Read Runyoro - rutooro Yob 30 Bible Online

Yob 30 - Runyoro - rutooro bible

Yob 30

¹“Baitu hati, abantu abandukukira obukuru, aba nakubaire ngayire baisebo, nkabaikaliza hamu n'embwa ez'igana lyange; nubo barukunsekereza.

²Abantu enjwahi nk'abo, basobora kungasira ki?

³Obuburwa n'enjara nibibaliisa itaka eritaikarwaho bantu kandi erirukuguma dai;

⁴bannoga omugobiswa n'ebibabi by'ebisaka ebindi, kandi emihama y'endale, nikyo kyokulya kyabo.

⁵Bakabingwa baihwa omu bantu, abantu babacoomera nk'abarukucoomera omusuma.

⁶Baikara omu mikura eyatemerwe enjura, n'omu biina eby'omwitaka n'eby'omu myandara.

⁷Baikara nibaamuliza omwirungu nk'enyamaiswa, beekombebekere hamu hansi y'obunyamalerre.

⁸Bakabingwa habwokuba bantu badoma kandi abataina kitiinisa.

⁹“Dora hati, ninyowe barukuteera nk'enanga, hali bo ndi kiseko.

¹⁰Tibarukunyendera kimu, tibarukwenda n'okunyirra haihi; obu barukumbona, nibancwera amacwanta mumigayo.

¹¹Habwokuba Ruhanga ansumurwire omweko nambundaaza nukwo kunkubukira baijwire ekiniga.

¹²Ekitebe ky'abantu nikiinyimuka ha mukono ogw'obulyo, nibanturukya aheeru, nibampungurra ebintu byabo kahwerekereza.

¹³Bandemesa nkooku ndaayejuna, banyongera obujune; busaho n'omu arukubatanga.

¹⁴Baija nk'abarukuraba nambere hagalihire; bandubaatirra banziikira kimu hansi;

¹⁵nyena mmarraho obutiini, ekitiinisa kyange kikagenda nk'orwoya obusinge bwange bukacuucuuka nk'ekicu.

¹⁶“Hati ndi haihi kufa; tinyina kuhuumuza ekiranyihaho obujune bunu.

¹⁷Ekiro amagufa niganceenya muno, obusaasi bwange tiburukunyihira.

¹⁸Ruhanga ankwasire ha kitogi yangumya, engoye zange azizingazingire, tiikyamanyirirwa.

¹⁹Ruhanga ampungwire omu saabu ninsisana ecuucu n'iju.

²⁰Ai Ruhanga ninkukunga, baitu torukungarukamu, obu ndukukwesengereza, torukunfaaho.

²¹Nonkorra ebitaina mbabazi nompiigira kimu nkooku orukusobora

²²okanyereeza wanta ha muyaga eruguru, wansoboza kugugenderaho, ompungura kunu na kuli ihunga obu liba niriteera.

²³Ego, mmanyire nkooku oliinyita, ontwale omunju ei wateekaniriize aboomeezi boona.

²⁴“Baitu, omuntu anyakuli omu ntuumo y'ebikamburo, noobu araaba ali omu kabi, tateera omukungo naaserra ow'okumukonyera?

²⁵Nyowe, nterre hamu n'abantu abakaba bali omu muhito, kandi ntaganyire abo abakaba basobiirwe?

²⁶Obu naserwire oburungi, hakaija obubi; kandi obu nategeriize ekyererezi, haija omwirima.

²⁷Nyowe nyennubire tinyina businge; ebiro eby'okubonabona bimpikireho.

²⁸Ningenda hanu na hali, nyena ntinzire; baitu tinyiraguzibwe musana; ninyemerra omu rwanjale rw'abantu, ninserra ow'okunagira omukono.

²⁹Eboha nubo bagenzi bange kandi maaya nizo nyikara nazo.

³⁰Nyena nkatinda nairagura si, ndi magufa kwonka, kandi amagufa nigaikara niganyakwamu omurro.

³¹Enanga yange efookere y'amaganya, kandi endere yange erumu iraka ly'abo abarukurra.