukirra kimu amagezi omu bakozi boona, baakora omulimo, baayombeka Eheema Erukwera. Kugyombeka bakagereekaniza emitanda y'engoye ikumi, emitanda egi, ekakorwa omu kitaani enyakurukirwe kurungi etabwiremu ehuuzo eza kaneke, kahukya n'ezirukugaajuka, hakoliirweho kurungi ebihange ebyamapapa.

⁹Obura obwa buli mutanda, mita ikumi na isatu, obugazi obwa buli mutanda, mita emu n'ekicweeka, emitanda yoona, ekaba eri y'orulengo rumu.

¹⁰Baagereekaniza emitanda y'engoye etaano, ogumu ha eruguru y'ogundi, n'endi etaano, nayo nukwo baagikozire bati.

¹¹Ha mukugiro ogw'aheeru y'emitanda enyakuteeraniziibwe hamu okubanza,

¹²baataho enyindo makumi ataano. Ha mukugiro ogw'aheeru, ogw'emitanda etaano, nayo enyakuteeraniziibwe hamu omurundi ogwa kabiri, baataho enyindo makumi ataano, enyindo ezi, zaarolerrangana.

¹³Baakora ebikwaso makumi ataano ebya zaabbu, ebyateeraniize emitanda egi aho Enju ya MUKAMA yaba kintu kimu ekinyakuhikiriire.

¹⁴Baayongera baakora emitanda ey'obwoya bw'embuzi, kibe kisweka eky'okusweka Eheema,

¹⁵yoona ekaba emitanda ikumi na gumu. Obura obwa buli mutanda, mita ikumi na isatu n'ekicweeka, kandi obugazi obwa buli mutanda, mita emu n'ekicweeka, emitanda ikumi nagumu yoona ekaba eri y'orulengo rumu.

¹⁶Baagereekaniza emitanda etaano, haarugamu gumu, baagereekaniza endi mukaaga, nayo yarugwamu ogundi.

¹⁷Ha mukugiro ogw'omutanda ogw'aheeru ogw'emitanda enyakuteeraniziibwe hamu okubanza, baataho enyindo makumi ataano, na ha mukugiro ogw'omutanda ogundi, ogurukugiteeraniza, naho baataho enyindo makumi ataano.

¹⁸Baakora ebikwaso makumi ataano eby'omulinga biteeranize hamu ekisweka, nukwo kibe kintu kimu ekinyakuhikiriire.

¹⁹Baakora ekisweka eky'empu ezinyakuhazirwe, ez'entaama empaya n'ez'embuzi, kibe kisweka ekya kabiri ekirukusweka Eheema.

²⁰Baakora embaaho ez'obwemi ez'emiti emisisa,

²¹obura obw'orubaaho mita ina n'ekicweeka, obugazi bwarwo, kicweeka kya mita.

²²Buli rubbaho rukaba runyina obwina bubiri obw'okufubata omurundi, embaaho zoona ez'Enju nukwo baazikozire bati.

²³Embaaho z'Enju bakazikora bati: embaaho makumi abiri ez'orubaju orw'obulyo,

²⁴baakora obucuba makumi ana obw'efeeza obw'okwemerezaamu embaaho makumi abiri, obucuba bubiri obw'okwemerezaamu orubbaho rumu orunyakwina obwina bubiri.

²⁵Orubaju orwa kabiri orw'Enju ya MUKAMA, orwa ha mukono ogwemoso, baarukorra embaaho makumi abiri,

²⁶n'obucuba bwazo obw'efeeza makumi ana. Obucuba bubiri obw'okwemerezaamu orubbaho rumu, n'obucuba bubiri obw'okwemerezaamu orundi.

²⁷Ha rubaju orw'enyuma orw'Enju ya MUKAMA, ha bukiizi obwa Bugwaizooba, bakarukorra embaaho mukaaga.

²⁸Kandi baakora embaaho ibiri ez'okuta ha burugu obw'Enju ya MUKAMA, ha rubaju orw'enyuma.

²⁹Hansi, buli rubbaho rukaba rwemeriire rwonka, kandi zikaba zihairengana omwanya, baitu eruguru, ziteeraniire omu mpeta ey'okubanza; embaaho ibiri ez'okuta omu burugu obubiri, nukwo baazikozire bati.

³⁰Embaaho zikaba ziri munaana, n'obucuba bwazo obw'efeeza bukaba buli ikumi na mukaaga, buli rubbaho nirwemerezibwa omu bucuba bubiri.

³¹Baakora emigamba ey'omuti omusisa, emigamba etaano ey'okugumya embaaho ez'orubaju orumu,

³²emango itaano ezindi ez'okugumya embaaho ez'orubaju orundi orw'Enju ya MUKAMA, emango itaano ezindi ez'okugumya orubaju orw'enyuma.

³³Baakora orubango orwa hagati, rurabiiremu kimu, okuruga ha mpero emu okuhika hali endi, nirwahukaniza ha biri embaaho ezemereziibwe omu bucuba.

³⁴Embaaho ezi, baazisweka zaabbu, baazikorra empeta eza zaabbu ez'okugumya emango ezi, emango nazo bazisweka zaabbu.

³⁵Baakora orukingyo orw'orugoye orwa kitaani enyakurangirwe kurungi, etabwirwemu ehuuzo eza kaneke, kahukya n'ezirukugaajuka, bakarukora baarubazirraho kurungi ebisisani by'ebihange byamapapa.

³⁶Orukingyo baarukorra enyomyo ina ez'omuti omusisa, baazisweka zaabbu, baazikwasizaaho n'ebikwaso ebya zaabbu, baazeemereza omu bucuba obw'efeeza.

³⁷Kandi baakora orutimbe orw'omulyango ogw'Eheema, omu rugoye orurukirwe kurungi, baatamu amanyumizo ag'ehuuzo eza kaneke, kahukya n'ezirukugaajuka,

³⁸kandi baarukorra enyomyo itaano n'ebikwaso byazo. Emitwe yazo, baagisweka zaabbu, baitu obucuba bwazo, bukaba buli bw'omulinga.