Read Runyoro - rutooro Yob 36 Bible Online

Yob 36 - Runyoro - rutooro bible

Yob 36

¹Erihu akongera yagamba ati:

²“Gumiisirizaaho kake, otege okutu nkugambire; nkyaina eki ndukwenda kugamba habw'ekitiinisa kya Ruhanga.

³Ndaiha hara amagezi nyekonyeze kyona eki mmanyire, okwoleka Ruhanga Omuhangi wange nkooku ali mwinganiza.

⁴Habwokuba mazimakwo tindukubiiha bisuba; ogu endugirro y'amagezi ali na iwe.

⁵“Oyetegereze, Ruhanga aine obusobozi, kandi tagira n'omu ou agaya, busaho na kimu eki atakenga.

⁶Taleka ababi bakoomeera kandi abanyakubonabonesibwa abaha ekibasemeriire.

⁷Taiha liiso lye ha bahikiriire, baitu abaha okwikaarra hamu n'abakama ebiro byona, baikara nibanyumizibwa.

⁸Obu baba baboherwe omu njegere, bakwasire omu miguha ey'okubonabonesibwa,

⁹obu aba naabooleka eki baakozire, aba naabaragirra ebibi byabo, nkooku baina emyehembo.

¹⁰Abaigura amatu bahurre ebi abeegesa, abaragira baruge omu bubi bwabo.

¹¹Obubamuhurra nibamuhereza, emyaka yabo bagimara omu kusemererwa.

¹²Baitu obu batahurra bahwerekerezibwa ekitara, kandi bafa batamanyire.

¹³“Abo abataikiriza Ruhanga baikara n'ekiniga, kandi noobu baba nibafubirwa, tibasaba ekiganyiro.

¹⁴Bafa bakiri bato, nibakora ebintu ebirukugaywa abantu boona.

¹⁵Ruhanga abantu abeegeseza omu kubaleetera obusaasi, ayekonyeza emihito, nukwo abaigule amatu.

¹⁶Ruhanga akakwiha omu muhito, yakwikiriza otunge obusinge; emeeza yawe akagiijuza ebyokulya byatuuma.

¹⁷“Ogonza muno okucwera omusango n'okuhondera obwinganiza byakuhikaho.

¹⁸Otalirengaho okubiihwabiihwa enguzi, rundi kwikiriza abaguuda kukuhabisa.

¹⁹Tikiina eki kiraakugasira; kuteera omuranga nooserra kikonyera; amaani gawe goona, hati tigasobora kukukonyera.

²⁰Oleke kulirirra obwire ngu, buraira di? Ako nuko akasumi amahanga aka galihwerekererraamu.

²¹Ofuuhize kimu kyona ekikutwara omu kusiisa, habwokuba okusiisa oku nukwo kwakuletiire emihito.

²²Oyetegereze, Ruhanga w'obusobozi obutagambwa nooha asobora kwegesa nka uwe?

²³Kuruga naira, nooha aramugambiire ngu: ‘Toma omuhanda gunu, ayayehoiremu kumugambira ati: ‘Eki okozire tikihikire?’

²⁴“Oijukege okuhaisaniza ebi yakozire, abantu ogu baazinireho.

²⁵Abantu boona bakagurora; omuntu ayema hara agwetegereza.

²⁶Oyetegereze, Ruhanga mukuru, obukuru bwe titusobora kubwetegereza, n'emyaka ey'obukuru bwe titusobora kugibara.

²⁷Habwokuba nuwe aha amaizi, nuwe ayagya ekiho, akiihamu enjura

²⁸enjura egi niyo eruga haiguru egwa, niyo egwera muno abantu.

²⁹Busaho noomu asobora kwetegereza nkooku yayanjurwire ebicu, rundi enkuba nkooku ebbaruka neeraba omwiguru Ruhanga nambere aikara.

³⁰Ata oku nooku omurabyo gwe gumwehinguliriza, baitu enziha z'enyanja ziikara omu kizima.

³¹Ebi nibyo ayekonyeza kucwera abantu omusango, nibyo ayekonyeza kugaba ebyokulya ebisaagaine.

³²Akwata omurabyo omungaro ze, aguragira guteere nambere arukwenda.

³³Okubbaruka kw'enkuba kutebeza ebye kumanyisa ihunga eriri haihi kwija, kandi habweki ayoleka okubihirwa kwe habw'ebibi byabo.