Read Runyoro - rutooro Kurug 38 Bible Online

Kurug 38 - Runyoro - rutooro bible

Kurug 38

¹Bezaleeri yakora itambiro ery'okwokezaaho ebihongwa, nalyo ly'embaaho ez'omuti omusisa, obura bwalyo, mita ibiri, obugazi bwalyo nabwo mita ibiri. Itambiro eri, embaju zalyo ina, zainganainganaga, obwemi bwalyo, haihi mita emu n'ekicweeka.

²Yalikorraho amahembe ha burugu bwalyo obbuna, amahembe ago, akagabaiziraho; lyona yaliswekerra omulinga.

³Yakora ebintu byona eby'okukozesa ha itambiro eri, nibyo binu: ebinaga, ebitiyo, ebbeseni, ehuuma, esahaani ez'okuguhisa omurro, ebintu byalyo byona bikakorwa omu mulinga.

⁴Itambiro yalikorra ekyoma ky'okuhemberaho amakara, ekinyakukozirwe nk'akatimba, yakisomeka omunda omu mugoma gwalyo, kyainganiza habiri obwemi bw'itambiro.

⁵Yakora empeta ina, yazita ha burugu bbuna obw'ekyoma eky'okuhemberaho amakara, kikozirwe omu mulinga nukwo zigumye emigamba.

⁶Yabaija emigamba ey'omuti omusisa, yagiswekerra omulinga.

⁷Emigamba egi ey'okuhimbiraho itambiro, yagisomeka omu mpeta ezinyakuli ha mbaju zaalyo. Itambiro akalyombekesa embaaho, baitu omunda yalireka lyesamiriire.

⁸Akakora ebbeseni ey'omulinga n'ekituuti kyaayo eky'okugyemerezaamu, nakyo ky'omulinga, akabikora omu ndoleerwamu ezaaleesirwe abakazi abanyakuheereza ha mulyango ogw'Eheema ey'okutangatanganiramu.

⁹Ezigati ey'Eheema ya MUKAMA, ekategekwa eti: Ha rubaju orw'obukiizi obw'obulyo, engoye ezaahanikwaga ha nyomyo, zikaba ziri za kitaani enyakurukirwe kurungi, niihikya mita ana na itaano n'ekicweeka.

¹⁰Enyomyo zaazo, zaahikaga makumi abiri, obucuba bwaazo ha zaayemerezibwaga nabwo makumi abiri, bw'omulinga, baitu ebikwaso byazo n'enyomyo by'efeeza.

¹¹Ha rubaju orw'emoso, engoye ezaahanikwaga ha nyomyo, zaahikyaga mita ana na itaano n'ekicweeka, enyomyo zaazo makumi abiri, obwina bwazo nabwo makumi abiri, bw'omulinga, baitu ebikwaso by'enyomyo n'obuhuuzo bwazo, by'efeeza.

¹²Ha rubaju orwa Bugwaizooba engoye ezaahanikwaga ha nyomyo, zaahikyaga mita abiri na ibiri n'ekicweeka, enyomyo zaazo, zikaba ziri ikumi, obwina bwazo nabwo ikumi, ebikwaso eby'enyomyo n'obuhuuzo bwazo, bikaba biri by'efeeza.

¹³Ekicweka eky'omumaiso, kugarra Buturukaizooba, engoye ezaahanikwaga ha nyomyo, zaahikyaga mita abiri na ibiri n'ekicweeka.

¹⁴Engoye ez'okuhanika ha rubaju orw'irembo, zaahikyaga mita mukaaga n'ekicweeka, zaahanikwaga ha nyomyo isatu ezinyakwemereziibwe omu bwina busatu.

¹⁵Orubaju orundi orw'irembo, narwo nukwo rukaba ruli ruti, ha mukono gumu na ha mukono ogundi ogw'irembo, haahanikwahoga engoye ezirukuhikya mita mukaaga n'ekicweka, ezirukuhanikwa ha nyomyo isatu ezeemereziibwe omu bucuba busatu.

¹⁶Engoye ezaahanikwaga okwehinguliriza ezigati, zikaba ziri za kitaani enyakurukirwe kurungi.

¹⁷Obucuba obwayemerezibwamuga enyomyo, bukaba buli bw'omulinga, baitu ebikwaso eby'enyomyo n'obuhuuzo bwazo, bikaba biri by'efeeza; emitwe yebi byona ekaswekwa efeeza n'enyomyo zoona ez'ezigati ikagumibwa efeeza.

¹⁸Orukingyo orw'irembo ery'ezigati, rukaba ruli rwa kitaani enyakurukirwe kurungi, rutairwemu amanyumizo ag'ehuuzo eza kaneke, kahukya n'ezirukugaajuka, gabaziririrwemu n'emikono, orukingyo oru, rwahikyaaga obura bwe mita mwenda, obwemi bwarwo, mita ibiri, nirwingana n'engoye ezindi ezaahanikwaga omu zigati.

¹⁹Rwahanikwaga ha nyomyo ina, enyomyo ezi, zaayemerezibwaga omu bwina bbuna obw'omulinga, ebikwaso byazo bikaba biri by'efeeza, n'obuhuuzo obukaba buziroho, nabwo bw'efeeza.

²⁰Enkondo ez'Eheema n'ez'ezigati, kugyehinguliriza, zikaba ziri z'omulinga.

²¹Gunu nugwo omuhendo ogw'ebyoma ebyakozire Eheema ya MUKAMA: Eheema eyaikarwamuga endagaano, Musa nkooku yaragiire Abaleevi kubibara, nibarolererwa Itamara mutabani wa Arooni nyakatagara.

²²Bezaleeri mutabani wa Hura, mwijukuru wa Huuli ow'oruganda rwa Yuda, akakora byona MUKAMA Ruhanga ebi yaragiire Musa.

²³Kandi Bezaleeri ogu, akaba ali hamu na Oholiabu mutabani wa Ahisamaki ow'oruganda rwa Daani, omukozi ow'emirimo ey'engaro, omutegeki kandi omukozi ow'amanyumizo omu bintu ebya kaneke, kahukya n'ebirukugaajuka na kitaani enyakurukirwe kurungi.

²⁴Zaabbu yoona eyakozire omulimo ogw'okwombeka ekiikaro ekirukwera, zaabbu yoona abantu ei baahaire, ekahikya kiloguraamu nka rukumi mu abiri na ibiri.

²⁵Kandi efeeza eyarugire omuli abo ab'ekitebe abaabazirwe, ekahikya kiloguraamu nka enkumi isatu bitaano mu ikumi na itaano,

²⁶habwokuba buli muntu ayabaliirwe, omu kubara abantu, okurugirra ha muntu w'emyaka abiri ey'obukuru n'okwirrayo omumaiso, akasasura kimu kya kabiri kya sente ezasasurwaga, kandi omuhendo ogw'abasaija abaabazirwe, gukaba guli emitwaro nkaaga nkumi isatu, bbitaano n'ataano.

²⁷Efeeza eyahikize kiloguraamu enkumi isatu bitaano mu ikumi na itaano ekaba y'okwihwamu obucuba obw'okwemerezibwamu embaaho ez'Eheema n'obucuba obw'enyomyo ez'enyigamo. Obucuba kikumi nubwo bwarugire omu Feeza, buli kiloguraamu makumi asatu na itaano nakacweka akacuba kamu.

²⁸Kandi omu feeza eyasigaireho erukuhikya haihi kiloguraamu ikumi na itaano, ekakorwamu ebikwaso eby'okubohesa engoye ha nyomyo, yasweka emitwe yazo yakorwamu obuhuuzo obw'okuzitaho.

²⁹Kandi omulinga abantu ogu baaleesire, gukahikya kiloguraamu enkumi ibiri bbina n'ensanju,

³⁰ogu akagukozesa obwina obwa ha mulyango ogw'Eheema ey'okutangatanganiramu, yagukoramu itambiro n'ekyoma kyalyo eky'okuhembaho amakara, n'ebintu byona ebinyakukwatirwa ha itambiro;

³¹obucuba obw'okwehinguliriza ezigati, ebikondo byona eby'Eheema, n'ebikondo byona eby'okwehinguliriza ezigati.