Read Runyoro - rutooro Yob 20 Bible Online

Yob 20 - Runyoro - rutooro bible

Yob 20

¹Nubwo Zofaali Omunamasi yagarukiremu ati:

²“Yobbu hati wambiihiza. Tinsobora kuculeera ntakugarukiremu.

³Eki ogambire, kijumo mali, baitu mmanyire nkooku ndaakugarukamu.

⁴Noomanya okuruga ira na ira, okuruga omuntu obu yatairwe hansi,

⁵ngu okusemererwa kw'ababi nkooku kuba kw'akacu kake, n'omuhimbo gw'abataikiriza Ruhanga nkooku guba gw'akanya kake?

⁶Noobwakuba ali mukooto, araihire okuhika haiguru, omutwe niguhika ha bicu,

⁷aliborogota ebiro n'ebiro, nk'iswa erimuruga omunda; abo abaamuboine balyekaguza bati: ‘Araha?’

⁸Alibura nk'ekirooto, taligaruka kubonwa; alibingwa agende hara nk'okwolekwa kw'ekiro.

⁹Eriiso eryamuboineho tiririgaruka kumubona, ekiikaro yaikaramuga, nakyo tikirigaruka kumubona.

¹⁰Abaana be baliganjana n'abanaku, emikono ye erigarrayo itungo lye;

¹¹amagufa ge agakaba gaina amaani ag'obuto, galiziikwa omu cuucu.

¹²“Noobwakubaire obubi bwamunurraga noobwakubaire yatwikazaaga hansi y'orulimi rwe,

¹³noobwakubaire tiyayendaga kubuleka bukagenda, naikara abujubasire,

¹⁴nabwo, omunda ye, ebyokulya bihindukiramu; bimufookeramu ndurwa ey'encwera.

¹⁵Omuntu omu atanaka itungo eri yaibire; Ruhanga, alimwiha alimugaruza omunda.

¹⁶Omuntu omubi amira obusegu bw'encwera, orulimi rw'empiri nurwo rulimwita.

¹⁷Talirora byambu eby'amagita g'Oliva, talirora obusaaru oburukugera obwoki n'amagita.

¹⁸Aligarra byona ebi yakoleriire, talikirya kikamwikara omunda, amagoba aga yaihire omu busuubuzi bwe, tigalimuleetera okwegonza.

¹⁹Habwokuba akabonesa kandi akanagaija abanaku, akahamba enju ei atarayombekere.

²⁰“Habwokuba omururu gukamusaaga, talyesigiraho kintu eki arukugonza.

²¹Obu alya, tagira eki asigaho, aho obusinge bwe nuho bugarukira

²²obu aliba akyali omu kwegonza okutagambwa, nubwo enaku zoona zirimwesoroleza.

²³Muleke alye nkooku arukwenda! Ruhanga alimufubiza ekiniga n'obukaya.

²⁴Obu alirengaho kwiruka empirima ey'ekyoma, omusogi ogw'omulinga gulimurasa agwe.

²⁵Bagumucundamu bagumwiha omu mubiri, omunwa gwagwo ogurukwera gumuruge omu ndurwa; akwatwe obutiini.

²⁶Kyona eki yayahwire kirihwerekerezibwa; omurro ogutahemberwe abantu, gulimwokya n'eka ye yoona ebiriba bisigaire omu heema birihwaho.

²⁷Iguru liryoleka obubi bwe, kandi ensi erimusingisa omusango.

²⁸Ebintu eby'omunju ye biritwarwa! Birikururwa ha kiro Ruhanga eki alikwatirwaho ekiniga.

²⁹Eki nikyo Ruhanga yategekiire omuntu omubi, nubwo bugwetwa obu yamuteekaniriize.”