Read Runyoro - rutooro Yob 32 Bible Online

Yob 32 - Runyoro - rutooro bible

Yob 32

¹Nubwo abasaija abo, baalekera aho kugarukamu Yobbu, habwokuba akaba naazooka nkooku akaba ali muhikiriire.

²Nubwo Erihu mutabani wa Barakeeli Omubuuzi ow'omu ruganda rwa Ramu yabiihiirwe. Akabiihirirwa Yobbu, habwokuba Yobbu akeeyeta muhikiriire okukira Ruhanga;

³kandi akabiihirirwa na banywani ba Yobbu abasatu, noobwakubaire bakaba nibagumya Yobbu nkooku akaba ali mubi, baitu batagire eky'okumugarukamu.

⁴Erihu habwokuba nuwe akaba naakirra kimu obuto ha boona abakaba bali aho, akategereza okuhika boona obu baamazire kubaza.

⁵Obu yaboine abasaija abo abasatu nkooku balemerwe kugarukamu Yobbu, yakwatwa ekiniga, yatandika kubaza.

⁶Yagamba ati: “Nyowe nimbakira obuto, inywe nimunkira obukuru, nikyo ntiiniire kubagambira eki ndukuteekereza.

⁷Nyowe nkagamba nti: ‘Musemeriire kubaza, inywe abantu abarukunkira obukuru, musemeriire kukaguzangana.’

⁸Baitu omwoyo omuntu ogu ainagwo, orwoya rwa Ruhanga bwona, nurwo rumuleetera okwetegereza.

⁹Mutagira abakuru ngu nubo bagira amagezi, kandi ngu abagurusi nubo bakenga ekihikire.

¹⁰Habweki, nimbasaba, muntegere okutu; na nyowe munyikirize, mbagambire eki ndukuteekereza.

¹¹“Obu mubaire nimuteekereza ebyokugamba, nkaikara ntegeriize, mpurre ebigambo byanyu, nkatega amatu mpurre enfumo zanyu ez'amagezi.

¹²Nkataho omutima mpurre ebi murukugamba, baitu omuli inywe, hatabeho n'omu ayahwitwire Yobbu, rundi ayagarukiremu ebigambo bye.

¹³Habweki, muleke kwebiiha ngu: ‘Tukazoora amagezi; Ruhanga wenka nuwe asobora kusingura Yobbu, baitu omuntu tamusobora.’

¹⁴Yobbu akabaza na inywe, atabaze na nyowe, tinnakumugarukiremu nkooku mwagarukiremu.

¹⁵“Yobbu, abantu abo tibakyaina bigambo, tibaina eky'okugarukamu.

¹⁶Hati, nyowe nyikale aho ntegeriize, ngu habwokuba bbo tibarukubaza, ngu habwokuba bali aho beemeriire, tibakyaina eky'okugarukamu?

¹⁷Na nyowe ka ngarukemu; na nyowe ka nyoleke eki ndukuteekereza.

¹⁸Habwokuba nyina ebigambo bingi, kandi omwoyo ogu nyinagwo nigumpambiriza.

¹⁹Omutima gwange, nigusisana eviini etaine h'okuturukiza orwoya; nigusisana nk'endyanga empyaka, guraaliire kubaruka.

²⁰Kimpikiriire kubaza, nukwo mbone obwikizo, kinsemeriire kwesama ngarukemu.

²¹Tingire muntu n'omu ou ndaasoroora, kandi tingire n'omu ou ndahaisiriza.

²²Habwokuba timmanyire kuhaisiriza, kakuba mpaisiriza, ayampangire nampwerekereza ahonaaho.