Read Runyoro - rutooro Yob 12 Bible Online

Yob 12 - Runyoro - rutooro bible

Yob 12

¹Hanyuma Yobbu yagarukamu ati:

²“Niinywe bantu malimali, kandi obu mulifa nago, amagezi ganyu.

³Baitu na nyowe ninyetegereza nka inywe; timurukunkira, nooha atamanyire bintu nka binu?

⁴Ndi kisekwa hali bagenzi bange; nyowe, ayayesire Ruhanga yangarukamu, nyowe omwinganiza kandi omuntu ataina kamogo, ninyowe arukwetwa kisekwa.

⁵Anyakuli kurungi, agaya anyakugwerwa akabi; akabi kaikara kasungamirize abo abaterebuka.

⁶Baitu abasuma n'abatatiina Ruhanga bagwagwaine, kandi kunu Ruhanga wabo nugo amaani gaabo.

⁷Baitu kaguza enyamaiswa, niziija kukwegesa; kaguza enyonyi ez'omu mwanya, niziija kukusubirra;

⁸rundi ebimera eby'omunsi, nabyo nibiija kukwegesa; noobwakubaire encu ez'omu nyanja, niziija kukuragirra.

⁹Omu banu boona, nooha atamanyire; kinu nkooku kyakozirwe Ruhanga?

¹⁰Nuwe akwatiriire buli kintu kyona ekyomeezi, kandi nuwe ayomeeza abantu boona.

¹¹Okutu nkooku kuhurra ebigambo, orulimi narwo tinukwo ruhurra obunuzi bw'ebyokulya?

¹²Abantu abakuru nubo baba n'amagezi kandi okwikara ira, kuzaara obwetegereza.

¹³Ruhanga nuwe aina amagezi n'amaani, aina okumanya n'okwetegereza.

¹⁴Kakuba aseesa enju, busaho noomu asobora kugaruka kugiimukya; kakuba akingiramu omuntu, busaho noomu asobora kumukingurra.

¹⁵Obu atanaga enjura, ensi eyoma; baitu obu aginaga, esandaara amaizi.

¹⁶Nuwe agira amaani n'amagezi; kibiihwa bisuba n'embiihi y'ebisuba nabo be.

¹⁷Abahi b'amagezi abatwara batajwaire, abaramuzi abafoora badoma.

¹⁸Aiha abakama ha bukama, abata omu nkomo. Baanyakatagara abatwara batajwaire,

¹⁹ahwerekereza ab'obusobozi.

²⁰Abeesigwa abaima kugamba, amaraho kwetegereza kwabakuru b'abantu.

²¹Agaya ab'obusobozi aihaho abalemi.

²²Amulikira ebiikaro ebirumu omwirima kasira, omwirima ogu agufoora kyererezi.

²³Anyeesa amahanga, kandi agahwerekereza; agalihya amahanga kandi agaihaho.

²⁴Abeebembezi b'abantu abaihaho amagezi, abeenjeeza omu ihamba eritarumu kahanda.

²⁵Baikara nibahumahuma omu mwirima bataina taara; abatwara nibatabaijuka nk'omutamiizi.