Read Runyoro - rutooro Yob 22 Bible Online

Yob 22 - Runyoro - rutooro bible

Yob 22

¹Nubwo Erifaazi Omutemani yagarukiremu ati:

²“Omuntu aina eki asobora kugasira Ruhanga? Mazimakwo, ogu omunyamagezi, ayegasira wenka.

³Iwe kakuba ohikirra, Ow'obusobozi bwona kumuleetera okusemererwa? Rundi kakuba otaba na kamogo, akiihamu amagoba?

⁴Okukuhana, nikyo omutiinira? Rundi habw'okukucwera omusango?

⁵Obubi bwawe tibuhinguraine ebibi byawe tibiina ha bigarukira.

⁶Habwokuba okaihaho bagenzi bawe omusimbo ogwokaba obahaire kandi abarukugenda busa okabajuura obwokujwara bwabo.

⁷Abarukwitwa ensazi otabahe maizi g'okunywa, abarukwitwa enjara okabaima ebyokulya.

⁸Omusaija ow'amaani nuwe yatungire ensi, kandi ow'ekitiinisa ogu nuwe yagiikairemu.

⁹Abafaakati okababinga ngaronsa, kandi enfuuzi waicwa emikono.

¹⁰Habweki nikyo oyehinguliriziibwe emitego, nikyo orukutinira muno oti;

¹¹amaiso gawe garumu omwirima, habweki tosobora kuhweza, kandi noija kumirwa entunga y'amaizi.

¹²“Ruhanga tali haiguru muno? Orole enyunyuuzi ezirukukirra kimu kuba haiguru, tiziri hara muno!

¹³Kandi niiwe orukugaruka kugamba oti Ruhanga amanyire ki? Asobora ata kutucwera omusango kunu ali omu mwirima?

¹⁴Ebicu ebikwasire po bimubuutikiire, tarukurora obu aba naagendera ha mutaano oguli hagati y'ensi n'iguru.

¹⁵Oraikara nookora ebikorwa ebyaira abantu ababi ebi baakoraga?

¹⁶Abo bakaihwaho akasumi kaabo katakahikire; obusinge bwabo bukahwaho.

¹⁷Bakaragira Ruhanga bati: ‘Oturugeho,’ ‘Iwe Ow'obusobozi bwona, itwe osobora kutukora ki?’

¹⁸Kandi kunu nuwe yaijwize amaju gaabo ebirungi, ee, amagezi g'abantu ababi, tinsobora kugeetegereza.

¹⁹Abantu abarungi basemererwa, kandi abataina musango obu barora ababi nibafubirwa, bagwa n'enseko.

²⁰Ee, abanyanzigwa baitu bahwerekeriire, kandi ebi baasigire, omurro gubisiiriize.

²¹“Iwe Yobbu, garukanganamu na Ruhanga, nukwo otunge obusinge, eki nikyo kirukurugiramu akarungi.

²²Ohurrege ebi akuragira, ebigambo bye obiikazeege ha mutima.

²³Obu oligaruka hali Ow'obusobozi bwona okeebundaaza, eheema zawe zoona obu oliziihamu obubi,

²⁴ezaabbu obu oliginaga omu cuucu, kandi ezaabbu eya Ofiri okaginaga hagati y'amabaale ag'ekiisurumba,

²⁵Ow'obusobozi bwona obu nuwe aliba ezaabbu yawe kandi feeza yawe ey'omuhendo;

²⁶obu nubwo olyegondeza omu W'obusobozi bwona, oimukye amaiso orole Ruhanga.

²⁷Oraamusabaga, kandi araakuhaga; kandi olihikiriza ebi oragaine.

²⁸Kyona eki oraayetahoga, kiraagendaga kurungi, omuhanda gwawe guraabamuga ekyererezi.

²⁹Habwokuba Ruhanga abundaaza abeekuza baitu ajuna abeebundaaza.

³⁰Ajuna ataina musango, obu alikora ebirungi alikujuna.”