Read Runyoro - rutooro Kurug 8 Bible Online

Kurug 8 - Runyoro - rutooro bible

Kurug 8

¹Nubwo MUKAMA Ruhanga yagambira Musa ati: “Genda hali Faraaho omugambire oti: ‘MUKAMA Ruhanga agambire ati: Ikiriza abantu bange bagende bampeereze.

²Obu otaikirize, ensi yawe ninyija kugisaaliza, nindeetamu ebikere.

³Ekyambu Nairo, nikiija kwijurwamu ebikere ebinyakuhinguraine, birugemu biije n'omunju yawe, bitaahe omu kisiika kyawe eki oraaramu, bitembe ha kitabu kyawe, bitaahe omu maju g'abaheereza bawe n'ag'abantu bawe, omu mahiga gawe n'omu bbakuli ezokutugiramu ensaano.

⁴Ebikere birikutemba, bitembe abaheereza bawe, n'abantu bawe boona.’ ”

⁵MUKAMA Ruhanga yagambira Musa ati: “Gambira Arooni oti: ‘Kwata omwigo gwawe, ogorre omukono gwawe ha bisaaru eruguru, ha mikura, ha biyanja, harugemu ebikere biije omunsi Misiri.’ ”

⁶Nubwo Arooni yagorra omukono gwe ha maizi goona aga Misiri. Haarugamu ebikere byasweka ensi.

⁷Abaraguzi aba Misiri nabo habw'amagezi gaabo, baaleeta ebikere omunsi Misiri.

⁸Faraaho nubwo yayesire Musa na Arooni yabagambira ati: “Mwesengereze MUKAMA Ruhanga, nyowe n'abantu bange atujune ebikere ebi, kandi ndaikiriza abantu baanyu bagende bahongere MUKAMA Ruhanga ekyonzira.”

⁹Musa yagamba Faraaho ati: “Ninkusaba ommanyise akasumi aka ndaasaba MUKAMA, nukwo iwe, abaheereza bawe n'abantu bawe, nukwo ebikere bihwerekerezibwe bikurugeho kandi biruge omu maju gawe, bisigale omu kyambu Nairo honka.”

¹⁰Faraaho yagarukamu ati: “Kiro kya nyenkya.” Musa yagamba ati: “Kiraaba nkooku ogambire, aho nuho oraamanyira nkooku hataroho n'omu anyakwingana MUKAMA Ruhanga waitu.

¹¹Ebikere nibiija kukurugaho, biruge omu maju gawe, biruge ha baheereza na ha bantu bawe, nibiija kusigara omu kyambu Nairo honka.”

¹²Nubwo Musa na Arooni baaruga hali Faraaho, baagenda. Musa yayesengereza MUKAMA Ruhanga aiheho ebikere nkooku yaikirraniize na Faraaho.

¹³MUKAMA Ruhanga yakora eki Musa yamusabire, ebikere eby'omu maju, eby'omu zigati n'omu bwerre byona byafa byahwaho.

¹⁴Abantu baabisorooza baabituuma entuumo, ensi yoona yanunka yataamirana.

¹⁵Baitu Faraaho obu yaboine ahuumuzibweho, yagumanganiza omutima, yayanga kuhurra Musa na Arooni nkooku MUKAMA Ruhanga akaba agambire.

¹⁶Nubwo MUKAMA Ruhanga yagambiire Musa ati: “Gambira Arooni oti: ‘Gorra omwigo gwawe otere ecuucu eya hansi, erugwemu emibu, ijule ensi yoona eya Misiri.’ ”

¹⁷Musa na Arooni baakora nkooku Mukama yabagambiire. Arooni yagorra omukono gwe ogukwasire omwigo, yateera ecuucu eya hansi haarugamu emibu, yabibika abantu n'ebisoro, ecuucu yoona eya hansi yafooka mibu, yaijura ensi yoona Misiri.

¹⁸Abaraguzi nabo, baalengaho kukora amasano gaabo, baitu tibaasobora.

¹⁹Abaraguzi baagamba Faraaho bati: “Kinu Ruhanga nuwe akikozire.” Baitu omutima gwa Faraaho gwaikara gugumangaine, yayanga kubahurra, nkooku MUKAMA Ruhanga akaba agambire.

²⁰Nubwo MUKAMA Ruhanga yagambira Musa ati: “Imuka nyenkya kara olindirre Faraaho ha muhanda, obu araaba nagenda ha kyambu, omugambire oti: ‘MUKAMA agambire ati: Ikiriza abantu bange bagende bampeereze.

²¹Obu otaikirize abantu bange kugenda, ndaakutwekera emizinga y'ensohera, ngitwekere abaheereza bawe, etaahe omu maju gawe. Amaju g'Abamisiri nigaija kwijura emizinga y'ensohera omu buli kaikaro koona omuntu h'arukuta ekigere,

²²baitu ha kiro eki, nditantara Goseni ekicweeka ky'ensi nambere abantu bange baikara, tihalibayo mizinga y'ensohera, nukwo mumanye ngu ninyowe MUKAMA Ruhanga anyakwikara omunsi yoona.

²³Nukwo ndibaganiza nti abantu bange na bantu bawe. Ekikorwa eki, kiraabaho kiro kya nyenkya.’ ”

²⁴MUKAMA Ruhanga nukwo yakozire, haija emizinga y'ensohera yataaha omunju ya Faraaho, omu maju g'abaheereza be, n'omunsi yoona eya Misiri, zaasiisa ensi yoona.

²⁵Kandi Faraaho yayeta Musa na Arooni yabagambira ati: “Genda muhongere Ruhanga ekyonzira, baitu mutaruga omunsi enu.”

²⁶Musa yagarukamu ati: “Eki nikiba kitahikire, habwokuba ebyonzira ebi tuhongera MUKAMA Ruhanga waitu, Abamisiri babinuga. Kakuba tuhonga ebyonzira Abamisiri ebi banuga, tukabihonga nabo nibarora bati, tibarukwija kututeera amabaale?

²⁷Tusemeriire kugenda omwirungu, orugendo rw'ebiro bisatu, tuhongere MUKAMA Ruhanga waitu ekyonzira nkooku arukuturagira.”

²⁸Faraaho yagamba ati: “Ninyija kubaikiriza mugende omwirungu mutambire MUKAMA Ruhanga wanyu, kyonka mutagenda hara muno kandi munsabire.”

²⁹Nubwo Musa yagambire ati: “Hati nakurugaho nagenda, ninyija kukwesengerereza MUKAMA Ruhanga kiro kya hati, ensohera zikurugeho, zirugeho abaheereza bawe kandi zirugeho abantu bawe, kimu kyonka, otongera kutubiihabiiha okanga kwikiriza abantu kugenda kuhongera MUKAMA Ruhanga ekyonzira.”

³⁰Nubwo Musa yaruga hali Faraaho, yagenda kwesengereza MUKAMA Ruhanga.

³¹MUKAMA Ruhanga yakora nkooku Musa yasabire, yaihaho Faraaho emizinga y'ensohera, yagiihaho abaheereza be kandi yagiihaho abantu be, hatasigale nsohera n'emu.

³²Baitu Faraaho omurundi gunu, nabwo yagumanganiza omutima gwe, tiyaikiriza abantu kugenda.