Read Runyoro - rutooro Yob 17 Bible Online

Yob 17 - Runyoro - rutooro bible

Yob 17

¹Amaani gampoire, nsigaize ebiro bike, ekituuro kintegeriize.

²Mazimakwo, abarukunsekeereza banyehinguliriize, ndoleriire nkooku barukunswahiriza.

³“Iwe wenka oyesimbe habwange; ondi nooha asobora kunyemera?

⁴Nkooku wabaimire amagezi na hati otabaikiriza kunsingura.

⁵Omu nfumo eza ira, omusaija akeetera banywani be sente, abaana be bakahikwaho habw'ekintu eki.

⁶“Anfoire kisekwa ky'amahanga, ninyowe ogu abantu ou barukucwera amacwanta.

⁷Obusaalizi oburukundiza buraaliire kunyita amaiso, emikono n'amaguru; bimpweriire, biri nk'ekiituuru.

⁸Eki nikihuniriza abantu abarungi, ataina musango naayekamba kurwanisa abataikiriza Ruhanga.

⁹Baitu nabwo omuhikiriire aligumira omu muhanda gwe, n'ogu anyakukora ebirungi aliikara naayeyongera amaani.

¹⁰Baitu inywe inywena mwije bwango, omuli inywe toosangemu muntu ow'amagezi.

¹¹Ebiro ebyange bihingwire, ebi nategekere biremere, amasiko gampoire.

¹²Baitu bagenzi bange, ekiro nikyo barukweta nyamusana; nibagamba ngu obwire buli haihi kukya.

¹³Baitu nyowe nimmanya obwange tibukya, obu nserra nyabuyonga, nti niyo nju yange, nkaara ekitabu kyange omu mwirima

¹⁴obu ngambira ekiina nti: ‘Niiwe taata,’ nkagambira munyanya nyowe nti: ‘Niiwe mau,’ rundi enzito?

¹⁵Hati obu, eki ndukunihira nikyo kiraha? Nooha arukurora eki nsemeriire kunihira?

¹⁶Okunihira oku kulisirimuka kuhike ha bihongozo bya nyabuyonga? Tuligenda hamu omu cuucu?”