Read Runyoro - rutooro Yob 39 Bible Online

Yob 39 - Runyoro - rutooro bible

Yob 39

¹“Omanyire akasumi ensuku aka izarramu? Orayetegeriize enjaza obu iba niizaara?

²Osobora kubara ameezi aga zimara, kandi omanyire akasumi ak'izaarramu?

³Omanyire akasumi aka ziraamarramu kuzaara abaana baazo?

⁴Abaana baazo batunga amaani, bakurra aheeru mu bwerre; abaana obu bamara kukura bakatunga amaani, barugaho nyinabo, bagenda obutagaruka.

⁵“Nooha ayaikiriize entulege kulya bugana nooha ayasibwire entulege ezinyakwanguha

⁶ezi nahaire ekyeya nuho ziraalege ezi nahaire ensi enyakurumu ekisura niyo ziikalemu?

⁷Ziikara hara, tizihurra toko ey'omu mbuga, busaho muntu n'omu asobora kizirima rundi kuzikozesa omulimo.

⁸Ensozi nigo maliisizo aga ziriirramu nuho ziriira buli kinyansi ekibisi, rundi ekikoora eki ziraalya.

⁹“Embogo eriikiriza kukuhereza? Eriraara omu isibiko lyawe?

¹⁰Osobora kugiboha n'omuguha nukwo ogirimise?

¹¹Rundi osobora kugirimisa emisiri yawe n'ekyoma? Osobora kugyesiga, habwokuba y'amaani muno, onihire ngu eraakukorra omulimo gwawe ogw'amaani?

¹²Ogyesiga kukugesira ebyokulya byawe, n'okukwihira engano yawe nambere ogihurra?

¹³“Maaya etengeesa amapapa gaayo n'okwegonza; baitu amapapa ago n'ebyoya ebi, bibamu embabazi?

¹⁴Eyalika amahuli gaayo hansi, egaleka gatagasibwe omurro ogw'omwitaka

¹⁵eyeberwa kimu omuntu nkooku asobora kugarubata, kandi ebisoro eby'omwiswa nkooku bisobora kugaata.

¹⁶Ebyana byayo ebikora kubi n'ebitali byayo; okutalibana kwayo kwona noobu kuba kwa busa, baitu yo tetiina;

¹⁷habwokuba Ruhanga akagibuza amagezi, yagiima obwetegereza.

¹⁸Obu eyehimba kwiruka, esekeereza embaraasi n'omutembi wayo.

¹⁹“Iwe Yobbu, niiwe wahaire embaraasi amaani agarukwingana aho, niiwe wazihaire omugeye ogunyakuseeseka?

²⁰Niiwe ogisoboza kuguruka nk'enzige n'okutiinisa abantu n'okufuuka kwazo?

²¹Zirahiza itaka ery'omu kihanga; zanguha okugenda omu bulemu, ziiruka n'amaani gaazo goona.

²²Embaraasi esekeereza abanyakutiina, kandi tefuuberra; teyehugura mpirima.

²³Ebyokurwanisa abatembi baazo ebi baba bahagatiire, bijaarajaara kandi bimulikiza ha mugongo gwayo.

²⁴Obu eba n'obukaya n'ekiniga emira itaka; obu ehurra iraka ly'engwara teteekaana.

²⁵Obu ehurra engwara yagamba eyekaamba! Etandika kukaga obulemu bukyali hara, Ehurra okuduuma kw'engabwa n'obwogo.

²⁶“Niiwe wayegeseze maleere kwereera, n'okwanjurra amapapa gaayo egoolekiize amasirimuka?

²⁷Niiwe ogambira isamba kuhurruka nookwombeka ekiju kyalyo omu nsozi?

²⁸Liraara ha mabaale agaraihire muno, obutwe bw'ensozi nikyo kigo kyalyo.

²⁹Aho nuho lyema okuleeba ekintu eki riraita; likirora kikyali hara.

³⁰Ebyana byalyo binywa esagama, kandi nambere hali emitumbi aho nuho liikara.”