Read Runyoro - rutooro Yob 27 Bible Online

Yob 27 - Runyoro - rutooro bible

Yob 27

¹Yobbu akongera kubaza yagamba ati:

²“Ndahiire Ruhanga omwomeezi, ayanyihireho ebikaba binsemeriire, Ow'obusobozi bwona, ogu ayansaaliize ati; akasumi koona akandimara ndi mwomeezi,

³obu ndiba nkyayomiire Ruhanga akyandekeremu omwoyo gwe;

⁴eminwa yange terigaruka kucwangya, n'orulimi rwange tiruligaruka kuterenganiza.

⁵Nikikafuuhe, nyowe kugamba nti: ‘Muli b'amazima’; ndaitaniraga oburungi okuhika okufa kwange.

⁶Ka ngumize kimu obuhikiriire bwange, tindibwikiriza kundugaho; omutima gwange tigurukunjunaanaho kiro na kimu, ha biro eby'obwomeezi bwange.

⁷“Boona abanyakumpakaniza kandi abanyakundwanisa, nibakafubirwe nk'abantu ababi abatahikiriire.

⁸Omuntu ataina kwikiriza Ruhanga, aba nakyanihira ki, omu kasumi ako Ruhanga akaamwihiraho?

⁹Omuntu ogu obu aligwerwa akabi Ruhanga alihurra omuranga ogu aliteera?

¹⁰Omuntu ogu, aligonza Ow'obusobozi bwona? Araamwamirraga obwire bwona?

¹¹Ka mbeegese Ruhanga nkooku ali mukuru; nsoborre kyona ekiroho Ow'obusobozi bwona eki yategekere.

¹²Inywena mukakyerorra n'aganyu; kiki ekibafooliire kimu bantu ntagasa kiti?

¹³“Ogu nugwo omugabo Ruhanga ogu yategekiire omuntu omubi, nubwo obugwetwa Ow'obusobozi bwona obu aha abasaaliza abandi.

¹⁴Noobu azaara abaana baingi, baba b'okwitwa ekitara; kandi baikara nibalya amasa.

¹⁵Abo abanyakusigaraho, baitwa endwara, bakazi baabo tibabaterra muranga.

¹⁶Noobu akuha efeeza ekaingana ecuucu, noobu atuuma engoye ikaingana ibumba,

¹⁷noobu araituuma, baitu omwinganiza nuwe aliijwara, ataina musango nuwe alyetagara n'efeeza.

¹⁸Enju omuntu omubi ei ayombeka, esisana ey'enyamumbubi,

¹⁹esisana nk'akasiisira akanyakwombekwa omulinzi aligenda kubyama atungire, itungo lye aho nuho lirigarukira, obu aliija kuziburra amaiso alisanga likagenda ira.

²⁰Alitiina muno nk'arukutiinisibwa entunga y'amaizi, akairiringwa kalimweyerra omu bwire bw'ekiro.

²¹Omuyaga ogwa Burugaizooba gulimuhimba gumutwale; gulimwiha omu kiikaro kye.

²²Gulimuteera gutarukumuganyira, alyekamba kugwehugura nairuka muno.

²³Kimwehandira nikimusimoza kurugirra mubwikaro bwakyo.