Read Runyoro - rutooro Yob 2 Bible Online

Yob 2 - Runyoro - rutooro bible

Yob 2

¹Hakagaruka haabaho ekiro, abaana abaatiinaga Ruhanga eki baiziireho kukurata hali MUKAMA, nabwo Sitaani yabaiziramu kukurata.

²MUKAMA akakaguza Sitaani ati: “Iwe nooruga nkaha?” Sitaani yagarukamu MUKAMA ati: “Ninduga kugendagenda omunsi, ningitemba ningitemburruka”.

³MUKAMA yakaguza Sitaani ati: “Omuheereza wange Yobbu omuteekeriizeeho omunsi? Munu, busamu n'omu arukumusisana, muntu ataina kamogo kandi muhikiriire, anyakutiina Ruhanga kandi afuuhya obubi, noobu oliba wantairemu amaani kumwirra haihi mmuhwerekereze hataroho bulyo, baitu akyagumiire omu.”

⁴Nubwo Sitaani yagarukiremu MUKAMA ati: “Oruhu rugaitwa oruhu! Ebintu byona omuntu ebi atunga, abihayo habw'obwomeezi bwe.

⁵Hati nu, gorra omukono gwawe, omukwate ha igufa na ha mubiri, naija kukwehakana.”

⁶MUKAMA yagambira Sitaani ati: “Ngugwo, hati omwinaho obusobozi; kyonka otamwita.”

⁷Aho Sitaani yaruga omumaiso ga MUKAMA, yarwaza Yobbu ebihooya okuruga omu mara g'okuguru okuhikira kimu omu kasoke eruguru.

⁸Yobbu akakwata oruguhyo orw'okweyaguza, yaikarra omu kiina eky'iju.

⁹Nubwo mukazi we yamukagwize ati: “Obu nookyayongera kwikara oli murungi? Juma Ruhanga, obu oraaba noofa ofe.”

¹⁰Baitu Yobbu yagarukamu ati: “Noobaza nk'omu ha bakazi abadoma oku babaza. Ruhanga araatuhaga ebirungi byonka, talituha kibi na kimu?” Omuli ebi byona, Yobbu atabaze ekigambo kibi.

¹¹Banywani ba Yobbu basatu obu baahuliire akabi ako koona akaamugweriire, buli omu yaruga owabo baagenda: Erifaazi Omutemaani, Biridaadi Omusuuhi, na Zofaali Omunamasi. Bakaragaana hamu kugenda kumuhuumuza n'okumwirukirra.

¹²Obu baamuroliire hara, batasobole kumumanyirra; obu baamumanyiriire, baatandika kurra n'okuteera empamo; baatemura ebijwaro byabo, baayeseesa iju omu mitwe.

¹³Baikarra na uwe haitaka okumara ebiro musanju nyamusana n'ekiro bamuhangire amaiso, busaho n'omu ayabalize na uwe kigambo, habwokuba bakarora obusaalizi bwe nkooku buhinguraine.