Read Runyoro - rutooro Yob 5 Bible Online

Yob 5 - Runyoro - rutooro bible

Yob 5

¹“Iwe Yobbu, hati yeta, haroho araakugarukamu? Ha barukwera nooha oworairukiraho?

²Mazimakwo, ekiniga kiita omudoma, kandi ihali liita ekigwagwa.

³Nkarora abadoma abaazookaga nk'abagwagwaine baitu nkaleeta bwango omukyeno ha maju gaabo.

⁴Abaana baabo tibatekaine, nibabberengulirwa omu irembo hali, tiharoho n'omu ow'okubajuna.

⁵Abantu abajara nubo balya ebyokulya by'omudoma, Ruhanga abajakura omu kanwa k'abaana baabo, abantu ab'omururu baitanira ebintu byabo.

⁶Omuhito tiguruga omu cuucu, nobubwakuba obujune tibwaruka.

⁷Baitu! Omuntu wenka nuwe ayereetera akabi, nk'isamba nk'ebisasazi ebiimuka haiguru hanyuma y'okuhemba omurro.

⁸Nyowe obu naakubaire iwe, naakwenagire hali Ruhanga, nuwe naakugambiire ebyange byona.

⁹Ogu anyakukora ebintu ebikooto kandi ebiteetegerezibwa, anyakukora ebintu ebihuniriza ebitabarwa.

¹⁰Anaga enjura omunsi kandi aitirra emisiri;

¹¹aimukya abo abanyakwebundaaza, kandi abanyakuli omu naku abaha obusinge.

¹²Aburanganiza amagezi g'engobya, ebi bakora tibirugwamu mugaso.

¹³Abanyamagezi abakwatira omu bucwangya bwabo; entegeka z'enkurungutaniza aiculeeza bwango.

¹⁴Omu bwire bwa nyamusana, bbo baba omu mwirima, kandi omu ihangwe, bahumahuma nk'ekiro.

¹⁵Baitu Ruhanga ajuna abanaku orufu, abaseege abaihaho okuhaahazibwa.

¹⁶Aha abanaku kunihira, ababi abaigara akanwa.

¹⁷Muhiirwa omuntu ogu, Ruhanga ou ahana habweki, obu araakuhanaga, olekege kubiihirwa.

¹⁸Habwokuba ahutaaza agaruka asemba; ateera asaasa, agaruka atamba.

¹⁹Alikujuna akabi emirundi mukaaga; ha gwa musanju, akabi tikalikuhikaho.

²⁰Kiihe obu erigwa, alikujuna oleke kufa, obu halicweka obulemu alikujuna ekitara.

²¹Olijumwa okugeywa, okuhwerekerezibwa obu kuliija, tolitiina. Omu kasumi ak'okuhwerekerra n'ak'ekiihe, iwe oraayesekeraga,

²²enyamaiswa ez'omunsi tolizitiina.

²³Emisiri eyolirima teribamu mabaale, enyamaiswa ez'omu kisaka tizirikuseesira.

²⁴Olimanya eka yawe nkooku eri kurungi, olikebera isibiko lyawe, olirisanga litakwasirweho.

²⁵Kandi olimanya abaijukuru bawe nkooku baliba baingi, oruzaaro rwawe ruliba nk'obunyansi obw'omunsi.

²⁶Olifa okuzire muno, nk'ekiba ky'engano oku kigenda ha rubuga oruhulirwaho, omu kasumi kaakyo.

²⁷Ego, ekintu kinu tukyetegereriize kimu; ky'amazimakwo ohurre, okimanye nukwo okiihemu omugaso.”