Read Runyoro - rutooro Yob 15 Bible Online

Yob 15 - Runyoro - rutooro bible

Yob 15

¹Erifaazi Omutemaani nubwo yagarukiremu ati:

²“Omuntu ow'amagezi, kimuhikiriire kugarukamu ebigambo eby'obudoma rundi kwerwanirra naabaza ebitahikire?

³Asemeriire kuteera empaka naabaza eby'omugaso rundi naagamba ebigambo ebi atasobora kwihamu akarungi?

⁴Iwe waihiraho kimu okutiina Ruhanga, watanga n'abantu kwegambirra bali omumaiso ge.

⁵Obubi bwawe nibuzookera omu bigambo ebi orukugamba, na iwe nooyenda kubaza ebigambo eby'abacwangya.

⁶Akanwa kawe wenka niko kakucweriire omusango, tali nyowe; ebigambo byawe byonyini nibikurumiriza.

⁷“Nooteekereza, niiwe muntu ayabandize kuzaarwa? Nandiki okaija ensozi itakabaireho?

⁸Oraikaliire omu rukurato rwa Ruhanga? Niiwe orukumukira amagezi?

⁹Omanyire ki, itwe eki tutamanyire? Nooyetegereza ki, itwe eki tutarukusobora kwetegereza?

¹⁰Tukeegesibwa abantu abamezire enju, abaazairwe sso atakazairwe,

¹¹okuhuumuzibwa kwa Ruhanga, rundi ebigambo eby'embabazi arukukubaliza, tibirukukumara?

¹²Habwaki omutima gwawe gukuhabisa handi habwaki olema kuteekaana?

¹³Ekirukuruga omuli eki nukwo kubiihiirirwa Ruhanga n'okugamba ebigambo ebirukusisana biti.

¹⁴Omuntu, n'asobora kusemera omuntu kwonka, ngu ahikiirre hali Ruhanga?

¹⁵Omanye, noobwakubaire abahikiriire ba Ruhanga na bo tibali barungi omumaiso ge; iguru nalyo tirihikiriire omumaiso ge;

¹⁶kaaswa omuntu ogu ekinugwa kandi omubi, omuntu anyakunywa obubi nk'arukunywa amaizi!

¹⁷“Hunda okutu nkugambire; nkutendere ebi naboine.

¹⁸(Abantu abanyamagezi ebi baasubiriire, baisebo ebi bataraserekere,

¹⁹abo bonka abaahairwe ensi, abatararabirwemu munyaihanga.)

²⁰Omuntu omubi aikara naabonabona obwomeezi bwe bwona, nukwo amara ati emyaka yoona eyateerirweho abatagira mbabazi.

²¹Aikara naahurra ebirukumukanga; obu aba naagira busaho kabi, nubwo haija abanyagi.

²²Tanihira nkooku aliruga omu mwirima, aikara ateekanizibwe kulibwa empirima.

²³Aikara naajeera naaserra, ekyaralya naakaguza ati: ‘Ndabiiha nkaha?’ Amanya ekiro eky'omwirima nkooku kimuli haihi.

²⁴Emihito n'obusaasi bimutiinisa; bimusingura nk'omukama ayateekaniriziibwe obulemu,

²⁵eki nikyo kiheebwa omuntu anyakwerengerra Ruhanga, anyakuteeza empaka Ow'obusobozi bwona,

²⁶omuntu ogu aba mwekuza kandi mwemi;

²⁷akwata engabu ye n'okwekuza, agenda kurwanisa Ruhanga. Kandi ayengesa mubijwaro bye.

²⁸Omuntu ogu akaikara omu mbuga ezitarumu bantu, omu maju agatasobora kuraarwamu muntu n'omu, omu maju agaayombekiirwe kukamburwa;

²⁹omuntu ogu taliguudahara, itungo lye tiririikaraho, kandi na uwe wenka ensi taligihangaaramu;

³⁰omwirima taligutabuka; alisisana omuti ogugira amataagi agookebwa omurro, ogugira orwakyo orunyakuhuuhurwa omuyaga.

³¹Aleke kwebiiha naayesiga ebitaroho; habwokuba ebitaroho ebi, niyo eriba mpeera ye.

³²Alisasulirwa kimu akasumi ke katakahikire, alyoma nk'itaagi eritagarukwamu bubisi.

³³Alisisana nk'omuzaabbibbu ogunyakuhoisize nk'omuzaabbibbu ogunyakuragalikize orwakyo.

³⁴Habwokuba abantu abataikiriza Ruhanga basisana engumba kandi omurro ogwokya eheema zenguzi.

³⁵Batwara enda eyitima, bazara okutahikiirra, enda yabo etekaniza obugobya.”