Read Runyoro - rutooro Kurug 7 Bible Online

Kurug 7 - Runyoro - rutooro bible

Kurug 7

¹MUKAMA Ruhanga yagambira Musa ati: “Hati, iwe nakufoora nka Ruhanga hali Faraaho, kandi Arooni owanyoko, nuwe arabazaga omu kiikaro kyawe.

²Gambira mugenzi wawe Arooni byona ebi ndukukuragira, uwe aligambira Faraaho aikirize Abaisirairi baruge omunsi ye bagende.

³Baitu ndigumanganiza omutima gwa Faraaho, noobu ndaakora ebintu bingi kandi n'ebirukuhuniriza omunsi ya Misiri,

⁴talibaikiriza, obu nubwo ndikwataho Misiri, nyoleke obusobozi obw'amaani, nyiheyo abantu bange Abaisirairi, baije bahonderaine nk'enganda zaabo oku ziri.

⁵Obu ndigorra omukono gwange nkakwataho Abamisiri, nkabaihamu abantu bange Abaisirairi, aho nuho Abamisiri balimanyira, nkooku ndi MUKAMA Ruhanga.”

⁶Nubwo Musa na Arooni baakora nkooku MUKAMA Ruhanga yabaragiire.

⁷Akasumi baabaliizemu na Faraaho, Musa akaba ahikize emyaka kinaana ey'obukuru, kandi Arooni ahikize kinaana n'esatu.

⁸MUKAMA Ruhanga akagambira Musa na Arooni ati:

⁹“Faraaho obu arabagamba ati mukole ekyamahano eki ndaabamanyiraho, nubwo oraagambira Arooni oti: Kwata omwigo gwawe, ogunage hansi omumaiso ga Faraaho, nigwija kufooka njoka.”

¹⁰Kandi, Musa na Arooni baagenda owa Faraaho, baakora nkooku MUKAMA Ruhanga yabaragiire, Arooni yanaga hansi omwigo gwe, omumaiso ga Faraaho n'abairu be, gwafooka njoka.

¹¹Faraaho yatuma, beete abantu ab'amagezi n'abaraguzi ba Misiri, nabo habw'amagezi gaabo, baakora nka Arooni eki yakozire.

¹²Buli muntu yanaga hansi omwigo gwe, gwafooka njoka, baitu omwigo gwa Arooni, gwamira eyabo.

¹³Baitu nabwo Faraaho yaikara agumangaine tiyabahuliriza nkooku MUKAMA Ruhanga akaba agambire.

¹⁴Aho MUKAMA Ruhanga yagambira Musa ati: “Faraaho akyagumanganiize omutima gwe, abantu bange abalemiire; nyenkya

¹⁵ogende hali Faraaho obwaraaba naagenda ha kyambu, omulindirre ha musa gw'ekyambu, okwate omwigo ogunyakufookere njoka.

¹⁶Omugambire oti: ‘MUKAMA Ruhanga owa Abahebburaayo akuntumireho naagamba ati: “Oikirize abantu bange bagende bampeereze omwirungu,” baitu okyalemere kuhurra.’

¹⁷MUKAMA agambire ati: “Kinu nikyo oraamanyiraho, nyowe nkooku ndi MUKAMA Ruhanga, omwigo gunu ogu nkwasire omu ngaro, ninyija kuguteeza amaizi ag'ekyambu kinu Nairo gafooke sagama,

¹⁸encu ezinyakurumu zife, ekyambu kinuunke cucucu, kandi Abanyamisiri, tibalisobora kunywa amaizi ag'ekyambu eki.”

¹⁹MUKAMA Ruhanga yayongera yagambira Musa ati: “Gambira Arooni oti: ‘Kwata omwigo gwawe, ogorre omukono gwawe ha maizi goona aganyakuli omunsi Misiri, ha byambu byayo, ha mikura yayo, n'ebiyanja byayo, amaizi g'ebi byona gafooke sagama, Misiri yoona ijule esagama, omu bintu byona ebinyakuleeterwamu amaizi, eby'emiti n'eby'amabaale.’ ”

²⁰Musa na Arooni, baakora nkooku MUKAMA Ruhanga yabaragiire, Arooni yaimukya omwigo gwe, yateera amaizi g'ekyambu, Nairo gafooka sagama.

²¹Encu ez'omu kyambu eki, zaafa, ekyambu kyatandika kununka, Abamisiri baalemwa n'okunywa amaizi gakyo, ensi yoona eya Misiri, yaijura esagama.

²²Abaraguzi ba Misiri nabo habw'amasano gaabo, amaizi baagafoora sagama, habweki, omutima gwa Faraaho gwaikara gugumangaine, tiyaikiriza Musa na Arooni ebi baagambire, nkooku MUKAMA Ruhanga yabaragiire.

²³Faraaho yakubutuka, yagaruka omunju ye, eki nakyo atakiteho mutima.

²⁴Abamisiri boona baalima amaziba okwehiguliriza ekyambu Nairo, nibaserra amaizi ag'okunywa, habwokuba amaizi ag'ekyambu Nairo, bakaba batarukusobora kuganywa.

²⁵Obu hati hakaba haahingwireho ebiro musanju, Mukama amazire kuteera ekyambu Nairo.