Read Runyoro - rutooro Kurug 39 Bible Online

Kurug 39 - Runyoro - rutooro bible

Kurug 39

¹Baakora ebijwaro ebirungi muno ebinyakurukirwe n'ehuuzo eza kaneke, kahukya n'ezirukugaajuka, eby'okuheererezaamu omu Kiikaro Ekirukwera. Na Arooni, baamukorra eby'okujwara eby'okukorramu omulimo gwa Ruhanga nkooku MUKAMA akaba aragiire Musa.

²Baakora ekanzu eya zaabbu, enyakutabwirwemu ehuuzo eza kaneke, kahukya, ezirukugaajuka, n'eza kitaani enyakurangirwe kurungi.

³Zaabbu baagiteera n'enyondo yabbabbatara, baagisaramu emitanda ey'okurangira omuhuuzo eza kaneke, kahukya n'ezirukugaajuka, n'omu huuzo eza kitaani enyakurukirwe kurungi nk'abamanyire muno eby'okuranga oku bakora.

⁴Ekanzu egi, baagitaho obukoba obwa ha mabega, obunyakuyungiirwe ha mikugiro yombi.

⁵Omweko gwayo ogw'okugyeteegesa ogukaba gukozirwe kurungi, gukaba gukozirwe omu bintu bimu nk'ebi ebyakozirwemu ekanzu; ebya zaabbu, kaneke, kahukya n'ebirukugaajuka, n'ehuuzo eza kitaani enyakurangirwe kurungi, nkooku MUKAMA akaba aragiire Musa.

⁶Baateeraniza obubaale oburungi obw'erangi ezitali zimu obunyakusarwirwe nkooku basarura emanyikirizo y'omuntu, baabusomeka omu tundu ezinyakubaziirwe omu huuzo eza zaabbu. Omuhendo gwabwo, nigwinganaingana n'omuhendo ogw'abaana ba Isirairi.

⁷Baabuta ha bukoba obwa ha mabega g'ekanzu, bubege bw'okwijukirahoga abaana ba Isirairi, nkooku MUKAMA akaba aragiire Musa.

⁸Baakora ekya ha kifuba, baakikora omu ngoye eza kitaani enyakurangirwe kurungi nkooku baakozire ekanzu, baakitabamu enyerre eza zaabbu, ehuuzo eza kaneke, kahukya n'ezirukugaajuka.

⁹Embaju zakyo ina, zikaba nizinganaingana, kikaba kitiirwe enkubo ibiri, obu kyabaga kitiirwe enkubo ibiri, obura bwakyo bwahikaga sentimita abiri na ibiri.

¹⁰Baakitamu enkarra ina ez'obubaale, orukarra orw'okubanza, rukaba rurumu obubaale: Sarudiyo, Topazi, na Borakesi.

¹¹Omu rwa kabiri, hakaba harumu: Imiralido, Sufiro, na Alimasi.

¹²Omu rwa kasatu, hakaba harumu: Takwize, Agate na Ametisito.

¹³Omu rwa kana, hakaba harumu: bberuro, onekisi, na yesipa. Obubaale obu bwona, bakabusomeka omu tundu ezaabaziirwe n'ehuuzo eza zaabbu.

¹⁴Obubaale bwona, bwahikaga ikumi na bubiri, buroho amabara, g'abaana ba Yakobbo, kandi buli nk'emanyikirizo ez'enganda ikumi na ibiri eza Isirairi.

¹⁵Hakya ha kifuba, bakataho emikuufu enyakukozirwe nk'obuyondo.

¹⁶Baakora ebikwaso bibiri ebya zaabbu n'empeta ibiri nazo za zaabbu, empeta ezi ibiri, baazita ha mikugiro ebiri eya ha kya ha kifuba.

¹⁷Emikuufu ebiri, baagitahya omu mpeta ibiri ezinyakuli ha mikugiro gwakyo.

¹⁸Ensonga ibiri ez'emikuufu, bakaba bazikwasiize omu nkarra ibiri eza tundu omumaiso. Nukwo bakikwasize bati ha bikoba ebibiri eby'ekanzu ebya ha mabega.

¹⁹Baayongera baakora empeta ibiri eza zaabbu, baazita ha byabo bibiri ebya ha kya ha kifuba ha mukugiro gwakyo ogw'omunda oguherraine n'ekanzu.

²⁰Kandi baakora empeta ezindi ibiri eza zaabbu, baazita omumaiso ha kicweka ekya hansi eky'ebikoba ebibiri ebya ha mabega ag'ekanzu eruguru nambere eteeranira n'omweko gwayo ogukozirwe kurungi.

²¹Bateraniza empeta ez'ekya ha kifuba n'ez'ekanzu nibazibohesa omudalizo ogwa kaneke, nukwo biikale bikwatiire ha mweko ogurukirwe kurungi nkooku MUKAMA akaba aragiire Musa.

²²Hanyuma baakora busuuti ey'okugereka ha kanzu, yoona ekozirwe omu rugoye rwa kaneke.

²³Ebikya bya busuuti byasisanaga n'ebikya by'ekanzu, byona bikugiirwe, nukwo bireke kutemuka.

²⁴Ha ntege zaayo, baakoraho ebijwenge eby'ehuuzo za kaneke, kahukya n'erukugaajuka, n'eby'ehuuzo eya kitaani ezinyakurangirwe kurungi.

²⁵Baayongera baakora enjogera eza zaabbu, baazita ha ntege za busuuti kugyehinguliriza;

²⁶buli njogera n'ekuratwa ekijwenge, kumarrayo kimu entege za busuuti ey'okuheererezaamu, nkooku MUKAMA akaba aragiire Musa.

²⁷Kandi baayongera baakorra Arooni n'abatabani ekooti eza kitaani ezinyakurukirwe kurungi;

²⁸ekitambaara ekya ha mutwe ekya kitaani enungi; enkofiira eza kitaani enungi, n'empale eza kitaani enyakurukirwe kurungi.

²⁹Omweko ogwa kitaani enyakurukirwe kurungi gwatebwamu omanyumizo ag'ehuuzo eza kaneke, kahukya n'ezirukugaajuka; amanyumizo ago bakagatamu n'engaro nkooku MUKAMA Ruhanga akaba aragiire Musa.

³⁰Baakora ekirahule ekya zaabbu enungi ekyokuta ha kondo erukwera baakihandiikaho ebigambo nkooku basarura emanyikirizo. Ebigambo ebi nibyo binu: “Nikyeera hali MUKAMA”

³¹Baakibohaho omudalizo ogwa kaneke kukigumiza ha kitambaara ekya ha mutwe nkooku MUKAMA akaba aragiire Musa.

³²Omulimo ogw'okwombeka Eheema ya MUKAMA, Eheema ey'okutangatanganiramu nukwo gwahoire guti; abantu ba Isirairi baakora byona MUKAMA ebi akaba aragiire Musa.

³³Baaleta Eheema ya MUKAMA omwa Musa, Eheema n'ebikwato byayo byona, ebikwaso, embaaho zaayo, emigamba yayo, enyomyo zaayo, n'obucuba bwayo.

³⁴Baaleeta ekisweko kyayo, eky'empu ez'entaama empaya n'ez'embuzi ezinyakuhazirwe, enyigamo ey'okukinga;

³⁵esanduuko ey'endagaano n'emango zayo hamu n'ekitebe eky'okuganyirirraho.

³⁶Bakongera baaleta emeeza n'ebikwato byayo byona, omugaati ogw'okwoleka;

³⁷ekikondo eky'etaara ekya zaabbu enungi, n'etaara zakyo ez'okukitaho, na byona ebinyakukikoraho n'amagita ag'okuhemba.

³⁸Bayongeraho itambiro erya zaabbu, amagita aganyakuseeswaho abantu n'ebintu eby'okwezibwa, eseeta erukuboya kurungi, orukingyo orw'omulyango ogw'Eheema;

³⁹itambiro ery'omulinga n'ekitimba kyalyo eky'omulinga, emigamba yalyo na byona ebinyakukwatirwaho nk'ebbeseni n'ekituuti eky'okugiteekamu.

⁴⁰Baaleta engoye ez'okuhanika ha nyomyo z'ezigati, obucuba bwazo, orukingyo orw'itambiro ery'ezigati, obuguha bw'Eheema n'ebikondo byayo, ebintu byona ebinyakwetaagwa ha mulimo ogunyakukorwa omu Heema, n'ebinyakwetaagwa omu Heema ey'okutangatanganiramu.

⁴¹Baamalirra nibaleeta ebijwaro ebinyakukozirwe kurungi eby'okuheererezaamu omu Kiikaro Ekirukwera Arooni nyakatagara n'abatabani be ebi bajwara nibakora omulimo ogw'obunyakatagara.

⁴²Abantu ba Isirairi bakakora byona nkooku MUKAMA akaba aragiire Musa.

⁴³Musa yayekebiija ebintu byona kandi yarora nkooku abantu bakaba bahikiriize omulimo MUKAMA akaba aragiire. Nubwo Musa yabaha omugisa.