Read Runyoro - rutooro Kurug 6 Bible Online

Kurug 6 - Runyoro - rutooro bible

Kurug 6

¹MUKAMA Ruhanga yagambira Musa ati: “Hati, noija kurora eki ndaakora Faraaho. Ndaamuhambiriza abaleke bagende, obu ndaamuhambiriza muno, naija kubabinga omunsi ye.”

²Ruhanga yagambira Musa ati: “Ninyowe MUKAMA Ruhanga.”

³Nkabonekera Abburahamu na Isaaka kandi nabonekera Yakobbo ndi RUHANGA ow'obusobozi bwona, baitu ntabagambire, ibara lyange MUKAMA Ruhanga-Anyakubaho.

⁴Kandi nkakora nabo endagaano ey'okubaha ensi Kanaani, ensi ei baikaramuga nibajeerajeera.

⁵Nyongiire nahurra okutaaga kw'abantu ba Isirairi aba Abamisiri baafoire bairu, naijuka endagaano naragaine nabo.

⁶Habweki, Abaisirairi obagambire oti: “Ninyowe MUKAMA Ruhanga, ninyija kubaiha omu mihito murukubonesibwa Abamisiri, mbajune obwiru, mbacunguze obusobozi n'amaani, ninkora eby'amahano.

⁷Ndibafoora bantu bange, ndiba Ruhanga wanyu, obu nubwo mulimanya nkooku ndi MUKAMA Ruhanga wanyu, ayabaihire omu mihito ey'Abamisiri.

⁸Ndibatwara omunsi ei narahiire kuha Abburahamu Isaaka na Yakobbo, ndigibaha ebe nsi yanyu bweremera, nyowe MUKAMA Ruhanga, eki ndikikora.”

⁹Musa, ebigambo ebi yabigambira Abaisirairi, baitu ebi yabagambiire, batabiteho mutima, habwokuba n'omutima ogw'obujune kandi n'okusaalizibwa obwiru.

¹⁰MUKAMA Ruhanga yagambira Musa ati:

¹¹“Genda hali Faraaho omukama wa Misiri omugambire aikirize Abaisirairi baruge omunsi ye.”

¹²Baitu Musa yamugambira ati: “Abaisirairi obu baraaba batarukwikiriza ebindukugamba, kandi Faraaho, nuwe araanyikiriza nyowe omuntu atarukubaza kurungi?”

¹³Ebi, nibyo MUKAMA Ruhanga yaragiire Musa na Arooni, obu akaba naabatuma obukwenda obw'okutwarra Abaisirairi na Faraaho omukama wa Misiri nukwo baihe Abaisirairi omunsi Misiri.

¹⁴Ganu nugo amabara g'abakuru b'enganda za baisenkuru Musa na Arooni; batabani ba Rubbeni omuzigaijo gwa Isirairi. Amabara gaabo: Henoki, Paru, Hezerooni, na Karumi, ebi nibyo bitabu bya Rubbeni.

¹⁵Ganu nugo mabara gabatabani ba Simyoni: Yemyeri, Yamini, Ohadi, Yakini, Zohali, na Sauli ayazairwe omukazi Omunyakanaani, ebi nibyo bitabu bya Simyoni,

¹⁶Ganu nugo mabara gabatabani ba Leevi nkooku baagendaga nibazaarangana: Geresoni, Kohati, na Merali. Leevi akoomeera emyaka kikumi mu asatu na musanju.

¹⁷Ganu nugo mabara ga batabani ba Geresoni: Libuni na Simeyi nkooku bali omu nganda zaabo.

¹⁸Batabani ba Kohati nubo banu: Amuraamu, Izali, Hebburoni na Uzeeri, Kohati akoomeera emyaka kikumi mu asatu n'esatu.

¹⁹Ganu nugo mabara ga batabani ba Merali: Mahiri na Muusi, binu nibyo bitabu by'Abaleevi nkooku baagenzire nibazaarangana.

²⁰Amuraamu akaswera Yakobedi isenkati, yamuzaaraho abatabani babiri: Arooni na Musa. Amuraamu akoomeera emyaka kikumi mu asatu na musanju.

²¹Amabara ga batabani ba Izali nugo ganu: Kora, Nefeegi na Zikiri.

²²Kandi amabara aga batabani ba Useri nugo ganu: Misairi, Erizafaani na Sitiri.

²³Arooni akaswera Eriseba muhara w'Aminadabbu munyanya Nahasooni, yamuzaaraho abaana bbana, amabara gaabo nugo ganu: Nadabu, Abihu, Eryezeri na Itamara.

²⁴Amabara ga batabani ba Kora nugo ganu: Asiri, Erikaana, Abiyasafu. Ebi nibyo bitabu bya batabani ba Kora.

²⁵Eryezeri mutabani w'Arooni, akaswera omu ha bahara ba Puteeri, yamuzaaraho Finehaasi. Ago nugo mabara ga baisenkuru, ebitabu by'Abaleevi nkooku bazaarangana.

²⁶Arooni na Musa banu, nubo MUKAMA Ruhanga yagambiire ati: “Mwihe Abaisirairi Misiri, nk'ebika eby'enganda zaabo oku biri.”

²⁷Abo abaagambiire Faraaho omukama wa Misiri ha kigambo eky'okwiha Abaisirairi omunsi Misiri, nubo Musa na Arooni bonyini.

²⁸Ha kiro eki MUKAMA Ruhanga yabaliizeeho na Musa omunsi Misiri,

²⁹akamugambira ati: “Ninyowe MUKAMA Ruhanga, byona ebi ndukukugambira, bigambire Faraaho omukama wa Misiri.”

³⁰Baitu Musa yakaguza MUKAMA Ruhanga ati: “Faraaho araanyikiriza ata, nyowe omuntu atabaza kurungi?”