Read Runyoro - rutooro Yob 14 Bible Online

Yob 14 - Runyoro - rutooro bible

Yob 14

¹“Omuntu anyakuzaarwa omukazi, aba w'ebiro bike, kandi agira emihito nyingi.

²Ayakya nk'ekyakyo kandi ahotoka; airuka nk'ekiituuru kandi ahwaho.

³Omuntu nk'ogu omwikazaaho amaiso kandi omuleeta kumutonganiza?

⁴Nooha asobora kwiha ekintu ekirungi omu kintu ekibi? Busaho noomu.

⁵Habwokuba ebiro bye bikategekwa, omuhendo ogw'ameezi ag'aliimara gumanyirwe iwe,

⁶okamuteeraho emitaano ey'atasobora kuguruka, mwiheho amaiso otagaruka kumurolerra, nukwo ayegondeze omu bwomeezi bwe bunu, nk'omupagasi arukukolerra empeera.

⁷“Habwokuba ha muti, habaho okunihira, obu gutemwa, haimukamu gundi, kandi obutaagi bwagwo tibulekerra

⁸omuhama gwagwo noobu gujunda omwitaka, n'ekikunya,

⁹baitu obu guhikwaho amaizi, gusumika, gunaga amataagi nk'ekimera ekito.

¹⁰Baitu omuntu uwe, afa kandi tagaruka kwomeera; omuntu obu acwekana, buli kihoire

¹¹nk'ebyambu oku bireka kugera, kandi enyanja nkooku zooma,

¹²omuntu nukwo afa ati, kandi tagaruka kwemerra; iguru tirihwaho atakaimukire, atakasisiimukire.

¹³Haa, kakuba onserekere nyabuyonga, kakuba onyahwire okuhika obu waakuhoirweho ekiniga, nubwo onteeraho akasumi ak'okunyijuka!

¹⁴Omuntu kakuba afa, aligaruka ayomeere? Ebiro byange byona eby'obuheereza, naakulinzire kuhika obu nakulekirwe.

¹⁵Obu, wakwesire, nanyowe nkugarukamu; obu, waakugondeze nyowe ou wahangire

¹⁶obu waakubazire entambu zange, tiwaakwekebiizire ekibi kyange;

¹⁷wakwebiirwe kimu ekibi kyange, tiwakwijukire obubi bwange.

¹⁸“Habaho akaasumi, orusozi aka rugweramu rukacwekacweka, n'omwandara aka gurugiramu omu kiikaro kyagwo.

¹⁹Amaizi gakukumba amabaale; omugezi gutwara itaka ly'ensi; na iwe nukwo omaraho oti, okunihira kw'omuntu.

²⁰Omusingura ebiro byona, kandi ahwaho ohindura amaiso ge kandi omubingira hara.

²¹Abaana batunga obukuru uwe eki takimanya, bagarurwa hansi, eki takyetegereza.

²²Eki ahurra kiri kimu kyonka, nubwo obusaasi obw'omubiri gwe, n'okuganya ati: ndiba nta nyowe.”