Read Runyoro - rutooro Yob 21 Bible Online

Yob 21 - Runyoro - rutooro bible

Yob 21

¹Nubwo Yobbu yagarukiremu ati:

²“Mutege amatu muhurre ebi ndukubagambira, nibyo bibahuumuze.

³Munyikirize mbaze, obu ndaamara kubaza, mwongere museke

⁴nyowe nyina eki ndukujunaana omuntu? Tikimpikiriire kugumiisiriza?

⁵Mundolerre, muhunirre, mute engaro zaanyu ha kanwa kaanyu.

⁶Obu nteekereza ekintu eki ntuntura kandi ncwekwa enkizi.

⁷Habwaki abantu ababi boomeera, bagurusa, bakaikura kandi baba b'obusobozi?

⁸Bazaara abaana kandi batunga abaijukuru, boomeera, bakuza abaana n'abaijukuru baabo.

⁹Amaju gaabo gaikarwamu obusinge, Ruhanga tabaleetera kabi na kamu.

¹⁰Ente zaabo zeema kandi izaara kurungi,

¹¹Abaana baabo babaturukya aheeru nk'abarukuturukya igana, abaana batandika kuzaana.

¹²Bazinira ha njogera na ha nanga, basemererwa muno okuhurra endere neegamba.

¹³Obwomeezi bwabo babumarra omu kwegonza, bagenda nyabuyonga baina obusinge.

¹⁴Bagambira Ruhanga bati: ‘Oturugeho! Titurukwenda kumanya emihanda yawe.

¹⁵Ow'obusobozi bwona nuwe oha, ngu nukwo tumuheereze? Kandi omu kumwesengereza, nitwihamu magoba ki?’

¹⁶Murole, abo tibaina businge? Baitu ebi barukuteekereza, nyowe tindukubiikiriza.

¹⁷“Etaara ey'omuntu omubi eraara? Ababi bahikwaho obujune? Ruhanga arakwasirwe ekiniga akafubira omuntu omubi?

¹⁸Arabahuuhwire akabatwara hara nk'omuyaga ogurukuhuhuura obunyansi obwomere, rundi nk'ecuucu oku ehuuhurwa ekiyaga?

¹⁹Inywe nimugamba ngu ‘Ruhanga afubira omwana, naamutura ebibi bya ise nangwa.’ Afubira abasiisi bonyini; ‘Akabwa kasuma kahoolerwa omugongo gwako.’ Abooleke ngu, ekirukumubafubiza, nibyo ebibi byabo.

²⁰Abasiisi ka bafubirwe, ka beetegereze ekiniga kya Ruhanga Omusobozi wa byona.

²¹Bbo obu baliba batakyaroho, omuhendo gw'ameezi gaabo gumazire kucwibwaho, amaju baliba nibakyagafaaho ki?

²²Halibaho alyegesa Ruhanga amagezi, ogu anyakucwera aba haiguru muno emisango?

²³Haroho anyakufa aina amaani kandi ali mwomeezi, ali muguuda kandi naayegonza,

²⁴weena agomokere, amagufa ge gatakahoirwemu musoina

²⁵ondi afa atakarorahoga muhimbo nakati atakarozahoga na kantu karungi.

²⁶Boona bafa kandi baziikwa omu mulingo gumu, boona baswekwa enzito.

²⁷“Manyire ebi murukuteekereza kandi nkooku mutegekere kunkora kubi.

²⁸Habwokuba nimwekaguza muti: ‘Enju y'omukuru eraha? Eheema ababi ei baikaramuga eri nkaha?’

²⁹Timukakaguzaaga abo abaikara nibagendagenda, kandi timurukwikiriza ebi babagambira, omuntu omusiisi nkooku aganyirwa ha kiro eky'akabi,

³⁰nkooku aganyirwa ha kiro eky'ekiniga?

³¹Omu kasumi ako, nooha alinyegerra omubi? Kandi nooha alimusasurra byona ebi yakozire?

³²Obu balimuhimba kumutwara ha kituuro kumuziika ekituuro kye balikirinda.

³³Bamutaho mporampora entaka ez'ekihanga; abantu boona bamuhondera, kandi abo abamwebembera tibabarwa.

³⁴Hati, muraasobora muta kumpuumuza nimumbaliza ebintu ebitarumu? Byona ebi murukungarukamu, busamu mazima, bisuba byonka.”