Read Runyoro - rutooro Yob 16 Bible Online

Yob 16 - Runyoro - rutooro bible

Yob 16

¹Nubwo Yobbu yagarukamu naagamba ati;

²Ndahuliire bingi ebirukusisa biti, inywena muli bahuumuza abarukujwahya.

³Ebigambo byawe ebitarumu nibigarukira nkaha?

⁴Na nyowe naakugambire nkainywe, kuba mubaire omu kikaro kyange; naakucikinyize omutwe gwange namagezi, mbasesere ebigambo.

⁵Nyowe naakubagumize n'ebigambo byange kandi okuhumuza kwakanwa kange kwakukeheze obujune bwanyu.

⁶Nobundukugamba, obujune bwange kandi nobundukwigaliriza, nikigasa ki.

⁷Mazimakwo, hati Ruhanga ammazire amaani; abantu bange boona abalekere bonka.

⁸Anyomeze ako nuko karorwaho akarukwoleka nkooku arukundwanisa; nyena nyanukire mpoire ha magufa, abantu nuho barukusigikira kugumya omusango nkooku gurukunsinga.

⁹Ruhanga habw'ekiniga, antaagatagwire yanyiha emyanya; nandoza eriiso ery'enobi; namera obugigo; omunyanzigwa wange nangunurra amaiso.

¹⁰Bampangire amaiso bahuniriire, bantiire empi nibanyehuliirraho. Banyesoroolerizeeho.

¹¹Ruhanga annagiire abantu abatamwikiriza, ankwasize abantu ababi.

¹²Nkaba nyina obusinge, Ruhanga yampendahenda; akankwata ha binywa by'engoto, akampanika, mbe kintu kye eky'okwegeraho kurasa.

¹³Nyena, akandasa emyambi orubaju n'orubaju. Akantematema ensigo tiyanganyira; endurwa yange akagiseesa ha itaka.

¹⁴Akandubadubura yanyehinguliriza; akanjuumbutukira nk'omuserikale anyakuraaliire kwitwa ekiniga.

¹⁵Nyikara ninganya, njwaire eguniya, nyikaliire hanu omu cuucu, nsingirwe.

¹⁶Amaiso gannanasire habw'okurra, ebisigi binzimbire tindukuhweza;

¹⁷kandi kunu ntaina kibi, kandi Ruhanga naasiima okusaba kwange.

¹⁸“Ai iwe ensi, oleke kusereka ebibi ebi bankozire, nyowe arukuserra obwinganiza otanculeeza!

¹⁹Orole, noobwakubaire omu kasumi kanu, kaiso wange ali omwiguru kandi ogu arukunjurra; ali haiguru.

²⁰Enganjani zange nizo zirukungaya, baitu nyowe nindirirra Ruhanga,

²¹Amaizi ag'amaiso gange nugo gantonganirre hali Ruhanga, nkooku omuntu atonganirra mutaahi we.

²²Habwokuba, obu haraahinguraho emyaka nke, ninyija kugenda nambere hagenda abatagaruka.