Read Runyoro - rutooro Kurug 37 Bible Online

Kurug 37 - Runyoro - rutooro bible

Kurug 37

¹Bezaleeri yakora esanduuko ey'endagaano omu mbaaho ez'omuti omusisa. Obura bwayo, mita emu, obugazi bwayo kicweeka kya mita n'obwemi bwayo kicweeka kya mita.

²Yagisweka kurungi na zaabbu, omunda n'aheeru, yagitaho omugoma ogwa zaabbu kugyehinguliriza.

³Yagikorra empeta ina eza zaabbu ez'okuta ha burugu bwayo obbuna, empeta ibiri ha rubaju orumu, n'empeta ezindi ibiri ha rubaju orundi.

⁴Yakora emigamba omu mbaaho ez'omuti omusisa yagisweka zaabbu.

⁵Emigamba ey'okugihimbiraho, yagisomeka omu mpeta ezikaba ziri ha mbaju ez'esanduuko.

⁶Yakora ekitebe eky'okuganyirirraho ekya zaabbu enungi, obura bwakyo mita emu, obugazi kicweeka kya mita.

⁷Yakora ebihange byamapapa bibiri ebya zaabbu,

⁸ekimu yakita ha rubaju orumu orw'esanduuko, ekindi yakita ha rubaju orundi. Ebihange byamapapa ebyo bibiri, n'ekitebe ky'okuganyirirraho bikakorwa omu zaabbu niyo emu kyaba kintu kimu ekikwataine.

⁹Ebihange byamapapa bikaba biroleriirengana, n'amapapa gaabo gaswekeriire ekitebe ky'okuganyirirraho.

¹⁰Kandi yakora emeeza ey'embaaho ez'omuti omusisa, obura bwayo haihi mita emu obugazi haihi kicweeka kya mita, obwemi bwayo kicweeka kya mita.

¹¹Yagisweka na zaabbu enungi, yagitaho omugoma ogwa zaabbu kugyehinguliriza.

¹²Yagiimukyaho orubbaho rwakora orubbalaza orw'obugazi bwa sentimita musanju n'ekicweeka, kugyehinguliriza, orubbaho yarwehinguliriza n'omugoma gwa zaabbu.

¹³Yagikorra empeta ina eza zaabbu, empeta ezi, yazibohera ha maguru gaayo ana.

¹⁴Empeta ezi ina, ezikaba ziri haihi n'orubbaho z'okukwata emigamba ey'okugihimbiraho.

¹⁵Yabaija omugamba ogw'omuti omusisa yagusweka na zaabbu.

¹⁶Yakora ebintu ebya zaabbu enungi eby'okuta ha meeza, nibyo binu: Esahaani, ebibindi, eby'okutamu obubbani, ebbakuli n'ejaagi eby'okwiturra ebihongwa eby'okunywa.

¹⁷Kandi yakora ekikondo eky'etaara ekya zaabbu enungi, entebe n'orubango rwakyo bikaheswa n'enyondo. Ebikopo, emitwe n'ebyakyo by'ekikondo bakabiheseraho.

¹⁸Hakaba haroho amataagi mukaaga agaakirugaga omu mbaju; amataagi asatu nigaruga ha rubaju rwakyo orumu, n'agandi asatu nigaruga ha rubaju rwakyo orundi.

¹⁹Ebikopo bisatu ebirukusisana obutunguru, buli kimu, kiina omutwe n'ekyakyo, byaabaga ha itagi limu, n'ebindi bisatu ebirukusisana obutunguru, buli kimu kiina omutwe n'ekyakyo, byaabaga ha itaagi erindi. Nahabweki, amataagi omukaaga goona, agaarugaga ha kikondo ky'etaara, nukwo gakaba gali gati.

²⁰Ha ruseke rwonyini orw'ekikondo ky'etaara, hakaba haroho ebikopo bbina ebirukusisana obutunguru, biina emitwe n'ebikya.

²¹Buli kikopo kimu kikozirwe hansi y'amataagi abiri, ha mataagi ago omukaaga agaarugaga ha ruseke.

²²Emitwe n'amataagi gaayo, bikoliirwe ha ruseke, ekikondo kyona kikozirwe omu kintu kimu ekinyakuheesirwe omu zaabbu enungi.

²³Yakikorra etaara musanju, empana n'esahaani zaakyo,

²⁴ebi byona bikaba biri bya zaabbu n'ehikya kiloguraamu makumi asatu na isatu.

²⁵Yakora itambiro ery'okucumiikirirraho obubbani, yalikora omu mbaaho ez'omuti omusisa, obura bwalyo, kicweeka kya mita obugazi bwalyo, kicweeka kya mita, embaju zaalyo ina, zainganainganaga. Obwemi bwalyo, bwahikaga mita emu, amahembe gaalyo, gabaiziirweho.

²⁶Omutwe gwalyo, embaaho zaalyo, n'amahembe, lyona kulyehinguliriza, yalisweka na zaabbu, yalitaho omugoma ogwa zaabbu kulyehinguliriza.

²⁷Yakora empeta ibiri eza zaabbu, yazita hansi y'omugoma gw'itambiro ha mbaju zaalyo ibiri, ezinyakuroleerraine, nukwo zikwate emigamba ey'okulihimbiraho.

²⁸Yabaija emigamba omu mbaaho ez'omuti omusisa, yagisweka zaabbu.

²⁹Kandi yatabura amagita agarukwera ag'omukoro ogw'okweza abantu n'ebintu eby'okwezibwa, yasa eseeta, yagitabura kurungi nk'anyakumanyire kutabura ebiboya.