Read Runyoro - rutooro Zab 103 Bible Online

Zab 103 - Runyoro - rutooro bible

Zab 103

¹Iwe bwomeezi bwange, kugiza MUKAMA, na byona ebiri omuli nyowe, mukugize ibara lye erirukwera!

²Kugiza MUKAMA iwe bwomeezi bwange, kandi oteebwa ebirungi byona eby'akora,

³ogu anyakukuganyira ebibi byawe byoona, anyakukutambira endwara zawe zoona,

⁴anyakucungura obwomeezi bwawe akabwiha omu kiina, anyakukujweka ekondo ey'engonzi ezitayuga n'okuganyira

⁵anyakwigusa ebirungi obwomeezi bwawe bwona, obusigazi bwawe, nukwo bugaruke ha buhyaka, nk'obw'isamba.

⁶MUKAMA aihaho omusango, kandi abo boona abahendereziibwe, abaramurra omu bwinganiza.

⁷Akamanyisa Musa emihanda ye, akooleka ebikorwa bye abantu ba Isirairi.

⁸MUKAMA muganyizi kandi munyambabazi, tabiihirwa bwango, kandi w'engonzi nyingi ezitayuga.

⁹Obutoosa, taikara naahana, kandi taikara n'ekiniga ebiro byona.

¹⁰Tatukorra naarorra ha bibi byaitu, kandi tatusasura naalengera ha bubi bwaitu.

¹¹Habwokuba, iguru nkooku liri hara muno n'ensi, n'engonzi ze ezitayuga hali abo abamutiina, nukwo ziri nyingi muno ziti;

¹²Burugaizooba nkooku eri hara na Bugwaizooba nukwo atwihaho ati ebibi byaitu.

¹³Ise baana nkooku aganyira abaana be, na MUKAMA nukwo aganyira abo abanyakumutiina.

¹⁴Habwokuba, amanyire obuhangwa bwaitu; aijuka nkooku tuli cuucu.

¹⁵Omuntu, ebiro bye bisisana obunyansi; ayakya nk'ekyakyo eky'omwiswa;

¹⁶Omuyaga gurumisa kukirabaho guti, buli kihoire ekiikaro kyakyo, tikyongera kukimanya.

¹⁷Baitu engonzi za MUKAMA ezitayuga, hali abo abamutiina, zikaruga ira na ira, za buli na buli; kandi obuhikiriire bwe, buhikaho abaijukuru b'abantu

¹⁸buhikaho abo abanyakuhikiriza endagaano ye, kandi abanyakwijuka kukwata Ebiragiro bye.

¹⁹MUKAMA agumize ekitebe eky'obukama bwe omwiguru, kandi obukama bwe nibulema ebintu byona.

²⁰Muhaise MUKAMA, inywe baamalaika be, inywe ab'amaani abanyakukwata ekigambo kye, abanyakuhurra eki aragira!

²¹Mukugize MUKAMA, inywe amahe ge inywena, inywe abaheereza be abanyakukora eby'agonza!

²²Mukugize MUKAMA, inywe ebintu byona ebyahangire, ebinyakuli omu biikaro byona ebi arukulema. Iwe bwomeezi bwange, kugiza MUKAMA!