Read Runyoro - rutooro Yob 24 Bible Online

Yob 24 - Runyoro - rutooro bible

Yob 24

¹“Habwaki Ruhanga atataho akasumi ak'okucweraho emisango, abo abamuheereza, habwaki atabateeraho ekiro eky'obwinganiza?

²Abantu baihurra emitaano; banyaga amagana bagata omu gaabo.

³Babinga enkaina y'enfuuzi; bakwata ente y'omufaakati, gube musimbo gwabo.

⁴Babinga abanaku omu ruguudo; abanaku ab'omunsi boona beesereka.

⁵Habweki abanaku baserra ebyokulya omu irungu eryomere nk'entulege ez'omu kisaka; tibaina handi nambere basobora kwihurra abaana baabo ebyokulya.

⁶Omu musiri ogw'omuntu omubi nuho baiha ebyokulya eby'ebisoro byabo, kandi bahimba orugonjo rwe orw'emizabbibbu.

⁷Ekiro kyona baraara bakunanaire bateenagireho kagoye, omu bwire bw'embeho, tibagira kookwesweka.

⁸Enjura enyakugwa ha rusozi ebajubya, beegomeza haihi n'omwandara nibaserra obwigamo.

⁹(Haroho abo abanyaga omwana enfuuzi bakamwiha ha mabeere, kandi abakwata omwana w'omunaku abe musimbo gwabo.)

¹⁰Bagenda hanu na hali kwonka kwonka bataina eki bajwaire;

¹¹beetweka ebiba by'engano, kunu enjara ebali kubi; emizabbibbu ey'abantu ababi niyo baihamu amagita; niyo bajungamu eviini, kandi kunu nibaitwa iroho.

¹²Omu rubuga noohurra abarukufa nibasinda kandi emputa niiborooga, nibaserra ow'okubakonyera; baitu eki basaba takitaho mutima.

¹³“Haroho naabo abagayiraniza ekyererezi, abatamanyire mihanda yakyo, kandi abatagiikaramu.

¹⁴Omwisi aimuka obu haba haliyo omwirima, nukwo aite omunaku n'omuseege.

¹⁵Omusiihani aikara naagira ati: ‘Buraira,’ ateekereza ati: ‘Busaho n'omu aramubona’; ayehindura ha maiso, aleke kumanyirirwa.

¹⁶Omu bwire bw'omwirima balima ebiina omu maju, nyamusana, beekingiramu; ekyererezi tibakimanya.

¹⁷Habwokuba omwirima kasira, bbo boona nugwo barukweta nyenkya; habwokuba bakanywana n'ebintu ebinyakutiinisa eby'omwirima kasira.

¹⁸“Omuntu omubi atwarwa bwango okusandaara kw'amaizi, ensi ei yatungire Ruhanga agikyena; omuntu ogu tagaruka kugenda kukora omu ngonjo ze ez'emizaabbibbu.

¹⁹Ekyanda n'omurro nkooku bimaraho ebirika, na nyabuyonga nukwo emaraho eti abasiisi.

²⁰Aba ha nsonda z'orubuga babeebwa; amabara gaabo tigagaruka kwijukwa omuntu omubi nukwo acweka ati nk'omuti.

²¹“Beemarra ha bakazi engumba abataina baana, abafaakati tibabakorra karungi.

²²Baitu Ruhanga habw'obusobozi bwe, ahangaaza ab'obusobozi; obu baba batakyanihira kwomeera, nubwo baimuka.

²³Abaha okugwagwana n'ekisagikwa; kandi abarolerra hoona ha bagenda.

²⁴Banyumizibwa okumara akasumi kake; barugaho bahotoka kandi bacucuka nk'ekibyarwa, bageswa nk'entwe z'engano.

²⁵Eki tinukwo kiri? Nooha asobora kugumya ngu ndi mbiihi y'ebisuba? Ngu byona ebi mbalize bisuba bisa?”