Read Runyoro - rutooro Kurug 4 Bible Online

Kurug 4 - Runyoro - rutooro bible

Kurug 4

¹Musa yagarukamu ati: “Baitu, tibarukwija kunyikiriza rundi kuhurra ebi ndukugamba, habwokuba nibaija kugamba bati: ‘MUKAMA atakubonekere.’ ”

²MUKAMA yamukaguza ati: “Eki kiki eky'okwasire?” Musa yagarukamu ati: “Mwigo.”

³MUKAMA yamuragira ati: “Gunage hansi.” Musa obu yagunagire hansi, gwafooka njoka, Musa yagiiruka.

⁴Baitu MUKAMA yaragira Musa ati: “Gorra omukono gwawe, ogikwate omukira.” Musa yagorra omukono gwe, yagikwata, obu yagikwasire, yagaruka yafooka mwigo,

⁵MUKAMA Ruhanga yamugamba ati: “Eki nikyo abaana ba Isirairi balimanyiraho Ruhanga owa baisenkurubo, Ruhanga owa Abburahamu, owa Isaaka kandi Ruhanga owa Yakobbo nkooku nuwe yakubonekiire.”

⁶MUKAMA Ruhanga yayongera yaragira Musa ati: “Omukono gwawe gwete ha kifuba, omunda y'ekijwaro kyawe.” Musa yagutayo, obu yagwihireyo, yasanga gwijwire ebigenge, guhindukire erangi.

⁷Ruhanga yayongera yaragira Musa ati: “Omukono gwawe, garuka ogwete ha kifuba, omunda y'ekijwaro kyawe.” Musa yayongera yagutayo, obu yagwihireyo, gukaba guhindukire, nigusisana omubiri gwe ogundi gwona.

⁸Ruhanga yagamba ati: “Obu batalikwikiriza, rundi obu batalinanukira eky'amahano eky'okubanza, balinanukira ekya kabiri,

⁹eby'amahano ebi ebibiri obu bitalibananura, rundi obu balyanga kuhurra eby'orukugamba, otahe amaizi ag'ekyambu Nairo, ogaseese ha itaka eryomere, amaizi ag'olitaha, galifooka sagama ha itaka eri eryomere.”

¹⁰Baitu Musa yagambira MUKAMA Ruhanga ati: “Mukama wange, nyowe tinkabaga muntu abaza kurungi omu bwomeezi bwange, Kandi noobwakubaire hati obw'orukubaza na nyowe, kandi njamajama.”

¹¹Nubwo MUKAMA Ruhanga yamugambira ati: “Nooha anyakugambisa omuntu? Nooha anyakumufoora kateta rundi kiigara? Nooha anyakumufoora kihimbaara? Tininyowe MUKAMA Ruhanga?

¹²Hati nu, genda, nyowe ndakukoonyera, nkwegese ebi olibaza.”

¹³Musa yagamba ati: “Ai MUKAMA wange, nkwesengeriize, otume omuntu ondi.”

¹⁴Nubwo MUKAMA Ruhanga yabiihirirwa Musa yagamba ati: “Tonyina mugenzi wawe Arooni Omuleevi? Mmanyire nkooku asobora kubaza kurungi; nguli, naija kukutangaana, obu araakurora, naija kusemererwa n'omutima gwe gwona.

¹⁵Baza na uwe, omugambire ebi alibaza; nyowe ndiba na iwe kandi mbe nawe mbegese ebi mulikora.

¹⁶Nuwe alikubaliza n'abantu; kandi iwe hali uwe oliba nka Ruhanga we.

¹⁷Twara omwigo gunu, ogu oraakozesaaga eby'amahano.”

¹⁸Musa yagaruka hali Yesero isezaara yamugambira ati: “Nkwesengeriize, nyikiriza ngaruke hali beene baitu omunsi Misiri, ndole obu baraaba bakyali boomeezi.” Yesero yamugarukamu ati: “Genda n'obusinge.”

¹⁹MUKAMA Ruhanga yagambira Musa akyali Midiani ati: “Garuka Misiri; habwokuba abantu boona abaaserraga kukwita, bafiire.”

²⁰Musa yakwata mukazi we n'abatabani, yabatembya ha nkaina yagaruka omunsi Misiri; yagenda akwasire omwigo gwa Ruhanga.

²¹MUKAMA Ruhanga akagambira Musa ati: “Obu oraagaruka Misiri, cwa amagezi gawe goona kukorra omumaiso ga Faraaho eby'amahano byona ebi nakuhaireho obusobozi; baitu ninyija kugumanganiza omutima gwe, aleke kwikiriza abantu kugenda.

²²Ogambire Faraaho oti: ‘Binu nibyo bigambo MUKAMA Ruhanga ebi agambire: Isirairi, nuwe mutabani wange omuzigaijo.

²³Hati ninkuragira ikiriza mutabani wange, agende ampeereze, obu otaamwikirize akagenda, omanye nkooku ndukwija kwita mutabani wawe omuzigaijo.’ ”

²⁴Obu bakaba bali nambere baagonyere, bali omu muhanda nibagenda Misiri, MUKAMA Ruhanga yaizira Musa, nagonza kumwita.

²⁵Zipora yakwata ekyaasi eky'ibaale ekinyakutoire, yasara ekisusu eky'omubiri gw'omwana we, yakikwatisa ha bigere bya Musa naagamba ati: “Mazimakwo, hati waba iba-nyowe ow'esagama.” MUKAMA Ruhanga yaleka Musa,

²⁶Habwokuba kumukoraho kabi, aho Zipora nikyo yagambiire ati: “Oli mugole wange w'esagama, habw'okusarwa.”

²⁷MUKAMA Ruhanga akagambira Arooni ati: “Genda omwirungu, oitirane Musa.” Nubwo yagenda, yamusanga ha rusozi rwa Ruhanga, yamunywegera.

²⁸Musa yagambira Arooni ebigambo bya MUKAMA Ruhanga ebi yamuragiire kugamba, n'eby'amahano byona ebi yamuragiire kukora.

²⁹Musa na Arooni baagenda, baasorooza abakuru b'enganda zoona eza Isirairi.

³⁰Arooni yabaza ebigambo byona, MUKAMA Ruhanga ebi yaragiire Musa, kandi yakora eby'amahano mu maiso g'abantu.

³¹Abaisirairi baikiriza; kandi obu baahuliire nkooku MUKAMA Ruhanga arukubataho omutima, nkooku arozire omuhito gwabo, bainama, baaramya.