Read Runyoro - rutooro Kurug 5 Bible Online

Kurug 5 - Runyoro - rutooro bible

Kurug 5

¹Hanyuma Musa na Arooni bakagenda hali Faraaho baamugambira bati: “MUKAMA Ruhanga wa Isirairi naagamba ati: ‘Ikiriza abantu bange bagende omwirungu, bankorre obugenyi.’ ”

²Baitu Faraaho yagamba ati: “MUKAMA Ruhanga ki ogu, ou nsemeriire kuhurra, nkaikiriza Abaisirairi kugenda? Nyowe, MUKAMA Ruhanga ogu timmumanyire, kandi ekindi, tindukwija kwikiriza Abaisirairi kugenda.”

³Nubwo baagarukiremu bati: “Ruhanga ow'Abahebburaayo, atutumiire naatweta, hati otwikirize tugende omwirungu, orugendo rw'ebiro bisatu, tuhongere MUKAMA Ruhanga waitu ekyonzira, nasobora kutunagira orufu rundi kutwita n'empirima.”

⁴Baitu omukama wa Misiri yakaguza Musa na Arooni ati: “Kiki ekirukubatwaza abantu mukabaiha ha mirimo yabo? Mugarukeyo!”

⁵Faraaho yagamba ati: “Abantu banu bakanyire muno omunsi, ky'amahano kurora nimugonza kubaiha ha mirimo yabo.”

⁶Ha kiro eki kyonka, omukama yaragira abakuru b'emirimo n'abanyaampara b'abantu abo naagamba ati:

⁷“Abantu banu, mutongera kubaha obunyansi obw'okubumbisa amatafaali nkooku mubaire nimukora, mubaleke bagende babweserurre bonka.

⁸Baitu omuhendo ogw'amatafaali ogu babaire nibabumba, nugwo mubalekeho, mutagukeehya naakake, habwokuba bantu bagara; eki nikyo kirukwikara nikibagambisa kiti: ‘Tugende tuhongere Ruhanga waitu ekyonzira.’

⁹Mubahe emirimo eyerukukira kuba y'amaani, niyo bakole, nukwo balekere aho kubiiha ebisuba.”

¹⁰Nubwo abakuru b'emirimo n'abanyaampara b'abantu, baagenzire baabagambira bati: “Faraaho aragiire naagamba ati: ‘Tindukwija kubaha bunyansi.

¹¹Inywe inywenka, mugende mubweserurre hoona ha murakabusanga, kyonka omulimo gwanyu tigurukwija kukeehebwaho naakake.’ ”

¹²Nahabweki, abantu baararanga hoona omunsi Misiri, kuserra embuba ez'okubumbisa amatafaali omu kiikaro ky'obunyansi.

¹³Bakuru b'emirimo baataho muno amaani nibagamba bati: “Omulimo gwanyu gwona, ogwa buli kiro, mugukole nkooku mwakagukoraga obu mukaba nimuheebwa obunyansi.”

¹⁴Bakuru b'emirimo aba Faraaho baabataho Abaisirairi abanyaampara nibagamba bati: “Kiki ekibatangire okuhikiriza omuhendo ogw'amatafaali ogwa ijo rundi ogwekiro kimu nkooku mwakakoraga bwona?”

¹⁵Abanyaampara baagenda hali Faraaho bayetonganaho bati: “Habwaki nokora oti itwe abairu bawe?

¹⁶Titurukuheebwa bunyansi, baitu nibatuhambiriza nibagamba ngu: ‘Tubumbe amatafaali Omuhendo ogwa kara’ Hati dora, abairu bawe tutiirwe kandi kunu abantu bawe bakuru b'emirimo, nubo baina omusango.”

¹⁷Baitu Faraaho yagamba ati: “Muli bagara, muli bagara, nikyo murukwikara nimugambira muti: ‘Tugende! Tugende! Tuhongere MUKAMA Ruhanga waitu.’

¹⁸Hati mugarukeyo mukole, timurukwija kuheebwa bunyansi, kandi nimwija kubumba omuhendo gumu ogw'amatafaali nk'ogu mwaabumbaga.”

¹⁹Abanyaampara Abaisirairi, obu bagaambiirwe abakuru b'emirimo nkooku barukuhambirizibwa kubumba buli kiro omuhendo gumu ogw'amatafaali nk'ogu baabumbaga kara, baamanya nkooku bali omu kabi.

²⁰Obu bakaba nibaruga omwa Faraaho, baasanga Musa na Arooni babategeriize. Abanyaampara baabagambira bati:

²¹“MUKAMA Ruhanga abarole kandi abacwere omusango, habwokuba ninywe mutuleetiire kunobwa Faraaho n'abanyoro be, mubakwasize empirima ey'okutwita.”

²²Nubwo Musa yagarukire hali MUKAMA Ruhanga obwakabiri, yagamba ati: “Ai MUKAMA, habwaki oboneseze abantu banu?

²³Nakaba kwija hali Faraaho, mbaze omu ibara lyawe, abantu banu ababoneseze, kandi iwe, toina kintu na kimu eki okozire kubajuna.”