Read Runyoro - rutooro Yob 33 Bible Online

Yob 33 - Runyoro - rutooro bible

Yob 33

¹“Hati nu Yobbu, nkwesengeriize, ohurre otege okutu nkugambire.

²Hati nayesama, natandika kubaza.

³Ebigambo byange nibyoleka oburungi obw'omutima gwange, akanwa kange ebi karukubaza by'amazima.

⁴Omwoyo gwa Ruhanga nugwo gwampangire, orwoya rw'Owobusobozi bwona nurwo runyomeeza.

⁵Ngarukamu obu oraaba noosobora; teekaniza ebigambo byawe obiingambire; yemerra.

⁶Nyowe na iwe tuli kimu omumaiso ga Ruhanga, itwembi tukaihwa omwibumba.

⁷Busaho bulyo na bumu obu orukusigikiraho kuntiina; tindukwija kukwoleka obusobozi obuhinguraine.

⁸“Ombaliize haihi muno nahurra, ebigambo byawe mbihuliire.

⁹Noogamba ngu: ‘Ndi murungi tinyina kabi; ninyera tinyina kibi.

¹⁰Ruhanga azoire obulyo obu arukusigikiraho kunseesira, kandi naankora nkooku yaakukozire omunyanzigwa.

¹¹Amboha ebigere, aikaza eriiso ha mihanda yange yoona.’

¹²“Leero nu kankugarukemu, Ruhanga nuwe aba mukuru okukira omuntu.

¹³Habwaki ohakana na Ruhanga, okutagarukamu okuhyema kwawe?

¹⁴Ruhanga noobu arakabaza emirundi n'emirundi, busaho n'omu arukutaho omutima eki arukugamba.

¹⁵Ekiro abantu obu baba bagwijagiire, Ruhanga abaliza omu birooto, nuho abeeyolekera.

¹⁶Obu nubwo aigura abantu amatu, abatiinisa naabahabura,

¹⁷nukwo atange abantu baleke kusiisa, kandi abamalemu okwenyumiza,

¹⁸tabaleka bakahwerekerra; abakiza okufa kwonyini.

¹⁹“Ruhanga afubira omuntu namutwekera endwara, naaleetera omubiri gwe obusaalizi.

²⁰Nukwo aleke kunulirwa ebyokulya noobwakubaire ebyokulya ebirungi kandi ebirukunura muno.

²¹Weena ahwaho asigara ali magufa amagufa goona gamutunama.

²²Obu aba asigaliize kimu kyonka, kusirimuka nyabuyonga.

²³Omu kasumi ako, nubwo hazooka mali amwemeriire ha rubaju, omutonganirizi anyakukomerwe omu nkumi, ow'okwijukya omuntu eki asemeriire kukora,

²⁴ow'okumuganyira naagamba ati: ‘Otamuleka akagenda omu kiina, habwokuba nzoire ow'okumucungura;

²⁵omubiri gwe guligaruka gube nkoku gukaba guli akyali ha busigazi bwe, aligaruka abe nkooku akaba ali ha buto.’

²⁶Obu alisaba, Ruhanga alimuha eki asabire, omuntu ogu nubwo aramye Ruhanga aina omuhimbo; Ruhanga aligaruka amuterekerereze ebintu byona.

²⁷Alizina omumaiso g'abantu naagamba ati: ‘Nkasiisa nayanga ekihikire, baitu Ruhanga akanganyira.

²⁸Atandeke nkagenda ey'abafu, na hati nkyali mwomeezi.

²⁹“Murole, ebintu ebi byona Ruhanga abikorra omuntu obutoosa,

³⁰nukwo aihe omwoyo gwe omu kiina, omuntu ogu nukwo atunge ekyererezi eky'aboomeezi.

³¹Yobbu, nkwesengeriize otege okutu, ompulirize; oculeere, ondeke mbaze

³²obu oraaba oina eky'orukugamba, kigambe, habwokuba ninyenda kukwihaho omusango.

³³Obu oraaba otainakyo ohunde amatu; oculeere, nkwegese amagezi.”