Read Runyoro - rutooro Kurug 40 Bible Online

Kurug 40 - Runyoro - rutooro bible

Kurug 40

¹MUKAMA yaragira Musa ati:

²“Ha kiro eky'okubanza eky'okwezi okw'okubanza, oyemereze Enju yange eyokwikaramu, niyo Eheema ey'okutangatanganiramu.

³Otemu esanduuko ey'endagaano egi, ogisiikirize n'enyigamo.

⁴Otahyemu emeeza, otekanize ebintu ebikozesebwa omu biikaro byabyo, otahyemu ekikondo eky'etaara, oteho etaara zakyo.

⁵Itambiro erya zaabbu ery'okucumiikirirraho obubbani olite omumaiso ag'esanduuko ey'endagaano, ohanike orutimbe omu mulyango ogw'Eheema ey'okutangatanganiramu.

⁶Omumaiso ag'Eheema ey'okutangatanganiramu, oteho itambiro ery'okwokezaaho ebihongwa.

⁷Hagati y'itambiro n'Eheema ey'okutangatanganiramu, oteho ebbeseni, ebbeseni egi ogitemu amaizi.

⁸Otegeke ezigati, obyale enyomyo, ohanike orutimbe rukinge irembo ly'ezigati.

⁹Okwate amagita aganyakuseeswa ha bantu na ha bintu eby'okwezibwa, ogaseese ha Heema na ha byona ebinyakurumu, ogyeze n'ebintu byayo byona, ebe kintu ekirukwera.

¹⁰Oseese amagita ha itambiro ery'okwokezaaho ebihongwa kandi ogaseese na ha bintu byalyo byona, oyeze itambiro libe kintu kirukwera mali.

¹¹Oseese amagita ha bbeseni na ha kituuti kyayo, ogyeze.

¹²Hanyuma, oleete Arooni n'abatabani ha mulyango ogw'Eheema ey'okutangatanganiramu, oboogye n'amaizi.

¹³Arooni omujweke ebijwaro ebirukwera, omuseeseho amagita omweze, nukwo ampeereze naakora omulimo ogw'obunyakatagara.

¹⁴Oleete batabani be obajweke ekooti,

¹⁵obaseeseho amagita nkooku ogasesireho ise bo, nukwo na bo bampeereze nibakora omulimo ogw'obunyakatagara. Okuseeswaho amagita oku, kulibaha obusobozi obw'okuhereza omu bunyakatagara okutalihwaho ebiro byaabo byoona.”

¹⁶Musa nukwo yakozire ati, byona ebi MUKAMA yamuragiire.

¹⁷Omu kwezi okw'okubanza okw'omwaka ogwa kabiri barugire Misiri, ha kiro ekirukubanza eky'okwezi, nikyo Eheema yasimbiirweho.

¹⁸Musa yabyara obucuba, yasimbamu embaaho, yarabyamu emigamba yayemereza Eheema.

¹⁹Yayanjurra Eheema yagisweka ekisweko kyayo nkooku MUKAMA akaba amuragiire.

²⁰Yakwata endagaano yagita omu sanduuko, yasomeka emigamba omu mpeta zaayo, yataho ekitebe eky'okuganyirirraho.

²¹Esanduuko yagitahya omu Heema, yataho enyigamo ey'okusiikiiriza esanduuko, yagisiikiriza nkooku MUKAMA yaragiire Musa.

²²Yata emeeza omu Heema ey'okutangatanganiramu, ha rubaju orw'emoso orw'Eheema, aheeru y'enyigamo.

²³Yateekaniza kurungi emigaati, yagita omumaiso ga MUKAMA nkooku MUKAMA akaba amuragiire.

²⁴Yata ekikondo eky'etaara omu Heema ey'okutangatanganiramu, ha rubaju orw'obulyo orw'Eheema.

²⁵Yahanika etaara omumaiso ga MUKAMA, nkooku MUKAMA akaba amuragiire.

²⁶Yata itambiro erya zaabbu omu Heema ey'okutangatanganiramu omumaiso g'enyigamo;

²⁷yacumiikirirraho obubbani oburukuboya kurungi, nkooku MUKAMA akaba amuragiire.

²⁸Yahanika orukingyo omu mulyango gw'Eheema.

²⁹Yata itambiro ery'okwokezaaho ebihongwa ha mulyango gw'Eheema, niyo Eheema ey'okutangatanganiramu, yahongeraho ebihongwa eby'okwokya, n'ebihongwa eby'ebyokulya nkooku MUKAMA akaba amuragiire.

³⁰Hagati y'Eheema ey'okutangatanganiramu n'itambiro, yataho ebbeseni, yagitamu amaizi ag'okunaaba.

³¹Amaizi ago, nugo Musa, Arooni hamu n'abatabani baanaabaga engaro n'ebigere,

³²obu baabaga nibagenda omu Heema ey'okutangatanganiramu. Kandi obu baabaga nibairirra itambiro, banaabaga nkooku MUKAMA akaba aragiire Musa.

³³Yategeka ezigati, yabyara enyomyo okwehinguliriza Eheema n'itambiro yahanika orutimbe omu irembo ly'ezigati. Musa nukwo yamaliriize ati omulimo ogu.

³⁴Kandi ekicu kyasweka Eheema ey'okutangatanganiramu, Eheema yaijura ekitiinisa kya MUKAMA.

³⁵Musa tiyasobora kutaaha omu Heema ey'okutangatanganiramu, habwokuha ekicu kikaikara kigiswekere.

³⁶Ekicu obu kyarugaga ha Heema, Abaisirairi nubwo bayeyongeraga kugenda omumaiso omu ngendo zaabo zoona.

³⁷Baitu ekicu obu kitarugaga ha Heema, tibaasoboraga kugenda omumaiso okuhikya ha kiro eki kyarugirahoga.

³⁸Habwokuba omu ngendo zaabo zoona, ekicu kya MUKAMA kyaikaraga ha Heema omu bwire bwa nyamusana, kandi kyayakwamuga omurro omu bwire bw'ekiro, omumaiso g'abantu boona aba Isirairi.