Read Runyoro - rutooro Yob 41 Bible Online

Yob 41 - Runyoro - rutooro bible

Yob 41

¹“Osobora kwiha omu maizi endyoka n'irobo rundi kugiboha orulimi n'obuguha?

²Osobora kugirabya omuguha omu nyindo rundi kugicumita orusaya n'irobo?

³Esobora kukwesengereza eti: ‘Ndeka ngende’? Esobora kukusaba eti: ‘Nganyira’?

⁴Esobora kuragaana na iwe, ebe muheereza wawe ebiro n'ebiro?

⁵Olizaana nayo nkooku waakuzaine n'enyonyi, rundi oligisibika ha muguha ebe y'abazaana bawe?

⁶Abasuubuzi baligiramuza? Baligibaganirizaamu abasuubuzi bagenzi baabo?

⁷Osobora kugicumita yoona amacumu, rundi kugicumita omutwe n'emisogi?

⁸Banza ogikwateho, oteekereze nkooku erwana; toligaruka kugikwataho!

⁹Weena anyakurora endyoka ahoibwamu amaani, agwa hansi.

¹⁰Tihabaho muntu n'omu noobu aba w'amaani ata asobora kwehwamu kugyemera. Habweki, muntu ki ogu asobora kunyemerra omumaiso.

¹¹Nooha ayampaire, ngu na nyowe nukwo mugarurre? Kyona kyona ekinyakuli, kyange.

¹²“Tindukwija kwanga kubaza ha ngingo ze ha maani ge amaingi, rundi ha nkura ye enungi.

¹³Nooha asobora kumujuura ekijwaro kye ekya haruguru? Nooha asobora kutaaha omu kooti ze ez'ekyoma eziteeraniziibwe hamu?

¹⁴Nooha asobora kumwesamya akanwa? Akanyakurumu amaino ago agarukutiinisa?

¹⁵Omugongo gwayo gukakorwa omu nkarra z'engabu ezinyakuboherwe hamu, kandi ezirukuguma dai nk'ibaale.

¹⁶Buli emu eri haihi muno na ngenzi yayo enyakugiheriire, noobwakubaire embeho tesobora kwihika hagati.

¹⁷Ziteeraniziibwe hamu; ziganjaine, tizisobora kwahukana.

¹⁸Emyeesa yayo erugwamu ekyereerezi, kandi amaiso gaayo, gaaka nk'izooba obu liba niriimuka!

¹⁹Akanwa kaayo karugwamu endimi z'omurro ezirukwaka, karugwamu n'amasaasaazi.

²⁰Omu nyindo zaayo harugamu omwika ogurukusisana orwoya orurukuruga omu kinaga ekirukutokomera, ogurukusisana omwika ogw'omugugu ogurukuhya

²¹orwoya rwayo rwakya amakara, akanwa kaayo karugwamu endimi ez'omurro.

²²Ebikya byayo by'amaani mali, boona abanyakugiitirana, beekanga.

²³Enyama ez'omubiri gwayo zikwataine hamu, zigigumiireho kandi tizisobora kutengeeta.

²⁴Omutima gwayo guguma dai nk'ibaale, guguma nk'orubengo.

²⁵Obu eyemerra, noobwakubaire abo baakirimaani, bamarwaho enkizi, obutiini burarra kubaita.

²⁶Omuntu noobu akugitimba empirima, tikiina eki kirukugikoraho noobu akugicumita icumu, noobu akugirasa omusogi.

²⁷Ekyoma, nekyeeta bunyansi kandi omulinga, muti oguhukwirwe.

²⁸Omusogi tigusobora kugiirukya, amabaale aga bagihungurra, hali yo misenka.

²⁹Ebiduuma ebyeeta misenka; obu erora abasaija nibahungura amacumu, egwa n'enseko.

³⁰Enda yayo esisana enguhyo ezikobokere ha binaga; ezinyakudubura itaka ery'esaabu nk'enyondo kateera misumaali.

³¹Etokomeza enziha nk'enyungu; ebimbya enyanja nk'enyungu y'amagita.

³²Nambere eraba hasigara nihangasana; omuntu yaakusoboire kuteekereza ati: enyanja emezire enju

³³omunsi munu busaho kintu na kimu ekirukugisisana, busaho kihangwa ekitatiina.

³⁴Niyo erora byona ebinyakuli haiguru; niyo mukama anyakulema abantu boona ab'emyehembo.”