Read Runyoro - rutooro Yob 31 Bible Online

Yob 31 - Runyoro - rutooro bible

Yob 31

¹“Nkakora endagaano nindora n'amaiso gange; kandi nsobora nta kutunurra omwisiki?

²Ruhanga ow'omwiguru alimpa mugabo ki? Ow'obusobozi bwona anyakuli haiguru alingwetera ki?

³Abahikiriire tinubo bagwerwa obujune enkozi z'ebibi tinizo ihikwaho akabi?

⁴Ruhanga amanyire kyona eki nkora, arora hoona ha ngenda.

⁵Obu ndiba naganjaine n'embiihi z'ebisuba, obu ndiba narahukire kugenda kucwangya,

⁶[Ndengwe omu minzaani ey'amazima, Ruhanga amanye oburungi bwange!]

⁷Obu ndiba narugire omu muhanda ogw'amazima, obu ndiba naikiriize okutwarwa omu bubi, obu ndiba nakozire ekibi,

⁸nyowe ka nsige, ondi nuwe alye; kandi ebirukwerra nyowe kabimeenywe.

⁹“Nobu ndiba naligiire omukazi, namutegereza haihi n'orwigi rw'omutaahi;

¹⁰mukazi wange naakacumbire omusaija ondi, naakaraale n'omusaija ondi.

¹¹Habwokuba ogu gwakubaire omusango mubi; eki kyakubaire kibi abacwi b'emisango eki basemeriire kutaho ekifubiro;

¹²ogu gwakubaire murro kahwerekereza ogurukuhika nyabuyonga, gwakumazireho byona ebi nyinabyo.

¹³“Obu ndiba ntarafiireho kuramurra omwiru, n'omuzaana wange, obu bampikizeeho ebigambo byabo;

¹⁴Ruhanga obu aliimuka, ndikora ki? Obu alinkaguza, ndimugarukamu ki?

¹⁵Ogu wonyini ayahangire nyowe, tinuwe yahangire n'oli? Tinuwe ogu ayatubumbire omunda za banyinaitwe?

¹⁶“Obu ndiba naimire omunaku eky'arukwenda, naraganiza omufaakati,

¹⁷rundi ebyokulya byange obu ndiba nabiriire nyenka, enfuuzi tiyalyaho

¹⁸(habwokuba okuruga omu buto bwe, nkamworoora nka ise kimuzaara kandi nkatandika kumurolerra nakyaruga ati omunda ya nyina);

¹⁹obu ndiba naboine omuntu ataina kyokujwara, rundi omuntu omunaku ataina ky'okwesweka,

²⁰naakumuhaire ekyesweko ekikozirwe omu byoya by'entaama eby'igana eryange nyabwange, nubwo yaakumpaisaniize n'omutima gwe gwona,

²¹obu ndiba nagobiize enfuzi, nimmanya nkooku ndaasinga omu kooti,

²²emikono yange neekahendeke neekatemwe ekanduga ha mabega.

²³Habwokuba ntiina Ruhanga kunfubira taakusoboire kukora ekintu nk'eki.

²⁴“Kakuba nayesigiire efeeza, ezaabbu enungi niyo nkamaraaho omutima,

²⁵obu ndiba nasemeriirwe muno, habwokuba nkaba ntungire ntungurwire rundi habwokuba nkaba nkozire bingi.

²⁶Obu ndiba naroleriire izooba nirijwa, rundi okwezi nikugenda omu kitiinisa kyakwo,

²⁷ntatwalirizibwe kukugiza ebintu ebi, ntabitemu kitiinisa ninyenywegera engaro;

²⁸eki nakyo, kyakubaire kibi, abacwi b'emisango eki basemeriire kutaho ekifubiro, habwokuba obu, naakubaire mbiihabiihire Ruhanga ow'obusobozi bwona.

²⁹“Tinkasemererwaga kuhurra abanyanzigwa bange nibabonabona, rundi kuhurra ngu bagweriirwe akabi;

³⁰tinkakoraga kibi eky'okubasabira okufa.

³¹Abantu boona abanyakunkorra, bamanyire nkooku butoosa natangirraga abanyamahanga,

³²nkooku narazaaga abagenzi omuka yange, ntarukubaleka bakaraara ha mihanda.

³³Abantu abamu balengaho kuswekerra ebibi byabo baitu nyowe eki tinkakikoraga

³⁴habwokuba nkatiina muno abantu abaingi, kandi nkatiina kugaywa enganda, nukwo kuculeera cii, tinaturuka n'aheeru.

³⁵Haa, boojo, kakuba haroho omuntu asobora kuhurra ebi ndukugamba! Nindahira, kyona eki ndaagamba, kiraaba ky'amazima. Ow'obusobozi bwona angarukemu! Haa! Kakuba omunyanzigwa wange ebi arukunjunaana kakuba bibaire nibisobora kuhandiikwa!

³⁶Mazimakwo, naakubihagatiire ha ibega, naakubijwaire ha mutwe nk'ekondo;

³⁷naakugambiire Ruhanga byona ebi nakozire, naakwemeriire omumaiso ge ntaina eki ndukutiina.

³⁸“Ensi yange obw'eraaba neengamba kubi, emikurunduzo yayo obu eraaba neetaabanira hamu;

³⁹obu ndiba naliiriire busa ebyokulya byayo nayanga kusasura, kandi obu ndiba naisire bakama baayo,

⁴⁰emezeege amahwa omu kiikaro ky'engano, n'emberya omu kiikaro ky'oburo.” Ebigambo bya Yobbu, aho nuho bigarukira.