Read Runyoro - rutooro Zab 104 Bible Online

Zab 104 - Runyoro - rutooro bible

Zab 104

¹Iwe bwomeezi bwange! Kugiza MUKAMA, Ai MUKAMA Ruhanga wange, oli w'ekitiinisa muno! Oli w'ekitiinisa kandi oli mukuru,

²iwe anyakujwaire ekyererezi, nk'anyakujwaire ekyokujwara, ayabambire iguru nk'arukubamba eheema,

³ayarambikire emirabba ey'ebisiika byawe ha maizi, ayafoire ebicu kigaali kyawe, anyakutemba amapapa g'omuyaga,

⁴anyakufoora emiyaga bakwenda bawe, omurro n'endimi z'omurro baheereza bawe.

⁵Niwe wasimbire ensi wagigumya ha misingi yayo nukwo ereke kutengeeta ebiro n'ebiro.

⁶Okagisweka enziha y'amaizi nk'arukugijweka eky'okujwara; amaizi gaayemerra ha nsozi eruguru.

⁷Obu wacoomiire gairuka; obu gaahuliire nobbuukura, gaaborogota

⁸Ensozi zikatemba, ebihanga byadikira, byagenda omu kiikaro eki wabikomiire.

⁹Okagateeraho omutaano ogu gatasobora kuguruka, nukwo galeke kwongera kusweka ensi.

¹⁰Okaragira ensoro z'amaizi zihagule omu bihanga; amaizi gagera hagati y'ensozi,

¹¹nugo ganywibwa ebisoro byona eby'omu kisaka; nugo garuhuura entulege.

¹²Haihi na go, nubwo obwikaro obw'enyonyi ez'omu mwanya nizizinira omu mataagi g'emiti.

¹³Oyema omu bwikaro bwawe obwa haiguru, oitirra ensozi, ensi igusibwa ebintu ebi wakozire.

¹⁴Niwe okuza obunyansi obunyakuliibwa ente, n'ebibyarwa ebinyakwekonyezibwa omuntu nukwo aihege ebyokulya omwitaka

¹⁵n'eviini ey'okumusemereza amagita ag'okumeremeesa amaiso ge, n'ebyokulya eby'okumuleetera amaani.

¹⁶Emiti ya MUKAMA itirirwe kwo amaizi agarukumara, emikogoto ya Lebbanoni eiyayebyaliire.

¹⁷Omumikogoto egi, ebinyonyi numwo byombeka ebiju byabyo, omukede, niyo ka y'ebidongodongo.

¹⁸Ensozi eziraihire nizo ziikarwamu ensuku; emyandara, nubwo bwirukiro bw'entahurra.

¹⁹Okahanga okwezi kumanyiseege obusumi; izooba limanya akasumi akaliraagweramu.

²⁰Niiwe oleeta omwirima, obwire bwira, enyamaiswa zoona ez'omu kibira, zituruka.

²¹Entale ensigazi zibbubbura niziserra ekisoro eki ziralya, nizisaba Ruhanga azihe ebyokulya byazo.

²²Izooba obu lituruka, zibiiha aho zibitwara; zibyama omu maingira gaazo.

²³Abantu nubwo batura ha mirimo batalibana okuhika orwebagyo muno.

²⁴Ai MUKAMA, k'okakora ebintu bingi! Byona okabikora n'amagezi; Ensi yoona ijwiire ebihangwa byawe.

²⁵Nseeri kuli, haliyo enyanja enkooto kandi egalihire, enyakwijwire ebintu ebitasobora kubarwa, ebintu ebyomeezi, ebitoito n'ebikooto.

²⁶Enyanja egi niyo egendwamu meeri, n'empyo ei wakozire kuzaniramuga

²⁷Ebi byona, bihanga iwe amaiso, obihe ebyokulya byabyo omu kasumi konyini akasemeriire.

²⁸Obw'obiha eky'obiha bikisorooza kyona; obw'oyanjurra engaro zawe, biiguta ebintu ebirungi.

²⁹Obwosereka amaiso gawe, bicwekwa enkizi, obu obiihaho orwoya rwabyo, bifa, bigaruka omu cuucu yabyo.

³⁰Baitu obu obiha orwoya, byomeera buhyaka; ensi ogihanga buhyaka.

³¹Ekitiinisa kya MUKAMA nikikaikalehoga ebiro byona, MUKAMA akyanganukirege omu bintu ebi yakozire,

³²Ogu anyakurolerra ensi ekatukumira, Ogu, ow'akwataho ensozi zikacuuka omwika!

³³Obwomeezi bwange bwona, ndaziniraga MUKAMA; obu ndiba nkyaroho, ndaazinaga ninkugiza Ruhanga.

³⁴Okwegambirra kwange kumusemeze, habwokuba omuhimbo gwange guba omu MUKAMA.

³⁵Abasiisi nibakabuuleezibwe bakaruga omunsi, ababi bataligaruka kurangisibwa. Iwe mwoyo gwange, kugiza MUKAMA! Haisiriza MUKAMA.