Read Runyoro - rutooro Yob 19 Bible Online

Yob 19 - Runyoro - rutooro bible

Yob 19

¹Nubwo Yobbu yagarukiremu ati:

²“Mulihikya nkaha kumbonesa n'okungambira ebigambo ebirukunsaaliza?

³Mwakanjuma emirundi esatu; timwina nsoni kunkora kubi muti?

⁴Ego, noobu ndiba nasobeze, omusango guli hali nyowe.

⁵Nimuteekereza muti nimunkira oburungi, nimugumya, ngu emihito yange niyo erukuncwera omusango.

⁶Mumanye Ruhanga nkooku nuwe yantaire omu kabi kanu yaboheramu n'akatimba.

⁷Muhurre, ninyamuza nti ndi omu kabi baitu tindukuhulirwa; ninyamuliza haiguru, baitu obwinganiza tiburoho.

⁸Ruhanga akanyitira omuhanda, habweki tinyina h'okuraba, emihanda yange akagitamu omwirima.

⁹Akanyihaho ekitiinisa, yanjuura ekondo ha mutwe.

¹⁰Akantera nyena orubaju n'orubaju yammara amasiko, akandeka mpotoke nfe.

¹¹Akambiihirirwa muno, kandi nandora nk'omunyanzigwa we.

¹²Amahe ge gansesira hanu, balimire emikura baagota eheema yange.

¹³“Akabanyihaho, abanyinanyowe yabatwara hara, akanyihiraho kimu banywani bange.

¹⁴Beene baitu na banywani bange nfe na nfe bakandugaho;

¹⁵abagenyi ab'omunju yange bakaanyebwa; abazaana bange nibandora nk'omunyaihanga, hali bo ndi munyaihanga.

¹⁶Obu nyeta omuheereza wange, tangarukamu; ntaho n'okumwesengereza muno.

¹⁷Mukazi wange akannobera kimu, bagenzi bange nkooku tuzaarwa tibanyenda.

¹⁸Nobwakubaire abaana abato na bo bagaya nyowe, obu nyimuka, batandika kunjuma.

¹⁹Banywani bange nfe na nfe, bakampwamu; abo boona aba nagonzaaga bakanyefookorra.

²⁰Omunda mumubiri gwange, enyama etandikire kujunda kandi amagufa gange gatungamire.

²¹Ai bambi, munganyire inywe banywani bange, munganyire, habwokuba Ruhanga ampikizeeho omukono gwe!

²²Nimumpiigira ki nka Ruhanga oku arukumpiiga? Timumboneseze ekirukumara?

²³Haa, kuba ebigambo byange bihandikirwe! Kuba bihandikirwe omu kitabu!

²⁴Rundi, kuba bisarwirwe omu ibaale, N'ekalaamu ey'ekyoma, bikagumaho ebiro byona!

²⁵Baitu mmanyire nti omucunguzi wange aikaraho, kandi nti alyemerra hansi ha mpero:

²⁶Kandi oruhu orwomubiri gwange oburulikamara okuhwerekerra, baitu hatali omubiri gwange ndirora Ruhanga:

²⁷Oundirora ha rubaju rwange, n'amaiso gange galirora, kunu tali ondi. Baitu nkafuberra habwokuba mukagamba ngu,

²⁸‘Turamucanza tuta?’ Muserre eby'ekwaso munkwase omusango.

²⁹Dero nu, mutiine ekitara, ekitara ekinyakusirimura ekiniga kya Ruhanga ha kibi, nubwo mulimanya ngu haroho ogu acwa emisango”