Read Runyoro - rutooro Yob 38 Bible Online

Yob 38 - Runyoro - rutooro bible

Yob 38

¹Nubwo MUKAMA yayemere omu kairiringwa yagarukamu Yobbu ati:

²“Niiwe oha aruukaguliiriza amagezi gange, noobaza eby'obudoma ebitarumu makuru?

³Weeteege nk'omusaija, ninyija kukukaguza, kandi ninyenda ongarukemu.

⁴“Okaba oli nkaha obu nkaba nimpanga ensi ngambira, obworaaba oina amagezi.

⁵Nooha ayagirengere? Nka iwe, mazimakwo nomanya! Rundi nooha ayagitairemu omusiitale?

⁶Emiganda yayo ekagumira ha kintu ki, kandi nooha ayabyaire ibaale lyayo?

⁷Enyunyuuzi ez'omu rukyakya obu zaazimiire hamu, ab'omwiguru boona baatoka habw'omuhimbo?

⁸“Enyanja obu yahagwire yaruga omwitaka, nooha yagikangiire?

⁹Ninyowe naswekere enyanja ebicu nagibuutikira omwirima,

¹⁰nkagiteeraho emitaano, nagikingisa ebihongozo n'enyigi,

¹¹nkagigambira nti: ‘Ogende ohike hara kuli, kandi hali otaligurukaho, hanu, ebigonzi byawe eby'amaani nuho bigarukirege.’

¹²“Iwe Yobbu, wakaba kubaho, okaba oraragiire obwire bukakya? Kandi oramanyisize emamba ekiikaro kyayo?

¹³Oragiragiire kukwata ensi, ebinge ababi baruge nambere beeserekere?

¹⁴Ensi ehinduka nk'ibumba eritairweho emanyiikirizo, kandi efooka nk'ekyokujwara.

¹⁵Ababi tibahweza kandi bacwibwa emikono yabo ei baikara baimukize.

¹⁶“Oragenzire ha nsoro, omu nziha z'enyanja? Orarubasire hansi y'enyanja?

¹⁷Haroho omuntu ayali akwolekere amalembo aganyakulinda ensi ey'omwirima enyakwikarwamu abafu?

¹⁸Omanyire ensi nambere erukwingana? Ngarukamu, obu oraaba ogimanyire.

¹⁹“Omanyire ekyererezi nambere kiruga rundi omwirima nambere gwikara?

²⁰Ebi osobora kubyoleka nambere biraagenda bikagarukira, rundi kubigarra omu biikaro byabyo.

²¹Okimanyire, habwokuba okaba oroho, n'emyaka yaawe niyo!

²²“Orahikire nambere ebirika biikara, rundi oraboine nambere orubaale rwikara?

²³Ebi nkabyahurra akasumi ak'omuhito, nkabitegekera ebiro eby'obulemu.

²⁴Orahikire nambere izooba liruga, rundi omu kiikaro, omuyaga ogwa Burugaizooba, nambere guteera nigwiha?

²⁵“Nooha ayalimiire enjura omukura, kandi nooha ayatemiire enkuba omuhanda?

²⁶Nooha anaga enjura nambere hatali muntu?

²⁷Nooha aitirra itaka eryomere n'orusenyi orutarumu muntu, nukwo obunyansi bumere?

²⁸“Ebi byombi, enjura n'orume biina isebyo?

²⁹Orubaale n'obutiti bigira nyinabyo?

³⁰Kiki ekigumanganiza amaizi nk'ibaale kandi kikaletereza enyanja kwekwata?

³¹“Osobora kuboherana enyunyuuzi kakaga rundi kuyugya enjegere z'edubu?

³²Osobora kuturukya enyunyuuzi zizookere omu kasumi kaazo, rundi osobora kwebembera edubu n'ebyana byayo?

³³Omanyire ebiragiro ebinyakulema iguru? Osobora kubitaho bikalema n'omunsi?

³⁴“Osobora kwamirra, iraka lyawe likahika ha bicu, nukwo bikunagire enjura enyingi?

³⁵Osobora kutuma emirabyo egende, ekakugamba eti: ‘Tuli hanu’?

³⁶Nooha ayahaire ebicu amagezi, kandi nooha ayahaire ekiho okwetegereza?

³⁷Nooha asobora kubara ebicu n'amagezi ge, rundi nooha asobora kuculika eminiga ya haiguru, nubwo hakagwa enjura,

³⁸Enjura enyakuleetera ecuucu kwekwata ekarugwamu ebitole n'entaka ezikwataine?

³⁹“Osobora kuhiigira entale enyamaiswa ey'eraalya rundi kwigusa entale ensigazi

⁴⁰zo ibundaire omu maingira gaazo rundi zibyamire omu mpuku?

⁴¹Nooha agabira ebingoora ebyokulya, abaana baabyo obu bakunga Ruhanga, nibenjeera nibaserra ebyokulya?