Read Runyoro - rutooro Yob 8 Bible Online

Yob 8 - Runyoro - rutooro bible

Yob 8

¹Nubwo Biridaadi Omusuuhi yagarukiremu ati:

²“Oraahikya nkaha kugamba ebigambo nk'ebi, oraaleka di kubaza ebitaina makuru?

³Ruhanga mwinganiza? Ow'obusobozi bwona alemesa abakora eby'amazima?

⁴Abaana bawe obu baraaba bamusobiize, abahaire ekifubiro ekibasemeriire.

⁵Leero nu na iwe obu oraaba oli murungi kandi oli mwesigwa, hati kubukira Ruhanga; omwesengereze. Ruhanga tarukwija kusibyaho, naija kukugirra embabazi.

⁶Mazimakwo yaakusirimukire habwawe atarukusiibyaho, naija kukugirra embabazi.

⁷Noobwakubaire okatandika oli muke, omu biro byawe eby'omumaiso waakuganagaine.

⁸“Ninkusaba okaguze ha biro ebyahingwire oteekereze baaswenkuru ebi baaboine;

⁹habwokuba itwe tuzairwe ijo bunu titwina eki tumanyire, habwokuba ebiro byaitu omunsi munu, kiituuru.

¹⁰Tibaakwegese tibaakusubirre tibaakugambire ebigambo ebi baayetegeriize?

¹¹“Kiraboinwe, Orufunjo rusobora kukura nambere hatali kisaaru? Orubingo rusobora kumera nambere hatali maizi?

¹²Ebintu ebi obu biba bikyali bito, bitakabaire kutemwa, nibyo bibanza kuhotoka, ebimera ebindi bitakahotokere.

¹³N'abantu abatatiina Ruhanga nukwo baba bati; omuntu atatiina Ruhanga, ahwa amasiko.

¹⁴Obwesige bwe, buba buke nk'ehuuzo, okunihira kwe kuba nk'enju y'enyamumbubi.

¹⁵Aigamira enju ye, baitu teyemerra; alengaho kugikwata agigumye, baitu teguma.

¹⁶Atunga omugisa kara, izooba litakaimukire, kandi obutaagi bwe bumara omusiri gwe.

¹⁷Emihama ye eyezingiriza ha ntuumo y'amabaale; uwe aikara omu myandara hagati.

¹⁸Obu aliihwa omu kiikaro kye, kirimwehoga kigambe kiti: ‘Tinkakubonaga.’

¹⁹Orole, oku nukwo okusemererwa kw'abantu ababi abantu abandi baija, bagaruka omu biikaro byabo.

²⁰“Mmunyikirize, Ruhanga talinagaija omuntu omurungi, kandi omubi talimukonyera.

²¹Alikuha kwikara nooseka, alikuragira kwikara nootoka habw'okusemererwa.

²²Abo abanyakukunoba baliswazibwa, abantu ababi balihwerekerra.”