Read Runyoro - rutooro Yob 6 Bible Online

Yob 6 - Runyoro - rutooro bible

Yob 6

¹Nubwo Yobbu yagarukiremu ati:

²“Ai bambi, Emihito n'obujune bwange kakuba byalengerwe ha minzaani!

³Byakulemiire okukira omusenyi ogw'enyanja; eki nikyo kyangambisize ebigambo eby'ekiniga.

⁴Ruhanga Rutakirwa akandasa emyambi; obusegu bw'emyambi egi, bumpikire omu mubiri gwange gwona, Ruhanga andeetiire ebyokutiinisa byona bindwanise;

⁵entulege obu eba neerya obunyansi egamba, rundi ente ejuga kunu neerya ebyokulya byayo?

⁶Nooha asobora kulya ebyokulya ebitarungirwemu kisura? Amaizi g'ihuli gabamu obunuzi?

⁷Ebintu nk'ebi, tinsobora kubirya, ebyokulya eby'omulingo ogu bindwaza.

⁸“Ha, kakuba nsobora kutunga eki ndukusaba, kandi kakuba Ruhanga ampaire eki ndukwegomba;

⁹eki nikyo kyakusemiize Ruhanga, kumberengura, haa boojo, yaakuyugize omukono gwe, anyihaho!

¹⁰Eki nikyo kyakumpuumwize, noobwakubaire ndi omu busaasi obutagambwa, naakusemeriirwe muno; habwokuba ntange bigambo by'Ahikiriire ogu.

¹¹Amaani gange nugo garaha nukwo nsobole kwongera kwomeera? Kandi eki ndukugondeza kwongera kwomeera kiki, obu ndaaba ntaina eki ndukunihira?

¹²Amaani gange, maani nk'ag'amabaale rundi omubiri gwange gw'omulinga?

¹³Mazimakwo, tinkyaina maani ag'okwejuna, tinyina nambere nsobora kugenda nkatunga obukonyezi.

¹⁴“Ogu anyakwanga kugirra mutaahi we embabazi, ogu tatiina Ruhanga ow'obusobozi bwona.

¹⁵Inywe bagenzi bange, muli ncwangya nk'obugera obunyakwoma omu kyanda

¹⁶obunyakuteerwamu omwirima ogw'orubaale,

¹⁷kandi obunyakweserekwamu ebirika, ebintu ebi, obu habaho ekirro, byaga, omusana obu gujwa, bihwerra bibura.

¹⁸Abantu bahaba baruga omu muhanda gwabo; bataaha omu irungu bahwerekerra.

¹⁹Abantu ba Teema baaserra, aba Seebba baanihira.

²⁰Bakabiihirwa, habwokuba bakaba nibagumiza kimu bagendayo baitu baburanganizibwa.

²¹Hati na inywe nukwo munfookiire muti; nimurora obujune, kandi nimutiina.

²²Mbasabire nti: ‘Mumpe ekisembo’? Rundi nti: ‘Mukwate ha itungo lyanyu mumpeererre enguzi’?

²³Rundi nti: ‘Munjune omunyanzigwa’? Rundi nti: ‘Muncungule hali arukunionioza’?

²⁴Munyegese; mumanyire emisango yange ninyija kuculeera mbategere okutu.

²⁵Ebigambo eby'amazima ka by'amaani! Baitu ebigambo byanyu biina eki birukuhana?

²⁶Nimuteekereza ngu ninsobora kuhakaniza ebigambo, kandi kunu ebigambo by'omuntu ogu ayahoire amasiko, biri nk'omuyaga?

²⁷Enfuuzi mwakwiteeriire akaruuru, mutungira hali banywani banyu.

²⁸“Hati mbeesengeriize, mundolerre; tindukwija kubiiha bisuba.

²⁹Mugenzire hara muno, mulekere aho kukurungutaniza mutancwera omusango, eki ndukukora ky'obulyo.

³⁰Nimuteekereza nimbiiha nimuteekereza kwahurana ekirungi ha kibi?