Read Runyoro - rutooro Yob 10 Bible Online

Yob 10 - Runyoro - rutooro bible

Yob 10

¹“Obwomeezi bwange buntamire ka mbalize kimu byona ebirukunsaaliza; ka mbaze byona ebirukunsaaliza omwoyo.

²Ndaagambira MUKAMA nti otansingisa omusango; ngambira eki orukunjunaana.

³Kikusemeriire kuba w'obukaya oburukusisa buti? Kugaya iwe wenka eki wakozire? Okasiima entegeka ey'abantu ababi?

⁴Iwe oina amaiso ag'enyama? Na iwe orora nkooku omuntu arora?

⁵Ebiro byawe, bingana ebiro by'omuntu, rundi emyaka yawe ingana ey'omuntu,

⁶nikyo osigikiraho kuseruuliriza obubi bwange n'okurondereza ekibi kyange?

⁷Noobu oraaba noomanya nkooku ntaina musango, kandi nkooku hataroho noomu asobora kwiha omuntu omu mukono gwawe?

⁸Emikono yawe niyo yambumbire, niyo yankozire; kandi hati niiwe oranyeforra ompwerekereze?

⁹Oijuke, nkooku ali niiwe wankozire omu ibumba; kandi nooyenda kungarra omu cuucu?

¹⁰Niiwe wampaire ise nyowe; wankuliza omunda ya mau.

¹¹Niiwe wampaire oruhu n'enyama, niiwe wanteeraniize n'amagufa n'ebinywa.

¹²Niiwe wampaire obwomeezi n'engonzi nyingi; kuntaho omutima kwawe, nukwo kwanteekere.

¹³Ebintu ebi okabiikaza ha mutima; mmanyire egi nkooku yabaire ntegeka yawe.

¹⁴Obu nsobya obyetegereza, baitu tonyihaho bubi bwange.

¹⁵Obu ndaaba ndi mubi, ndikibona! Obu nkora ebihikire, eki tikindeetera kitiinisa, habwokuba ninkora ebitahikire bingi, kandi nindora omuhito gwange.

¹⁶Kakuba nyenyumiza, waakumpiigire nk'entale, ogaruka onkoraho ebihuniriza;

¹⁷niiwe onteeraho bakaiso bawe abahyaka, kandi ogenda nooyeyongera kunkwatirwa ekiniga.

¹⁸Niiwe ondeetera amahe amahyaka ag'okundwanisa; ai Ruhanga, habwaki wanyikiriize kuzaarwa?

¹⁹Haa boojo, kakuba nafiire ntakaboinwe muntu noomu nkasisana nk'atazairwe, obu nkubaire nimara kuzaarwa, ninziikwa.

²⁰Obu kutagirwa tinfiire? Ndeka, mpuumuleho,

²¹ntakagenzire nambere ntaliruga, oku ensi enyakwikarwamu ekiho n'omwirima kasira,

²²ey'ekiho kandi etarumu kutereekerra, nambere ekyererezi kisisana omwirima.”