Read Runyoro - rutooro Zab 10 Bible Online

Zab 10 - Runyoro - rutooro bible

Zab 10

¹Habwaki oyesungusura Ai MUKAMA? Habwaki oyesereka omukasumi ak'omuhito?

²Habw'emyehembo, ababi bahahaaza muno abanaku; obaleke bakwatirwe omu mitego baategere.

³Habwokuba omubi, ayenyumiriza omubintu omutima gwe ebi gwegomba, kandi habw'ebintu, omuntu ow'omururu, akondereza MUKAMA kandi amwehooga.

⁴Habw'emyehembo, omubi taserra MUKAMA, ebiteekerezo bye byona bimubiiha biti: “Tiharoho Ruhanga.”

⁵Obusumi bwona, emihanda ye eba y'omugisa; encwa yawe ey'emisango, eri haiguru muno, tasobora kugirora; agaya abanyanzigwa be boona.

⁶Ateekereza omumutima gwe ati, “Ndiba nimbonwa ki? Tindigira muhito ebiro byona.”

⁷Akanwa ke kaijwire kukondereza, obucwangya, n'ebigambo eby'okusaaliza; hansi y'orulimi rwe, haliyo itima n'obubi.

⁸Aikara omubyaro abundaire ategere; omubiikaro ebyeserekwamu, nuho aitira abataina musango. Amaiso ge galinguliriza mpora mpora ab'omugisa mubi,

⁹abundaara nambere atarukurorwa, nk'entale omubwingira bwayo; abundaara nukwo asobole kubakura omunaku, obu amara kumubakura, amutwara omukitimba kye

¹⁰Ndakiboine asasangurwa, adikira hansi, asingurwa amaani g'oli.

¹¹Ateekereza omumutima ati, “Ruhanga ayeberwe, amaiso ge agaserekere, buli na buli eki talikirora.”

¹²Imuka Ai MUKAMA; Ai Ruhanga imukya omukono gwawe; otalyebwa abanyakuli omumuhito.

¹³Habwaki, omubi agaya Ruhanga, naateekereza omumutima gwe ati “Tolijunaana”?

¹⁴Baitu iwe orora; ego, oyetegereza omuhito n'obusaalizi, nukwo obikwate omungaro zawe; ndakiboine ayehongera iwe; niwe wabaire mukonyezi w'enfuuzi.

¹⁵Henda omukono gw'omubi, n'ogw'enkozi y'ebibi; orondereze obubi bwe, okuhika obu olikasanga buhoireho

¹⁶MUKAMA nuwe mukama w'ebiro byona; amahanga galihwerekerra gahwe omunsi ye.

¹⁷Ai MUKAMA, ohurrege aboorobi ebi barukwetaaga; niwe olibagumya omutima, niiwe olibategera okutu,

¹⁸nukwo okorre enfuuzi n'abali omumuhito eby'obwinganiza, omuntu anyakuzaarwa omunsi, nukwo aleke kwongera kutiinisa.