Read Runyoro - rutooro Yob 34 Bible Online

Yob 34 - Runyoro - rutooro bible

Yob 34

¹Hanyuma Erihu nubwo yagambire ati:

²“Muhurre ebi ndukugamba, inywe abanyamagezi, inywe abarukwetegereza mutege amatu;

³habwokuba okutu nukwo kucwamu ebigambo ebi kuhurra, nkooku ebihangara bimanya obunuzi bw'ebyokulya.

⁴Ka tukome ekinyakuhikire; leka twecweremu itwenka ekirungi.

⁵Habwokuba Yobbu akagamba ati: ‘Tinyina musango, baitu Ruhanga ayangire kunkorra eby'obwinganiza;

⁶noobu ndaaba ninkora nta ebihikire, nindorwa nk'omubiihi w'ebisuba; noobu ndaaba ntarakozire kibi baitu ekihuta kyange kiremere kukira.’

⁷Muntu ki asisana nka Yobbu? Anyakugonza kugaya nk'omuntu oku agonza kunywa amaizi.

⁸Ogu anyakwetaba n'enkozi z'ebibi, kandi anyakuganjana n'abantu ababi?

⁹Habwokuba akagamba ati: ‘Okukora Ruhanga eki agonza, tikiina eki kigasira omuntu.’

¹⁰“Mumpulirize inywe, abantu abarukwetegereza, nikikafuuhe, Ruhanga kukora ekibi nikikafuuhe, Ow'obusobozi bwona kukora ekitahikire!

¹¹Habwokuba alisasura omuntu naarorra hali ebi yakozire, kandi alimuhikyaho ebirukusisana engeso ze.

¹²Mazimakwo, Ruhanga Ow'obusobozi bwona takora kibi; takakorraga muntu ekitali ky'obwinganiza,

¹³nooha ayahaire Ruhanga obusobozi kandi nooha ayamuhaire kulema ensi yoona?

¹⁴Kakuba Ruhanga aihaho orwoya orw'obwomeezi,

¹⁵buli muntu weena omwomeezi yaakufiire agaruka omu cuucu.

¹⁶“Obu oraaba oine okwetegereza ohurre kinu otege okutu ohurre eki ndukugamba.

¹⁷Ogu anyakunoba obwinganiza, alirema olijunaana ogu ahikiriire n'owobusobozi,

¹⁸Ruhanga acwera omusango abakama n'abalemi obu baba bataine mugaso rundi bali babi.

¹⁹Tagendera ha ncwamu y'ababiito rundi kugirra embabazi abaguuda nahenderra abanaku habwokuba boona nuwe yabahangire.

²⁰Omuntu naasobora kufa pukupuku obwire bw'ekiro Ruhanga akangura abantu nibahwerekerra; aita abaakiri maani ateejwahize nakake.

²¹Buli rutambo orututeera arumanya.

²²Tiharoho mwirima kasira omusisi haasobora kwesereka Ruhanga.

²³Ruhanga tikimwetagisa kutaho obwire ngu itwe nubwo tugendereho owe kucwerwa omusango, kwihaho abalemi nukwo abateho abandi.

²⁴Ogu acwacwana ab'obusobozi atabandize kukaguza, abandi nubo agarra omu biikaro kyabo.

²⁵Habw'okumanya ati ebi bakora, nikyo abajuumikira ekiro abasasangura.

²⁶Atema abasiisi naabatura obubi bwabo, abantu abandi nibarora,

²⁷habwokuba bakeejugumura baayanga kumukuraatira, kandi bakagaya ebiragiro bye byona,

²⁸eki nikyo Ruhanga yasigikiireho okuhurra kw'abanaku, yahurra omuranga gw'abarukubonesebwa.

²⁹Ruhanga kakuba ayangira kimu kukora ekintu noobwakubaire ekimu kyonka, nooha ayaakumuzoire? Kakuba ayesereka, nooha ayaakumuboine, yaakuboinwe ihanga rundi omuntu?

³⁰Nukwo omuntu ataikiriza Ruhanga aleke kulema, nukwo aleke kutega abantu.

³¹“Haroho aragambire Ruhanga ati: ‘Ekifubiro kyange nkakyemera; tindigaruka kukora kubi.

³²Onyegesezeki ntarukwetegereza; obu ndiba nakozire ekibi, tindikigarukira.’

³³Iwe habw'okwanga Ruhanga eki agonza, nooteekereza asobora kukukorra eki orukwenda? Niiwe ocwemu, atali nyowe; hati tugambire eky'orukuteekereza.

³⁴Abantu abarukwetegereza nibaija kungambira bati: kandi omuntu ow'amagezi arangira ati:

³⁵‘Yobbu naabaza eby'obudoma, ebi arukugamba, tibirumu magezi.’

³⁶Haa, Yobbu kakuba yalengesiibwe okuhika ha mpero! Habwokuba naagarukamu nk'abantu ababi.

³⁷Habwokuba, ha kibi kye naayongeraho obwemi, kandi naayongera kubaza ebigambo bingi eby'okuteeza empaka Ruhanga.”