Read Runyoro - rutooro Zab 105 Bible Online

Zab 105 - Runyoro - rutooro bible

Zab 105

¹Musiime MUKAMA habw'ebyamahano yakozire habwa Isirairi mugambe ha ibara lye mumanyise amahanga ebikoorwa bye!

²Mumuzinire, mumuzinire eby'okumukugiza! Musubirreho ebyamahano byona ebi yakozire!

³Mwenyumirize omu ibara lye erirukwera; emitima y'abo abanyakuserra MUKAMA ekyanganuke!

⁴Muserre MUKAMA n'amaani ge, muserre amaiso ge obutalekerra!

⁵Mwikalege nimwijuka ebyamahano ebi yakozire, ebihuniriza bye, n'emicwere ye ey'emisango,

⁶oruzaaro orw'Abburahamu omuheereza we, batabani ba Yakobbo abakome be!

⁷Nuwe MUKAMA Ruhanga waitu; nuwe acwera Ensi yoona emisango, ebiro byona.

⁸Aijuka endagaano ye, aijuka ekigambo eki yaragiire, kiikaleho okuhikya omwanya ogw'emyaka rukumi,

⁹endagaano ei yakozire n'Abburahamu, omurago gwe ogu yarahiriire Isaaka,

¹⁰ogu yagumize hali Yakobbo nk'ekiragiro, hali Isirairi, nk'endagaano ey'ebiro byona

¹¹naagamba ati, “Ndikuha Kanaani, gube mugabo ogw'obugwetwa bwawe.”

¹²Obu bakaba bali bake, batarukumanywa muno, kandi bali bagenzi omunsi egi.

¹³Nibenjeera, nibaruga omu ihanga erimu nibagenda omu lindi, nibaruga omu bukama obumu nibagenda omu bantu abandi,

¹⁴tiyaikirizaaga muntu n'omu kubabonesa; habwabo, yacoomeraga abakama

¹⁵naagamba ati, “Mutakwataho abasiigwa bange, abarangi bange mutabakora akabi!”

¹⁶Obu yanagire kiihe omunsi, yakeehya ebyokulya byabo byona,

¹⁷akabeebembeza omusaija ou baagulize nk'omwiru, ibara lye Yosefu. Kwija kunaga kiihe omunsi egi, n'okukeehya ebyokulya byona, akaba abandize kutumayo omusaija ou yaguziibwe nk'omwiru, nuwe Yosefu.

¹⁸Ebigere bye bikasaalizibwa enjegere, ebikya bye, baabitamu ebyoma;

¹⁹eki akaba agambire okuhika obu kyahikiriire, ekigambo kya MUKAMA nubwo kyagumizibwe nkooku yabalize eby'amazima.

²⁰Omukama akatuma, baamulekera, omulemi w'amahanga yamutaisura;

²¹Omukama akamuha kurolerra enju ye, n'okutegeka byona ebi akaba atungire

²²kuragirra abanyoro

²³Hanyuma, Isirairi nubwo yagenzire Misiri; Yakobbo yaikara omunsi ya Haamu.

²⁴MUKAMA akakanyisa muno abantu be, yabafoora b'amaani okukira abazigu baabo.

²⁵Emitima yabo akagitamu kunoba abantu be,

²⁶kugobeza abaheereza be. Akatuma Musa omwiru we, n'Arooni ou akaba akomere.

²⁷Bakakora ebyamahano bye hagati y'abanyanzigwa baabo abo, n'ebihuniriza omunsi ya Haamu.

²⁸Akaleeta omwirima, gwateera omunsi; bayaanga kukwata ebigambo bye.

²⁹Amaizi gaabo akagafoora sagama, encu zaabo yaziita.

³⁰Ensi yabo ekamooma ebikere, noobwakubaire omu bisiika by'abakama baabo.

³¹Akagamba kwonka haija emizinga y'ensohera n'ey'emibu, yamara ensi yoona.

³²Omu kiikaro ky'enjura, akabateeza orubaale n'omurro ogwayakiire omunsi yabo.

³³Akateera emizabbibbu n'emitini yabo, yacwacwana emiti ey'ensi yabo.

³⁴Akagamba kwonka haija enzige ento n'enkuru ezitabarwa.

³⁵Ezaahwerekeriize ebibyaarwa byona eby'omunsi, zaaliira kimu ebijuma eby'itaka lyabo.

³⁶Akaita emizigaijo yoona ey'omunsi yabo, ekintu eky'okubanza ekyarugire omu maani gaabo goona.

³⁷Hanyuma, akeebembera Isirairi, anyina efeeza n'ezaabbu, kandi omu nganda zaabo hatabeho muntu n'omu ayayesiitaire akatabaijuka.

³⁸Obu baarugireyo, Misiri ekasemererwa, habwokuba baagitinisaaga muno.

³⁹Akataho ekicu eky'okubaswekerra, n'omurro ogw'okubamulikira omu bwire obw'ekiro.

⁴⁰Bakasaba ebyokulya yabatwekera endahi, yabaha n'emigaati enyingi muno etabarwa kuruga omwiguru.

⁴¹Akaata omwandara, amaizi gaataraaka; gaagera gaaraba omwirungu nk'ekisaaru.

⁴²Habwokuba akaijuka omurago gwe ogurukwera, ogu yaraganiize omwiru we Abburahamu.

⁴³Nukwo kwebembera abantu be banyina omuhiimbo, abantu aba yakomere nibazina.

⁴⁴Akabaha ensi ez'amahanga; baatunga ebintu, abantu abandi ebi baatuutukiire.

⁴⁵Nukwo basobole kukwata ebigambo bye, beetegereze Ebiragiro bye. Bate omutima ha Biragiro bye. Mukugize MUKAMA!