Read Runyoro - rutooro Kurug 9 Bible Online

Kurug 9 - Runyoro - rutooro bible

Kurug 9

¹MUKAMA Ruhanga yagambira Musa ati: “Genda hali Faraaho omugambire oti: ‘MUKAMA Ruhanga owa Abahebburaayo agambire ati: Ikiriza abantu bange bagende bampeereze.

²Obwotaabaikirize kugenda okaikara nabo,

³omukono gwa MUKAMA Ruhanga nigwija kunaga orufu orw'amaani ha magana gaawe agali omu bwerre: embaraasi, enkaina, engamiya, ente n'embuzi.

⁴Baitu MUKAMA Ruhanga naija kwoleka embaganiza ha magana g'Abaisirairi n'Abamisiri, busaho kisoro na kimu eky'Abaisirairi ekiraafa.’ ”

⁵MUKAMA Ruhanga yataho akasumi naagamba ati: “Kiro kya nyenkya, nubwo ndakora ekintu kinu omunsi.”

⁶Kandi obu bwakiire, MUKAMA yakora nkooku yagambire, amagana goona aga Misiri gaafa, baitu ha g'Abaisirairi, hatafeeho kintu na kimu.

⁷Faraaho yakaguliiriza, baamugambira nkooku hatafiire kisoro na kimu eky'Abaisirairi. Baitu omutima gwa Faraaho gwaikara gugumangaine, tiyaikiriza Abaisirairi kugenda.

⁸MUKAMA Ruhanga yagambira Musa na Arooni ati: “Mwihe omu kyoto ebihi by'iju, Musa alimiise haiguru, Faraaho aroleriire.

⁹Niriija kufooka cuucu enyakuniinuukire, esweke ensi yoona eya Misiri, nukwo erugwemu ebizimba ebirukucweka ebihooya, bikwate abantu n'ebisoro omunsi yoona eya Misiri.”

¹⁰Musa na Arooni baiha iju omu kyoto, baayemerra omumaiso ga Faraaho, Musa yalimiisa haiguru, lyarugwamu ebizimba ebyakwasire abantu n'ebisoro, byaacwekwa ebihooya.

¹¹Abaraguzi batasobole kuhakaniza Musa habw'ebizimba, habwokuba nabo bikabakwata kandi byakwata Abamisiri boona.

¹²Baitu MUKAMA Ruhanga akagumanganiza omutima gwa Faraaho, tiyabaikiriza, nkooku MUKAMA yagambiire Musa.

¹³MUKAMA Ruhanga yagambira Musa ati: “Imuka nyenkya kara oyemerre omumaiso ga Faraaho omugambire oti: ‘MUKAMA Ruhanga owa Abahebburaayo agambire ati: Ikiriza abantu bange bagende bampeereze.

¹⁴Habwokuba murundi gunu, maliriire kukuha ebifubiro byange byona, bikusaalize, bisaalize abaheereza bawe n'abantu bawe, nukwo omanye omunsi yoona nkooku hatarumu muntu n'omu anyakunyingana.

¹⁵Kakuba omukono gwange nagwimukize nkakuteeza orufu, nkaruteeza n'abantu bawe, oba otakyali omunsi.

¹⁶Baitu kinu nikyo nakulekireho, nkwoleke obusobozi bwange, nukwo ibara lyange liraanganwe omunsi yoona.

¹⁷Nahati hoona, noyenyumiza hali abantu bange, torukubaikiriza kugenda.

¹⁸Habweki, nyenkya omu kasumi nka kanu, ninyija kunaga hansi orubaale rwingi muno kandi orw'amaani orutakabahoga omunsi Misiri yakaba kuhangwa kuhika na hati.

¹⁹Hati bunu, tuma abantu batabarre amagana gaawe, na buli kintu kyona eki oinakyo, ekinyakuli omu bwerre, babitahye omu biikaro nambere biraikara n'obusinge. Habwokuba orubaale nirwija kuteera abantu n'ebisoro byona ebinyakuli omu bwerre, ebisoro ebitaleesirwe omuka, byona nibiija kufa.’ ”

²⁰Abamu ha bantu ba Faraaho, abaatiinire habw'okuhurra ekigambo kya MUKAMA Ruhanga baataahya ebisoro byabo omu maju.

²¹Baitu abo abatarataire mutima ha kigambo kya MUKAMA Ruhanga baaleka abairu n'ebisoro byabo omu bwerre.

²²MUKAMA Ruhanga yagambira Musa ati: “Imukya omukono gwawe, ogwoleke haiguru, hagwe orubaale omunsi yoona eya Misiri, ruteere abantu, ebisoro n'ebimera byona ebinyakuli omu bwerre, rumaleho ensi yoona eya Misiri.”

²³Nubwo Musa yaimukize omukono gwe, yagwoleka haiguru, MUKAMA Ruhanga yabbarukya enkuba, yanaga orubaale, emirabyo yamulikya kuhika hansi, Misiri.

²⁴Haagwa orubaale orunyakurumu emirabyo etarukulekerra, orubaale orw'amaani, orutakabahoga omunsi Misiri yakaba kuhangwa.

²⁵Orubaale rwasensebura ebintu byona ebikaba biri omu bwerre, omunsi yoona eya Misiri, rwateera abantu n'ebisoro, rwacwacwana ebimera byona eby'omu bwerre, rwakoonora emiti yoona.

²⁶Omunsi Goseni honka nambere Abaisirairi bakaba bali, nuho hataragwire rubaale.

²⁷Faraaho yatuma bamwetere Musa na Arooni, yabagambira ati: “Murundi gunu, nsobeze, MUKAMA Ruhanga ahikize okukora ekintu nka kinu, nyowe n'abantu bange, nitwe twasobeze.

²⁸Mwesengereze MUKAMA Ruhanga, aculeeze enkuba zinu, akiise orubaale, ndaabaikiriza mugende, timurukwija kwongera kwikara hanu.”

²⁹Musa yagamba Faraaho ati: “Obu ndaaba ninkyaruga omu rubuga nti, ndaimukiza MUKAMA Ruhanga emikono, mmusabe, enkuba ziculeere, orubaale tirwayongere kugwa, nukwo omanye ensi enu nkooku eri ya MUKAMA Ruhanga.

³⁰Baitu iwe n'abantu bawe, nimmanya timukabaire kutiina MUKAMA Ruhanga waitu.”

³¹Ebimera nk'obugoigo na Sayiri bikahwerekerezibwa, habwokuba Sayiri ekaba eteekere, kandi obugoigo bukaba busanswiire.

³²Baitu engano eya butoosa n'egi enyakulimwa hansozi, etasiisikale, habwokuba ekaba etakatungurwire.

³³Musa yaruga omumaiso ga Faraaho, yaturuka orubuga, yaimukiza MUKAMA Ruhanga emikono, enkuba zaaculeera, orubaale rwakya, enjura tiyayongera kufukumuka omunsi.

³⁴Faraaho obuyarozire enjura nyamwingi yakya, orubaale n'enkuba biculiire, yayongera kusiisa, yagumanganiza omutima, uwe n'abaheereza be.

³⁵Omutima gwa Faraaho nukwo gwagumangaine guti tiyaikiriza Abaisirairi kugenda, nkooku MUKAMA Ruhanga yamugambiire naamutumira Musa.