Read Runyoro - rutooro Yob 18 Bible Online

Yob 18 - Runyoro - rutooro bible

Yob 18

¹Hanyuma Biridaadi Omusuuhi yagarukamu ati:

²“Abantu nka inywe, tibaculeera? Kakuba oculiire okatega okutu, naitwe twakukubaliize.

³Habwaki itwe niturorwa nk'enyamaiswa? Habwaki nituzooka nk'abadoma omumaiso gawe?

⁴Iwe anyakwesaaliza habw'ekiniga, ensi eriirukwamu habwawe, nandiki omwandara guliruga omu kiikaro kyagwo?

⁵“Ego, etaara ey'omuntu omubi eriraara, n'orulimi orw'omurro gwe tirulyaka

⁶eheema ye, eriteebwamu omwirima, kandi etaara enyakuli eruguru baligiraaza.

⁷Entambu ze eziraihire zirikeehebwa, entegeka ze zonka zirimuteera hansi.

⁸Habwokuba ebigere bye byonyini nibyo bimunaga omu mutego, kandi naija kugwa omu buhya.

⁹Omutego gulimukwata akakongoijo endubatira emugumye.

¹⁰Bakamutega omuguha oguserekerwe, bakamutega omutego omu muhanda.

¹¹Obutiini bumuturukire orubaju n'orubaju, bumuroho hoona h'arukugenda.

¹²Yabaga muguuda baitu hati enjara y'okumwita; akabi kamuli ha rubaju kamutegeriize.

¹³Endwara emuliire yamumaraho orususu, omuzigaijo gwa Warufu gumumazireho engingo ze.

¹⁴Eheema ei yayesigaga bagimwihiremu, bamuleesire arole Omukama Warufu!

¹⁵Atali muntu we nuwe aliraara omu heema ye; ekiikaro kye kiriseesererwa obuganga.

¹⁶Hansi, emihama ye eryoma, eruguru, amataagi ge galihotoka.

¹⁷Busaho n'omu aligaruka kumwijuka, taligaruka kumanywa omu muhanda.

¹⁸Alibingwa ey'aboomeezi, alibingwa omu kyererezi ataahe omu mwirima.

¹⁹Omu bantu be, tainamu mwana rundi omwijukuru, kandi nambere yaraaraga, busaho n'omu ayasigaireho.

²⁰Abo aba Bugwaizooba balihunirizibwa ekiro kye, kandi aba Burugaizooba balikwatwa obutiini.

²¹Ego, eki nikyo kyateekaniriziibwe ababi, nikyo kyateeriirweho abo abatamanya Ruhanga.”