Read Runyoro - rutooro Zab 106 Bible Online

Zab 106 - Runyoro - rutooro bible

Zab 106

¹Mukugize MUKAMA! Musiime MUKAMA, habwokuba murungi; habwokuba engonzi ze ezitayuga ziikaraho ebiro byona;

²N'oha ow'asobora kusubirra ebintu byona eby'amaani MUKAMA ebi yakozire, rundi n'oha ow'asobora kumukugiza nkooku asemeriire kukugizibwa?

³Bahiirwa abo abanyakugendera ha bwinganiza, obusumi bwona, abanyakukora ebihikire.

⁴Ai MUKAMA, obw'oliba noogirra embabazi abantu bawe, onyijuke; obu oliba noobajuna, onkonyere;

⁵nukwo nsobole kurora abakomerwemu bawe nibatunga omugisa, nukwo nsobole kukyanganukira omu kusemererwa kw'ihanga lyawe, nukwo nyegondeze omu kuba omu ha bagwetwa bawe

⁶Itwe na baisenkuruitwe tukasiisa; tukasobya twakora ebitahikire tukakora ebibi.

⁷Baisenkuruitwe obu bakaba bali Misiri, batateekereze emirimo yawe enyakuhuniriza; bataijuke engonzi zawe nyamwingi ezitayuga, baitu ha Nyanja Erukunanata, bakeemera Ogu anyakuli haiguru muno.

⁸Baitu noobu baliba baakozire eki, akabajuna habw'ibara lye, nukwo ayoleke obusobozi bwe obw'amaani.

⁹Akacoomera Enyanja Erukunanata yayoma; yabambura enziha, nk'arukubarabya ha itaka eryomere.

¹⁰Nukwo yabajunire ati yabaiha omu mukono gw'omuzigu, nukwo yabakirize ati, yabaiha omu busobozi bw'omunyanzigwa.

¹¹Amaizi gaamira abanyanzigwa baabo, hatabeho n'omu ayasigaireho.

¹²Hanyuma nubwo baikiriize ebigambo bye, nukwo kuzina eby'okumukugiza.

¹³Baitu bakeebwa bwango ebi akaba akozire; tibaamulinda kubahabura.

¹⁴Obu bakaba bali omwirungu, amairu gaabo gakabakiza amaani, nukwo kulenga Ruhanga.

¹⁵Akabaha eki baasabire, baitu yabanagamu endwara kahwerekereza.

¹⁶Abasaija abakaba bali omu rusiisira obu baakwatiirwe ihali Musa n'Arooni omuhikiriire wa MUKAMA,

¹⁷ensi ekeesama yamira Dasani, kandi yabuutikira ekitebe kya Abiramu.

¹⁸Kandi omu kitebe kyabo eki hakaimukamu omurro; endimi zaagwo zaasiiriza ababi.

¹⁹Ha rusozi Holebbu bakakora enyana, kandi baaramya ekisisani eki ekyagiibwe omu bintu.

²⁰Bakahingisa ekitiinisa kya Ruhanga, baakiha ekisisani eky'ente kalyabunyansi,

²¹Bakeebwa Ruhanga Omujuni wabo, ow'akaba akozire ebintu ebikuru omunsi Misiri.

²²Ebintu ebihuniriza omunsi ya Haamu, kandi ebintu ebihuniriza ha Nyanja erukunanata.

²³Nubwo yagambire kubahwerekereza, kakuba Musa ou yakomeremu, ataramwemeriire omumaiso naafukya ekiniga kye, ekikaba nikiija kubuleeza abantu.

²⁴Nubwo baagayire ensi ey'okusemererwa, tibayesiga omurago gwe.

²⁵Bakatontorroma omuheema zaabo, tibahurra iraka lya MUKAMA.

²⁶Nubwo yagoroire omukono gwe naabarahiirra naagamba ati: ndibahwerekerereza omwirungu,

²⁷ararangye abaijukuru baabo omu mahanga, abaleke bafeere omunsi zitali zoowabu bo.

²⁸Ha kiikaro Peyoli, abantu ba Ruhanga bakeetabura omu by'okuramya Baali, balya n'ebyonzira ebyahongerwaga embandwa ezitaina bwomeezi;

²⁹baakwasa MUKAMA ekiniga habw'ebikorwa byabo, kagingo nukwo kubagwamu.

³⁰Finehaasi nubwo yafubiire abakaba baine omusango, kagingo yabarugamu.

³¹Kinu kikamuleetera kwetwaga ahikiriire buli nabuli ebiro byona.

³²Ha maizi ga Meribba abantu bakabiihiza MUKAMA Musa nukwo kugwerwa akabi habwabo;

³³habwokuba bakasaaliza omwoyo gwe, yabaza ebigambo ebikaba bitali by'amagezi,

³⁴Batahwerekereze amahanga, nka MUKAMA okwakaba abaragiire kukora,

³⁵baitu bakeejwanganiza naamahanga baayega emirwa yabo ei baakoraga.

³⁶Abantu ba Ruhanga bakaramya embandwa ekyababeriire mutego ogwabaleteriize kuhwerekerra.

³⁷Batabani baabo na bahara baabo, bakabatambiirra emizimu;

³⁸bakaseesa esagama etaroho musango eya batabani baabo na bahara baabo, abatambiirwe ebisisani bya Kanaani; ensi yarofuhazibwa esagama.

³⁹Nukwo basisikaire bati habw'ebiikorwa byabo, baaba bagobya hali Ruhanga habw'emirwa yabo.

⁴⁰Ekiniga kya MUKAMA nubwo kyabaakiireho,

⁴¹yabahayo omu mukono gw'amahanga, abo abakaba babanobere nukwo kufooka balemi baabo.

⁴²Abanyanzigwa baabo bakababonabonesa, obusobozi bwabo bwabafoora bairu baabo.

⁴³Mirundi nyingi yabajunaga, baitu bo omu bigendererwa byabo bakafooka beemi, bayeyongerra kimu kudikira omu bibi.

⁴⁴Baitu nabwo Ruhanga akarora omuhito gwabo, kandi obu bamukungaga ahuliriza omukungo gwabo.

⁴⁵Habwabo akaijuka endagaano ye, habw'engonzi ze kuba nyingi akeegarukamu.

⁴⁶Abo boona abaababonesaaga, akabaha kubaganyira.

⁴⁷Ai MUKAMA Ruhanga waitu, otujune kandi otusorooze nootwiha omumahanga, tusobole kusiima ibara lyawe erirukwera, nookusemerererwa kukukugiza.

⁴⁸MUKAMA, Ruhanga owa Isirairi, ahaisanizibwe, kuruga ebiro byona noobutoosa! Abantu boona kabagambe ngu Amiina Mukugize MUKAMA!