Read Runyoro - rutooro Yob 29 Bible Online

Yob 29 - Runyoro - rutooro bible

Yob 29

¹Yobbu yagaruka yagamba ati:

²“Haa, kakuba mbaire ninsobora kuba nk'omu meezi agaira, nk'omu biro Ruhanga ebi yandolerramuga;

³etaara ye obu yanyakiraga ha mutwe nammulikira, nindaba omu mwirima nimpweza;

⁴nkooku nabaga omu biro byange ebi nayegondiizeemu. Ruhanga obu yaikazaaga omutima ha nju yange;

⁵Ow'obusobozi bwona obu akaba akyali hamu na nyowe, abaana bange obu bakaba bakyaikaire

⁶ebigere byange obu byanaabisibwaga amata, kandi omwandara obu gwandugiramuga enyanja y'amagita!

⁷Obu naturukaga irembo ly'orubuga, obu nateekanizaaga entebe yange omu ikuute,

⁸abantu bandoraga bagaruka enyuma, abantu abakuru baimukaga beemerra,

⁹ab'ekitiinisa, baalekeraga aho kubaza, beekwata ha munwa.

¹⁰Abanyoro bakaculeera, endimi zaabakwatira omu bihangara.

¹¹Omuntu weena ayampurrahoga, yanyetaga w'omugisa,

¹²kandi ayandoraga, yagumaga, habwokuba najunaga abanaku abarraga, n'enfuuzi ezikaba zitaina kikonyera.

¹³Omugisa gw'ogu ayabaga ali haihi kufa gwampikahoga, omufaakati namusobozaaga kuzina habw'omuhimbo.

¹⁴Nakoraga eby'obulyo n'obwinganiza;

¹⁵nabaga maiso g'abahimbaara, kandi nabaga bigere by'abalema

¹⁶nabaga ise abanaku, kandi narwanirraga ou ntamanyire.

¹⁷Ababi nabaihaga amaino, kandi ogu ayabaga aina eki arukulya nkimunagisa.

¹⁸Hanyuma nubwo nateekeriize nti: ‘Ndihangaara muno,

¹⁹ngwe omuka yange nyina obusinge, nkaba ninsisana omuti ogwina emihama erukunywa amaizi butoosa, kandi ogunyakwina amataagi agarukujubibwa orume,

²⁰buli muntu yampaisanizaaga, kandi amaani gange tigaagarukirraga.’

²¹“Abantu bantegeraga okutu bahuliriza, baculeera bahurre eki ndaagamba.

²²Obu namaraga kubaza, tibaayongeraga kubaza kandi ekigambo kyange ky'abataahaga.

²³Buli omu akabisiima nk'abalimi oku basiima, enjura ey'obutoigo,

²⁴nabasekeraga obu naroraga bahoire amasiko, okusemererwa kwange kwabagarramuga amaani.

²⁵Ninyowe narolerraga kandi ncwamu, nkabaikaramu nk'omukama oku aikara omu mahe ge, nk'omuntu anyakuhuumuza abali omu bujune.