Read Runyoro - rutooro Yob 40 Bible Online

Yob 40 - Runyoro - rutooro bible

Yob 40

¹Ruhanga akakaguza Yobbu ati:

²“Kyehakana omusango, asobora kuteeza empaka Ow'obuzobozi bwona? Ogu arukuteeza Ruhanga empaka, nuwe agarukemu ekigambo kinu.”

³Nubwo Yobbu yagarukiremu MUKAMA ati:

⁴“Nyowe kandi mutaroho ndaakugarukamu ki? Eki ndaagarukamu kindemere.

⁵Mbalize dimu, tindukwija kwongera.

⁶Aho MUKAMA ali omu kairiringwa akagarukamu Yobbu ati:

⁷“Oyeteege masaija ogume ninyija kukukaguza, kandi ongarukemu.

⁸Obu mazimakwo noogamba ngu nkasobya? Nooyenda kunnyeta mubi, iwe kwefoora murungi?

⁹Noingana na Ruhanga obusobozi, kandi osobora kubaza n'iraka ery'amaani nk'erye?

¹⁰“Obu kiraaba kiri kiti; weete mu obukuru n'ekitiinisa; oyehe okumanywa n'okutiinwa.

¹¹Orole abo abanyakwenyumiza; okwatwe ekiniga obabundaaze.

¹²Orole wena arukwekuliiriza omubundaaze; orubaatirre ababi boona nambere bali.

¹³Boona obaziike omwitaka, obabohere omunsi ey'abafu.

¹⁴Obu, ninyowe ndiba w'okubanza kukuhaisaniza, n'okugumya nti iwe wenka niiwe musinguzi.

¹⁵“Orole enjubu ei nahangire nkooku nahangire iwe; hati neerya obunyansi nk'ente.

¹⁶Orole nkooku ina ensika, omumubiri gwayo orole nkooku ina amaani omu binywa byenda yayo.

¹⁷Egumanganiza omukira gwayo nk'omukogoto; ebinywa eby'ebibero byayo bikakwatanizibwa hamu.

¹⁸Amagufa gaayo nseke nk'ez'omulinga ebicweka by'omubiri gwayo nibisisana ebihongozo eby'ebyoma.

¹⁹“Nikyo ekintu eky'okubanza hali ebi Ruhanga ebi yakozire, ogu wenka ayakihangire nuwe asobora kukisingura.

²⁰Habwokuba ensozi nizo zigiha ebyokulya, ensozi enyamaiswa zoona ez'omu kisaka nambere zizaanira.

²¹Ebyama hansi y'amalebe omu nkuku y'orubingo n'omu kisaaru.

²²Amalebe nugo gagireetera ekiituuru, emikinga y'ekisaaru egyehinguliriza.

²³Ekisaaru obu kihirra, tikigitiinisa, teyekanga, Yorudaani noobu egyeseesa omumaiso.

²⁴Haroho asobora kugikwasa amarobo rundi kugicumita enyindo n'omutego?