Read Runyoro - rutooro Yob 7 Bible Online

Yob 7 - Runyoro - rutooro bible

Yob 7

¹“Omuntu omunsi munu, tagira omulimo ogw'amaani, kandi ebiro bye, tibisisana nk'eby'omuntu anyakukolerra empeera?

²Nk'omwiru arukwenda ekiituuru, kandi nk'omupagasa arukwenda omusaara gwe,

³Mmazire ameezi n'ameezi ntaina kintu eki ndukwemarraho, buli kiro, kindeetera obujune.

⁴Obu mbyama, nyekaguza nti: ‘Buraakya di?’ Obwire bw'ekiro bwikaraho muno ndaara ninyehindurana okuhika emamba kusara.

⁵Omubiri gwange gwijwire enjoka n'ecuucu; gugumangana, hanyuma gusalika.

⁶Ebiro byange birahuka okukira entabaalizi y'omuruki w'engoye, bihwa ntaina eki ndukunihira.

⁷“Ai Ruhanga, oijuke obwomeezi bwange nkooku buba rwoya kwonka, amaiso gange tigaligaruka kurora ekirungi.

⁸Eriiso ly'ogu arukundora tiririgaruka kundora; obu oliba okyantaireho amaiso, nubwo ndiburaho.

⁹Nk'ekicu oku kicuucuuka kikabura n'ogu anyakusirimuka nyabuyonga tarugayo; tatemba akarugayo;

¹⁰enju ye tayongera kugigarukamu, abantu be tibongera kumumanya.

¹¹Habweki, akanwa kange tikaaculeere noobu ndiba ninsaalirwa nta, ndihyema omu mutima gwange.

¹²Nyowe ndi nyanja nandiki ndi kisoro ky'omu nyanja, nikyo wanteeriireho abalinzi?

¹³Obu ndukugira nti: ‘Ekitabu kyange kiraampumuza, ekitabu kyange kirankeehyaho obusaalizi’

¹⁴iwe nubwo ontiinisa nondoosa ebirooto, onkanga noonyoleka ebintu ebirukutinisa,

¹⁵nikyo nkomeraho okumigwa n'okufa, okukira obusaalizi bwange bunu.

¹⁶Obwomeezi bwange mbuhoiremu, tindi w'okwomeera ebiro n'ebiro. Ndeka, ngira ebiro byange, rwoya kwonka.

¹⁷Omuntu kintu ki iwe kumunyumiza oti, kumutaho oti omutima,

¹⁸okaikara noomubungira buli kiro okaikara noomulenga buli kasumi?

¹⁹Olinyihaho di amaiso, na nyowe okandeka nkamira amacwanta?

²⁰Obu nsiisa, mba nkukozire ki, iwe entasi y'abantu? Habwaki wanfoire kintu kyawe eky'okwegeraho kuteeba? Habwaki nkulemeera nti?

²¹Habwaki otanganyira ekibi eki nakozire, okanyihaho obubi bwange? Habwokuba hati, ninyija kuziikwa, noija kunserra, baitu ndaaba ntakyaroho.”